13 قازاندا اباي اتىنداعى قازاق ۇلتتىق وپەرا جانە بالەت تەاترىنداAizhan Abdubait قولدانبالى ونەر جانە «زەرلەۋ» التىن تىگىس اۆتورلىق ءۇيىنىڭ 30 جىلدىق مەرەيتويىنا ارنالعان «زەر-عۇمىر» كورمەسى وتەدى.
وكق بريفينگىندە رەستاۆراتور-ديزاينەر ايجان ابدۋبايت جانە باسقا دا تانىمال سۋرەتشىلەر الماتىدا التىنمەن كەستەلەۋدىڭ كونە تەحنيكاسىن قالاي جانداندىرىپ جۇرگەنىن ايتىپ بەردى، دەپ حابارلايدى Almaty-akshamy.kz.
ايجان ابدۋبايت جارتى عۇمىرىن وسى ىسكە جانە وسى ونەردى زەرتتەۋگە ارناعان جالعىز قولونەرشى.
«ەگەر قولدانبالى ونەر تۋرالى جالپى ايتاتىن بولساق، ول الۋان ءتۇرلى، كوپسالالى. مىسالى، اعاش وڭدەۋ، تەمىر، زەرگەرلىك بۇيىمدار، توقىما-كىلەم توقۋ، كيىز باسۋ جانە ت.ب. سونداي-اق، كەستە تىگۋ ونەرىندە بىرنەشە باعىت بار: كرەست، توقىما، تىگىس جانە باسقالارى. ولاردىڭ ىشىندە «زەرلەۋ» - التىن جانە كۇمىس جىپتەرمەن كەستە تىگۋ، حانداردىڭ، بيلەر مەن سۇلتانداردىڭ كيىمدەرى مەن باس كيىمدەرىن اشەكەيلەۋ. بۇل ەليتارلىق ونەر جوعالۋعا اينالدى. بۇل ءبىزدىڭ حالقىمىزدىڭ مادەنيەتى قانشالىقتى باي بولعاندىعىنىڭ تىكەلەي دالەلى. سوندىقتان مەن ءوز ءومىرىمدى وسى ونەردى زەرتتەۋگە ارنادىم»،-دەپ ءبولىستى ديزاينەر-رەستاۆراتور، ق ر سۋرەتشىلەر وداعىنىڭ مۇشەسى، «جىگەر» فەستيۆالىنىڭ لاۋرەاتى جانە التىن تىگۋ ونەرىنىڭ شەبەرى ايجان ابدۋبايت.
رەستاۆراتوردىڭ قولىنان شىققان العاشقى جۇمىستاردىڭ ءبىرى - جاڭگىر حاننىڭ ايەلى حانشا فاتيمانىڭ نيكولاي ءى پاتشانىڭ تاققا وتىرۋ راسىمىندە كيگەن كويلەگى مەن كامزولى. سونداي-اق، ايجان ابدۋبايت قوجا احمەت ياسساۋي ءقابىرىن جاۋىپ تۇرعان كىلەمدى، جاڭگىر حاننىڭ اسكەري كيىمىن قالپىنا كەلتىرۋ بويىنشا جۇمىس جاسادى.
سونىمەن قاتار، بۇل ونەردىڭ قاشان جانە قاي جەردە پايدا بولعاندىعى تۋرالى ناقتى مالىمەتتەر جوق. قازاق دالاسىنا ول پاتشا زامانىندا كەلدى، دەيدى گرافيك، ەتنوگراف جانە جازۋشى ەرالى وسپانوۆ.
«بۇل ونەردى ءبىزدىڭ دالاعا قازاق سۇلتاندارى اكەلدى جانە ول تەك بيلەۋشى تاپتىڭ، اقسۇيەكتەردىڭ وكىلدەرىنە عانا تيەسىلى بولدى. ەرلەردىڭ مۇراق اتتى باس كيىمىن تەك حاندار، سۇلتاندار مەن بيلەر كيگەن، ونى التىن جانە كۇمىس جىپتەردى قولدانا وتىرىپ، وسى تەحنيكادا كەستەلەگەن. كوپتەگەن جىلداردان كەيىن بۇل قولونەر حالىق اراسىنا ءسىڭىسىپ كەتتى، سودان كەيىن «زەرلەۋ» كيىمدەر مەن باس كيىمدەردى عانا ەمەس، سونىمەن قاتار تۇرمىستىق زاتتاردى دا بەزەندىرە باستادى»، - دەدى ە.وسپانوۆ.
جۇمىس ىستەگەن جىلدارى شەبەر قولونەرشى جۇزدەن استام ادامدى وقىتتى. بۇگىندە ايجان ءابۋبايتتىڭ جۇمىستارى جەكە كوللەكسيالاردا، ال رەستاۆراسيادان وتكەن تاريحي تۇلعالاردىڭ كوستيۋمدەرىن ەلىمىزدىڭ مۇراجايلارىنان كورۋگە بولادى.