ماسەلە ۇكىمەتتە قارالىپ جاتىر
سولتۇستىك قازاقستان وبلىسىنا جۇمىس ساپارىمەن كەلگەن ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا قوعامدا ءجيى تالقىعا تۇسەتىن ماسەلەلەردىڭ ءبىرى – ايەلدەردىڭ زەينەت جاسىن قىسقارتۋعا قاتىستى پىكىر ءبىلدىردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ءمينيستردىڭ ايتۋىنشا، ايەلدەردىڭ ءقازىر 63 جاستى كۇتپەي زەينەت دەمالىسىنا شىعۋعا مۇمكىندىگى بار. ەگەر 5 بالاسى بولسا، زاڭ بويىنشا 53 جاسىندا زەينەتكەرلىككە شىعا الادى. سونداي-اق، قولدانىستاعى زاڭناماعا سايكەس، ەگەر دە زەينەتاقى قورىنداعى جيناعى جەتەتىن بولسا، بيىل 51 جارىم جاسىندا زەينەتاقى الا الادى.
«بۇگىن ايەلدەرمەن دە كەزدەستىك. ولار مەنىڭ، مەن ولاردىڭ ۇسىنىسىن تىڭدادىم. ەڭ نەگىزگى ماسەلە – ءبىز قاي جاستا زەينەتكە شىقساق، زەينەتاقىمىز الىپ جۇرگەن ەڭبەكاقىمىزدىڭ كولەمىنە سايكەس بولادى؟
بىزدە 50 مەن 60 جاس ارالىعىنداعى 967 مىڭنان استام ايەل بار. سولاردىڭ 339 مىڭى بۇگىندە ەكونوميكانىڭ بارلىق سالالارىندا ەڭبەك ەتىپ ءجۇر. ولاردىڭ ەڭبەكاقىسى 170 مىڭ تەڭگەدەن اسادى. ولارعا 58 جاستا زەينەتكە شىق دەپ ايتساق، الاتىن زەينەتاقىلارى الدەقايدا تومەن بولايىن دەپ تۇر. سەبەبى، ءبىز ىنتىماقتاستىرىلعان جۇيەدەن الاتىن زەينەتاقىنى 1998 جىلعا دەيىنگى ەڭبەك وتىلىمەن ەسەپتەيمىز. ال، ول ەڭبەك ءوتىلى ءقازىر ازايىپ قالدى. سوندىقتان، بۇگىنگى كەزدەسۋدە مەن ايەلدەرگە زەينەتاقىنى كوتەرۋ ماسەلەسىن شەشۋ قاجەتتىگىن ايتتىم، بۇل ماسەلە ءقازىر ۇكىمەتتە قارالىپ جاتىر»، - دەيدى تامارا دۇيسەنوۆا.
ءمينيستردىڭ ايتۋىنشا، جۇمىس ىستەمەيتىن ايەلدەرگە قاتىستى دا ماسەلە بار. ولاردىڭ زەينەتاقىسى تومەنگى كۇنكورىس دەڭگەيىنە دە جەتپەيدى.
«ايەلدەردىڭ بۇل ساناتىنا تومەن قويساق تا، جوعارى قويساق تا، بيىل شىعاتىن بولسا 24 700 تەڭگە كولەمىندە الادى. سوندىقتان، بيىل ۇكىمەت تاراپىنان «كۇمىس جاس» دەگەن جاڭا ءبىر جوبا باستالدى. ونى مەن مينيسترلىككە كەلگەننەن كەيىن قولدادىم. 61 جاستاعى جاندارعا ارنالعان. 58 جاستان باستاپ كورەمىز، مۇمكىن جۇمىسقا تارتامىز. وندا الاتىن قاراجاتىنىڭ كولەمى 91 مىڭ 500 تەڭگە بولسا، ەندىگى جىلى 100 مىڭنان اسادى. ءسويتىپ، 5 جىلدىق ەڭبەك ءوتىلى جانە زەينەتاقى جيناعى پايدا بولادى»، - دەيدى ق ر ەڭبەك جانە حالىقتى الەۋمەتتىك قورعاۋ ءمينيسترى.
تامارا دۇيسەنوۆانىڭ ايتۋىنشا، زەينەتاقىنى كوتەرۋ ماسەلەسى ءقازىر ۇكىمەت تاراپىنان قولداۋ تاۋىپ جاتىر، ال زەينەت جاسىن ازايتۋ جان-جاقتى قارالادى. جۇمىس توبى ايدىڭ سوڭىندا تاعى ءبىر كەزدەسەدى.
«تاعى دا قايتالاپ ايتامىن، ءبىزدىڭ مىندەتىمىز – زەينەت جاسىن تومەندەتىپ، از زەينەتاقى الۋ ەمەس، قايسى جاستا شىقساق تا، كۇنكورىس دەڭگەيىنە جەتەتىن زەينەتاقىمەن قامتاماسىز ەتۋ ماسەلەسى ءبىرىنشى تۇرۋى كەرەك»، - دەدى مينيستر.