«اشىق ساعات الاڭى» جوباسىندا تالقىلاندى
قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگىندە «اشىق ساعات الاڭى» جوباسى شەڭبەرىندە الداعى جىلىتۋ ماۋسىمىنا دايىندىق ماسەلەلەرى تالقىلاندى، دەپ حابارلايدى Almaty-akshamy.kz مينيسترلىكتىڭ باسپا ءسوز قىزمەتىنە سىلتەمە جاساپ.
كەڭەسكە جەرگىلىكتى اتقارۋشى ورگاندار مەن بيزنەس وكىلدەرى، كومىر ءوندىرۋشى كاسىپورىنداردىڭ ماماندارى قاتىستى.
ق ر ييدم قارا مەتاللۋرگيا جانە كومىر ونەركاسىبى باسقارماسىنىڭ باسشىسى جانات يگىسىنوۆتىڭ ايتۋىنشا، الداعى جىلىتۋ ماۋسىمىنا دايىندىق ناۋرىز ايىندا باستالىپ كەتكەن.
ايتا كەتەرلىگى، مينيسترلىك وبلىستار مەن رەسپۋبليكالىق ماڭىزى بار قالالار بولىنىسىندە 2022-2023 جىلدارعا ارنالعان كومىر ونىمدەرىنە قاجەتتىلىك جوسپارىن، سونداي-اق بيۋدجەتتىك ۇيىمدار مەن حالىق ءۇشىن كومىردى الدىن الا دايىنداۋدى قاراستىراتىن جول كارتاسىن ازىرلەگەن بولاتىن.
سپيكەردىڭ پايىمداۋىنشا، اكىمدىكتەر تاراپىنان كومىرمەن الدىن الا قامتاماسىز ەتۋ بويىنشا جۇمىستار ناشار جۇرگىزىلىپ جاتىر. وسىعان بايلانىستى جەرگىلىكتى اتقارۋشى ورگاندارعا كومىر دايىنداۋ جۇمىستارىن اياقتاۋ، سونىمەن بىرگە كومىر باعاسىنىڭ زاڭسىز وسۋىنە قاتىستى باقىلاۋدى كۇشەيتۋ ۇسىنىلدى. بۇدان باسقا، حالىق اراسىندا كومىردى ساتىپ الۋ پۋنكتەرى بويىنشا ءتۇسىندىرۋ جۇمىستارى جۇرگىزىلۋدە.
جالپى 2022 جىلدىڭ 6 ايىنىڭ قورىتىندىسى بويىنشا ەلىمىزدە 56 ملن توننا كومىر وندىرىلگەن. بۇل وتكەن جىلدىڭ سايكەس كەزەڭىمەن سالىستىرعاندا 3،5 پايىزعا ارتىق.
«كەزدەسۋدى قورىتىندىلاي كەلە، مينيسترلىك وكىلى تاپشىلىقتى بولدىرماۋ ءۇشىن كومىر جەتكىزۋشىلەرمەن بەلسەندى ءوزارا ءىس-قيمىل جاساۋ قاجەت ەكەندىگىنە نازار اۋداردى. قتج وكىلدەرىنە حالىقتىڭ قاجەتتىلىكتەرىنە كومىر تاسىمالداۋعا ارنالعان ۆاگونداردى باسىم نەگىزدە قامتاماسىز ەتۋ ۇسىنىلدى»،-دەلىنگەن حابارلامادا.
ەستەرىڭىزگە سالا كەتەيىك، ق ر ييدم-دە جان-جاقتى تالقىلانعان جوسپارلار مەن شەشىمدەردى قابىلداۋ ماقساتىندا «اشىق ساعات الاڭى» جوباسى ىسكە قوسىلعان بولاتىن. ديالوگ الاڭى «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ءۇشىن مينيستر قايىربەك وسكەنبايەۆتىڭ باستاماسىمەن قۇرىلدى.