بيىل ينفلياسيا دا رەكورد ورناتتى.
ق ر پرەمەر-مينيسترىنىڭ ورىنباسارى التاي كولگىنوۆ زەينەتاقى مەن جاردەماقىنى يندەكستەۋ جونىندەگى سۇراققا جاۋاپ بەردى، دەپ حابارلايدى Almaty-akshamy.kz
التاي كولگىنوۆ وتكەن جىلى زەينەتاقىنىڭ يندەكستەلگەنىن ەسكە سالدى. ول بۇل شارالار حالىقتىڭ تابىسىن ارتتىرۋعا باعىتتالعانىن اتاپ ءوتتى.
«زەينەتاقى ءوستى. بيىل ينفلياسيا دا رەكورد ورناتتى. مۇنى ەشكىم جاسىرمايدى. سوندىقتان الداعى ۋاقىتتا يندەكستەۋ دە جۇرگىزىلەدى. بيىلعا شەشىم قابىلدانىپ قويدى»، - دەدى ول.
بۇل رەتتە ول ەلىمىزدە الەۋمەتتىك جاردەماقىلارمەن قاتار دارىگەرلەردىڭ، مەديسينا قىزمەتكەرلەرى مەن مۇعالىمدەردىڭ جالاقىسى كوتەرىلگەنىن تىلگە تيەك ەتتى.
«جالپى، بارلىق سالادا جالاقى ءوسىپ جاتىر. ونىڭ ىشىندە جەكە كومپانيالار دا بار. كاسىپوداقتار، جۇمىس بەرۋشىلەر جانە جەرگىلىكتى اتقارۋشى ورگاندار اراسىندا ءۇش جاقتى كەلىسىمدەر بار. بۇل جۇمىستار تۇراقتى تۇردە جۇرگىزىلەدى»، - دەدى التاي كولگىنوۆ.