مەملەكەت باسشىسىنا اگەنتتىكتىڭ بىلتىر اتقارعان جۇمىستارى تۋرالى ەسەپ بەرىلدى
پرەزيدەنتكە بيزنەستىڭ قىلمىستىق پروسەسكە قاتىسىن ازايتۋ ءۇشىن اگەنتتىكتىڭ جۇيەلى جۇمىستار جۇرگىزىپ جاتقانى جونىندە باياندالدى. سوڭعى ءتورت جىلدا تىركەلگەن ىستەر سانى ەكى ەسە كەمىگەن، دەپ حابارلايدى Almaty-akshamy.kz.
جانات ەليمانوۆتىڭ ايتۋىنشا، جالعان شوت-فاكتۋرالار جازىپ بەرۋ ارقىلى سالىق تولەۋدەن جالتارۋعا كومەكتەسىپ، قارجىنى قولما-قول اقشاعا اينالدىراتىن مىڭنان استام فيرمانىڭ قىزمەتى توقتاتىلدى. سونداي-اق 110 زاڭسىز ويىنحانا مەن الكوگول ءونىمىن شىعاراتىن 44 جاسىرىن سەح جويىلدى.
مەملەكەت باسشىسىنا قارجى پيراميدالارىن جويۋ جونىندەگى تاپسىرماسىنىڭ ورىندالۋ بارىسى تۋرالى مالىمەت بەرىلدى. بىلتىر قارجى الاياقتارىنىڭ قىزمەتىن جارنامالايتىن 13 مىڭ ۆەب-پاراقشا مەن اككاۋنت بۇعاتتالدى. سونداي-اق 29 قارجى پيراميداسىنىڭ جولى كەسىلىپ، زارداپ شەككەن ازاماتتاردىڭ 8،3 ميلليارد تەڭگە كولەمىندە شىعىنى وتەلدى. جالپى، قابىلدانعان شارالاردىڭ ناتيجەسىندە قۇنى 300 ميلليارد تەڭگەدەن اساتىن اكتيۆتەر قايتارىلدى.
قاسىم-جومارت توقايەۆقا اگەنتتىك ۇيلەستىرۋىمەن قارجىنى جىلىستاتۋعا قارسى ۇلتتىق جۇيەگە رەفورما جۇرگىزىلگەنى جونىندە باياندالدى. بۇل قولدانىستاعى زاڭنامانى حالىقارالىق فاتف (FATF) cتاندارتتارىمەن بارىنشا سايكەستەندىرۋگە مۇمكىندىك بەردى.
كەزدەسۋ سوڭىندا مەملەكەت باسشىسى قارجى پيراميدالارىنىڭ قىزمەتى مەن الاياقتاردىڭ قيتۇرقى ارەكەتتەرىنىڭ جولىن كەسۋ جۇمىستارىن جالعاستىرۋدى، سونداي-اق ادال بيزنەستى قورعاۋعا، قارجىلىق جانە ەكونوميكالىق قىلمىستارعا قارسى كۇرەس شارالارىن كۇشەيتۋدى تاپسىردى.