بالىق رەسۋرستارىن ساقتاۋ باستى ماقسات
زاڭسىز بالىق اۋلاعان بروكونەرلەرگە قىلمىستىق جازانى جەڭىلدەتۋ ورىنسىز. بۇل جايىندا ءماجىلىس دەپۋتاتتارىنىڭ ساۋالىنا ق ر ەكولوگيا، گەولوگيا جانە تابيعي رەسۋرستار ءمينيسترىنىڭ مىندەتىن اتقارۋشى ءاليا شالابەكوۆانىڭ جاۋابىندا ايتىلعان، دەپ حابارلايدى Almaty-akshamy.kz قازاقپارات-قا سىلتەمە جاساپ.
«ق ر قىلمىستىق كودەكسىنىڭ 335-بابىنا سايكەس بالىق رەسۋرستارىن جانە باسقا دا سۋ جانۋارلارىن زاڭسىز اۋلاعانى جانە ايتارلىقتاي زالال كەلتىرىلگەن جاعدايدا، سونداي-اق جارىلعىش نەمەسە حيميالىق زاتتاردى، ەلەكتر توعىن نەمەسە بالىق رەسۋرستارى مەن باسقا دا سۋ جانۋارلارىن جاپپاي جويۋدىڭ وزگە دە تاسىلدەرىن قولدانعانى ءۇشىن قىلمىستىق جاۋاپكەرشىلىك كوزدەلگەن. ءوز كەزەگىندە، اتالعان باپپەن زاڭسىز بالىق اۋلاۋ ءۇشىن قاراستىرىلعان جازا ءتۇرى قىلمىستىق كودەكستىڭ 337-بابىمەن زاڭسىز اڭ اۋلاۋ ءۇشىن قاراستىرىلعان جازا تۇرىمەن مولشەرلەس ەكەنىن اتاپ وتكەن ءجون. 2020 جىلى بالىق شارۋاشىلىعى كوميتەتىنىڭ اۋماقتىق ينسپەكسيالارى قىلمىستىق جاۋاپكەرشىلىكتى كوزدەيتىن زاڭسىز بالىق اۋلاۋدىڭ 49 فاكتىسىن، ال 2021 جىلى وسىنداي 74 فاكتىنى انىقتادى»، - دەدى ول جاۋابىندا.
ونىڭ سوزىنە قاراعاندا، جەكە تۇلعالار زاڭنامامەن كوزدەلگەن قىلمىستىق جاۋاپكەرشىلىككە قاراماستان، بالىق رەسۋرستارىن زاڭسىز اۋلاۋدى جالعاستىرۋدا. سوندىقتان قىلمىستىق جازانى جەڭىلدەتۋ زاڭسىز بالىق اۋلاۋ فاكتىلەرىنىڭ ۇلعايۋىنا اكەلۋى مۇمكىن. سونىمەن قاتار، 2006 جىلدان باستاپ سۋ ايدىندارى جانە (نەمەسە) ۋچاسكەلەرى تابيعات پايدالانۋشىلارعا بەكىتىلىپ كەلەدى جانە بالىق شارۋاشىلىعىن دامىتۋعا، ولاردى قورعاۋعا، ءوسىمىن مولايتۋعا جانە عىلىمي زەرتتەۋلەر جۇرگىزۋگە، سونداي-اق قوسىمشا ينۆەستيسيالار تارتۋعا مۇمكىندىك بەرەدى.
«قازىرگى ۋاقىتتا جايىق-كاسپيي باسسەينى بويىنشا 50-گە جۋىق بالىق شارۋاشىلىعى سۋبەكتىلەرىنە كاسىپشىلىك بالىق اۋلاۋدى جۇزەگە اسىرۋ ءۇشىن 60 بالىق شارۋاشىلىعى سۋ ايدىندارى نەمەسە ۋچاسكەلەرى بەكىتىلىپ بەرىلگەن جانە ولار جىل سايىن شامامەن 13 مىڭ توننا بالىق اۋلايدى. وسىلايشا، قازىرگى ۋاقىتتا بالىقشىلار تابيعات پايدالانۋشىلارعا جۇمىسقا تۇرىپ، ارنايى رۇقسات قاعازدارىن الا وتىرىپ، بالىق اۋلاۋمەن زاڭدى تۇردە اينالىسۋعا مۇمكىندىكتەرى بار. سونىمەن بىرگە، قولدانىستاعى زاڭناماعا سايكەس، بالىق شارۋاشىلىعىن جۇرگىزۋ ءۇشىن سۋ ايدىندارىن كونكۋرستىق نەگىزدە بەكىتۋگە مۇمكىندىك بار ەكەنىن اتاپ وتكەن ءجون. وسىعان بايلانىستى، قازiرگi جانە كەلەشەك ۇرپاقتىڭ مۇددەلەرiن ەسكەرە وتىرىپ بالىق رەسۋرستارىن ساقتاۋ ماقساتىندا، زاڭسىز بالىق اۋلاۋ ءۇشىن قاراستىرىلعان قىلمىستىق جازانى جەڭىلدەتۋ ورىنسىز دەپ سانايمىز»، - دەدى ءاليا شالابايەۆا.