جاز - كولىكتىڭ كەز كەلگەن تۇرىمەن قوزعالىستىڭ كوبەيەتىن شاعى.
ەلدىڭ ءىشى بولسىن، سىرتى بولسىن ساياحات، دەمالىس، بالالاردىڭ دەمالىسى دەپ تىنىم تاپپاعان ىعى-جىعى حالىق. قوزعالىس كوبەيگەن سوڭ جولاۋشىلار تاسىمالىندا قيىندىق تۋىنداپ، جەلىدە ۇنەمى رەنىش پەن اشۋعا تولى جازبالار دا كوپ. كۇنى بۇرىن، كۇن ەمەس، جارتى جىل بۇرىن الىپ قويعان ۇشاق ۋاقىتىمەن ۇشپاي، پويىزدىڭ كەستەدەن قالىپ قويۋىنا ەلدىڭ ەتى ۇيرەنگەلى قاشان. ءبىراق ونسىز دا التىنعا بەرگىسىز ۋاقىتىن جوعالتقانىمەن، كەشىككەنى ءۇشىن سول اۋە كومپانيالارىنىڭ بيلەت قۇنىنىڭ 10%-ىن قايتارۋى ءتيىس ەكەنىن بىرەۋ بىلسە، بىرەۋ بىلە بەرمەيدى. وسى ماسەلەنى ق ر پارلامەنتى ءماجىلىسىنىڭ دەپۋتاتى سامات مۇسابايەۆ ءوزىنىڭ فەيسبۋكتەگى پاراقشاسىندا جاقسى كوتەرىپتى. سول جازبانى نازارلارىڭىزعا ۇسىنۋدى ءجون كوردىك.
«مەنىڭ ايتپاعىم دا وسى ماسەلەگە قاتىستى:
جاقىندا ارىپتەس اعام ەدىل جاڭبىرشين ەكەۋمىز ەل جاققا بىرگە ۇشتىق. ماڭعىستاۋدا كەزدەسۋلەرىمىز جوسپارلانعان ەدى.
استانا اۋەجايىنا ءبىز ۋاقتىلى كەلگەنىمىزبەن، Air Astanaنىڭ ۇشاعى ۋاقتىلى ۇشا قويمادى. ۋاقتىلى دەگەندە جارتى ساعات، ءبىر ساعات دەگەنگە ەتىمىز ابدەن ۇيرەندى عوي. ەندى بۇلار ەكى ساعات، ءۇش ساعاتتاپ ۇشپاۋدى شىعارىپتى. ءبىزدىڭ ۇشاعىمىز باقانداي ءۇش جارىم - ءتورت ساعاتقا كەشىگىپ ۇشتى!
وتاندىق اۋە كومپانيالارىنىڭ وسى جاۋاپسىزدىعىنا زىعىردانىم قايناپ جۇرەتىن. بىلتىر ماجىلىسكە كەلگەن كوپ زاڭنىڭ ءبىرى - ءدال وسى تاقىرىپقا قاتىستى "كولىك تۋرالى زاڭ" بولدى.
ءجيى ۇشامىن، كەشىككەن ۇشاقتىڭ كەسىرىنەن تالاي اۋزىم كۇيدى، كوپتەگەن ارىپتەستەر دە، ازاماتتار دا ءجيى ايتاتىن وسى ماسەلەنى.
الدىمىزعا كەلگەن زاڭعا "تاسىمالداۋشى تاراپ ۇشاق، پويىز، اۆتوبۋس قۇرالدارىن كەشىكتىرگەن ءار ساعاتقا بيلەت قۇنىنىڭ 3% وتەماقى رەتىندە قايتارۋى ءتيىس" دەگەن تۇزەتۋدى ەدىل تەرەكباي ۇلى ەكەۋىمىز ۇسىندىق!
ياعني، ۇشاق، پويىز نەمەسە اۆتوبۋس ءبىر ساعات كەشىكسە 3%، ەكى ساعاتقا 6%، وسىلايشا قوسىلا بەرەدى. ءتىپتى، بۇلاي جالعاسا بەرسە جولاۋشى بيلەت قۇنىن تولىق قايتارىپ الۋى دا مۇمكىن
بۇل، ارينە، تاسىمالداۋشىلارعا ۇناعان جوق. الايدا، حالىققا كەرەك تۇزەتۋ، ەل ۇنەمى شاعىمداناتىن نارسە بولعان سوڭ سوزىمىزدەن تانباي، ايتقاننان قايتپاي وتىرىپ الدىق. اقىرى، ءماجىلىس زاڭعا تولىقتىرۋ ەنگىزدى، سەنات ماقۇلدادى، قاڭتار ايىندا پرەزيدەنت قول قويدى. ءسۇيتىپ، وسى جىلدىڭ باسىنان بەرى بۇل زاڭ كۇشىندە!
Air Astanaنىڭ ۇشاعى ءتورت ساعاتقا جۋىق كەشىگىپ ۇشتى. ەدىل اعام ەكەۋمىز ەلگە امان ەسەن جەتتىك. ۇيگە كەلدىم دە، "ءوزىمىز ەرەكشە ەڭبەك سىڭىرگەن زاڭ ەدى، قالاي جۇمىس ىستەپ تۇرعانىن كورەيىنشى" دەگەن ويمەن، كومپانيانىڭ رەسمي سايتىنا كىرىپ، شاعىم قالدىردىم.
ءقادىرلى اعايىن! ءۇش-اق قادام. قيىن ەشتەڭەسى جوق ەكەن، مەن كەشىككەن ءۇش ساعاتتان استام ۋاقىت ءۇشىن بيلەت قۇنىنىڭ 10% سوماسىن قايتارىپ الدىم.
بۇل ءۇشىن نە ىستەۋ كەرەك؟ رەتى بىلاي:
1) كومپانيانىڭ رەسمي سايتىنا كىرەسىز. تىكەلەي سىلتەمە: help.airastana.com. وسى جەرگە تولىق ءاتى-جونىڭىزدى، بيلەت ءنومىرىن، رەيس ءنومىرى، ۇشۋ ۋاقىتى قانشاعا كەشىككەنى جانە ەلەكترون پوشتاڭىزدى جازاسىز. ياعني، شاعىم قالدىراسىز.
2) support@help.airastana.com - تۇتىنۋشىلاردىڭ قولداۋ بولىمىنەن جاۋاپ كەلەدى، "ءسىزدىڭ شاعىمىڭىز تىركەلدى" دەگەن جاۋاپ بولادى جانە قوسىمشا انكەتا جولدانادى. وسى انكەتاداعى سۇراقتارعا جاۋاپ بەرەسىز. ءاتى-جونىڭىز بەن اقشانى قايتارۋ ءۇشىن ەسەپشوت ءنومىرىڭىزدى جازاسىز.
3) "ءوتىنىشىڭىز بويىنشا تالاپ ەتكەن وتەماقى سوماسى ءسىزدىڭ شوتىڭىزعا جىبەرىلدى" دەگەن حابارلاما كەلەدى. وسىلايشا، ءسىز ءماجىلىس قابىلداعان زاڭنىڭ يگىلىگىن كورەسىز!
ءوز باسىمنان كەشكەن وقيعا. ءوزىمىز ەنگىزگەن ۇسىنىستىڭ، قابىلداعان زاڭنىڭ جۇمىس ىستەپ تۇرعانىن كورىپ، قۋاندىم. ءبىراق...
ءبىراق، سول ەداقاڭ ەكەۋىمىز ۇشقان رەيسپەن اقتاۋعا 180 جولاۋشى كەلدى. سولاردىڭ اراسىنان كومپانياعا شاعىم ءتۇسىرىپ، وتەماقى تالاپ ەتكەن جالعىز مەن بولارمىن.
ەگەر، سول 180 ادامنىڭ ءارقايسىسى شاعىم جاساپ، كەم دەگەندە 8 - 9 مىڭ تەڭگەدەن وتەماقى الاتىن بولسا، سول كۇنى Air Astana كەشىككەن ءبىر رەيس ءۇشىن شامامەن 1 440 000 تەڭگەدەي وتەماقى تولەگەن بولار ەدى...
ءار رەيس ءۇشىن ءبىر جارىم ميلليون تولەپ وتىرۋ كىمگە ۇنايدى؟ كەلەسىدە كەشىكپەۋدى ۇيرەنەر ەدى!
قۇرمەتتى اعايىن، بۇل جازبام ماقتان دا ەمەس، مىندەتسىنۋ دە ەمەس. بۇل حالقىمىز زاڭنىڭ تەتىكتەرىن ءبىلىپ، ءوزىنىڭ قۇقىقتارىن تولىعىمەن پايدالانسا ەكەن دەگەن تىلەك!
ەگەر وسىنداي كىشكەنتاي نارسەلەردەن باستاپ تالاپ ەتە بىلسەك، الىپ كومپانيالاردى جاۋاپكەرشىلىككە ۇيرەتەمىز، بىرتە بىرتە تۇتاس قوعامعا وزگەرىس اكەلەمىز.
ءبارى ءوز قولىمىزدا»! - دەپ اياقتاپتى ءوز جازباسىن سامات مۇسابايەۆ.