زاڭدى بىلگەنىڭىز — لايىقتى ءومىر سۇرگەنىڭىز! ادامدار ءۇشىن وزدەرىنىڭ زاڭدى قۇقىقتارىن ءبىلۋ اسا ماڭىزدى. ەگەر ءسىز قاشىقتىقتان جۇمىس ىستەسەڭىز ءسىزدىڭ قۇقىقتارىڭىز قالاي قورعالادى. بۇل جاعدايدا قانداي كەپىلدىكتەر مەن قوسىمشا مۇمكىندىكتەر بار؟ بۇل جونىندە زاڭگەر-ماماندار نە دەيدى؟
دميتريي شيۋتس، KazBar زاڭ كونسۋلتانتتارى پالاتاسىنىڭ مۇشەسى، ق ر اۋديتورلار پالاتاسىنىڭ قۇرمەتتى مۇشەسى، ق ر قارجى مينيسترلىگى كونسۋلتاتيۆتىك ورگانىنىڭ مۇشەسى، ق ر قارجى ماماندارى پالاتاسى باسقارماسىنىڭ ءتوراعاسى:
– جۇمىس بەرۋشى ۇسىنا الاتىن ەڭ ءتيىمدى مۇمكىندىك – قاشىقتىقتان جۇمىس ىستەۋدى ۇيىمداستىرۋ. ەگەر قۇجاتتامالاردى، ەسەپتەردى دايىنداۋ، اۋدارما جاساۋ، باعدارلامالار مەن قوسىمشالاردىڭ ديزاينىن ازىرلەۋ ءارى جوبالاۋ جۇمىستارى جانە ت.ب. بولسا بۇل قاشىقتىقتان اتقارۋعا بولاتىن ءتيىمدى نۇسقا. مۇنداي جاعدايدا وسى جۇمىس رەجيمىنە كوشۋ ءۇشىن ەكى تاراپتىڭ – قىزمەتكەر مەن جۇمىس بەرۋشىنىڭ ءوزارا كەلىسىمى قاجەت.
بۇل رەتتە جۇمىس بەرۋشى قىزمەتكەرمەن بايلانىس جاساۋعا قاجەتتى قۇرال-جابدىقتاردى (مودەم، ينتەرنەت-بايلانىسى، تەلەفون جانە ت. ب.) ءوزى قامتاماسىز ەتەدى نەمەسە وسىلاردىڭ ءبارى قىزمەتكەردىڭ وزىنەن بولسا جۇمىس بەرۋشى سول ءۇشىن قىزمەتكەرگە وتەماقى تولەيدى.
قاشىقتىقتان جۇمىس ىستەۋ كەزىندە جۇمىستى باقىلاۋ جانە ەڭبەك ۋاقىتىن ەسەپكە الۋ قالاي جۇرگىزىلەتىنىن كەلىسىپ الۋ كەرەك. ەڭ باستىسى، ەگەر جۇمىس كولەمى وزگەرمەسە، جۇمىس بەرۋشى ەڭبەكاقى مولشەرىن وزگەرتپەسە دە بولادى، الايدا، ەگەر ول الدىن-الا ەڭبەك شارتىندا نەمەسە ۇجىمدىق ەڭبەك شارتىندا كورسەتىلمەسە، بۇل ماسەلە ەكى جاقتىڭ كەلىسىمىنە بايلانىستى بولماق. مۇنىڭ ءبارى ەڭبەك كودەكسىنىڭ 138-بابىندا كورسەتىلگەن.
ال، ەڭبەك كودەكسىنىڭ 137-بابىندا قىزمەتكەردىڭ ءوز ۇيىندە وتىرىپ جۇمىس ىستەۋىنە بايلانىستى تۇسىنىك بەرىلەدى. ءبىرىنشى نۇسقادان بۇل نۇسقانىڭ ايىرماشىلىعى — ءسىز كومپانياڭىزعا قاجەتتى كيىمدى، اياق كيىمدى، بيجۋتەريانى جانە ت.ب. قاجەت نارسەلەردى ۇيدە وتىرىپ جاسايسىز. ەڭ باستىسى، قاجەتتى قۇرالدار مەن ماتەريالدار بولۋى كەرەك، قىزمەتكەر ولاردى جۇمىس بەرۋشىدەن الادى نەمەسە وزىندە بار ماتەريالداردى پايدالانادى. تولەم اي سايىن، سونداي-اق ورىندالعان جۇمىستىڭ كولەمىنە دە بايلانىستى بولۋى مۇمكىن. بۇل رەتتە دە ءبارى جۇمىس بەرۋشى مەن قىزمەتكەر اراسىنداعى ۋاعدالاستىققا بايلانىستى.
ەكى نۇسقاداعى ماسەلەلەر، ەگەر ولار ەڭبەك شارتىندا الدىن-الا كورسەتىلمەگەن جاعدايدا، ولار ەكى جاقتىڭ ءوزارا كەلىسىمى بويىنشا كەلىسىم-شارتقا ەنگىزىلۋى قاجەت.