بيىل الماتى اۋەجايى جولاۋشىلار اعىنىن 8 ملن-عا دەيىن ۇلعايتۋدى جوسپارلاپ وتىر. سول سەبەپتى اۋەجاي اۋماعىندا كەزەكتەر مەن كەپتەلىستەر بولۋى مۇمكىن، دەپ حابارلايدى almaty-akshamy.kz الماتى حالىقارالىق اۋەجايى كورپوراتيۆتىك كوممۋنيكاسيالار دەپارتامەنتىنە سىلتەمە جاساپ.
اۋەجايدىڭ مالىمەتىنشە، تۋريستەردىڭ قاجەتتىلىكتەرىن قاناعاتتاندىرۋ ءۇشىن جازعى دەمالىس جانە كانيكۋل ۋاقىتىندا رەيستەردىڭ ۇلعايۋىنا بايلانىستى الماتى حالىقارالىق اۋەجايىندا جولاۋشىلار مەن قالا قوناقتارىنىڭ كۇرت ءوسۋى بايقالادى.
بۇگىنگى تاڭدا قولدانىستاعى اۋەجاي تەرمينالىنىڭ وتكىزۋ قابىلەتى جىلىنا 2،7 ملن ادامدى قۇرايدى. سونداي-اق وتكەن جىلى الماتى حالىقارالىق اۋەجايى 7،2 ملن-نان استام جولاۋشىنى قابىلداسا، بيىل جولاۋشىلار اعىنىن 8 ملن دەيىن ۇلعايتۋدى جوسپارلاپ وتىر.
«وسى كەزەڭدە الماتى حالىقارالىق اۋەجايىنىڭ اۋماعىندا قوسىمشا كەزەكتەر مەن كەپتەلىستەر بايقالۋى مۇمكىن. ءبىز وتكىزۋ قابىلەتى 8 ملن ادامدى قۇرايتىن جانە قالامىزدىڭ تۇرعىندارى مەن قوناقتارىنا قاجەتتى جايلىلىق پەن ىڭعايلىلىقتى قامتاماسىز ەتەتىن جاڭا حالىقارالىق جولاۋشىلار تەرمينالىنىڭ قۇرىلىسىن تەزىرەك اياقتاۋ ءۇشىن بار كۇشىمىزدى سالامىز»، - دەپ حابارلادى اۋەجايدىڭ كورپوراتيۆتىك كوممۋنيكاسيالار دەپارتامەنتى.