ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە «مەن جۇرەگىممەن كورەمىن» اتتى ەرەكشە كورمە اشىلدى. ەرەكشەلىگى سوندا، وندا قويىلعان سۋرەتتەر زاعيپ جانداردىڭ قولىنان شىققان.
«بۇل جوبا كوزى ناشار كورەتىن جانە مۇلدەم كورمەيتىن جانداردىڭ ومىرىنە عانا نازار اۋدارۋعا ەمەس، سونىمەن بىرگە ءبىزدىڭ الەمنىڭ سۇلۋلىعىنا ەرەكشە ءتانتى بارلىق ادامنىڭ ماڭگىلىك ونەرگە دەگەن ماحابباتىنا ارنالعان»، – دەيدى بىرەگەي كورمەنى ۇيىمداستىرعان ياكۋت سۋرەتشىسى ماريكا اندرەيەۆا.
ءبىز، ياعني كوزى كورەتىن ادامدار اقپاراتتىڭ 80%-ىن كورۋ ارقىلى قابىلدايدى ەكەنبىز. ال زاعيپ جانداردا باسقا سەزىمدەر مەن تۇيسىكتەر ەرەكشە دامىعان. قاراڭعىلىق ولاردى سىرتقى الەمنەن ايىرعانىمەن، وزدەرىن شىنايى ەستۋگە مۇمكىندىك بەرەدى دەسەدى. ولاردى الاڭداتاتىن ارتىق ەشتەڭە جوق. سوندىقتان ولار ءوزىنىڭ جان دۇنيەسىنە الاڭسىز ساياحاتتاي الادى دەيدى زەرتتەۋشىلەر.
«مەن جۇرەگىممەن كورەمىن» الەۋمەتتىك جوباسىنا بۇرىن ياكۋتتىق ازاماتتار قاتىسىپ جۇرگەن بولاتىن. كەشەگى كورمەدە ولاردىڭ قاتارىنا ءوزىمىزدىڭ اردان عالىم ۇلى دا قوسىلدى. ونىڭ قاستەيەۆ مۋزەيى تورىنەن ورىن العان سۋرەتى «ەركىندىك» (حولست، ماي) دەپ اتالادى ەكەن. شىعارماشىلىققا جاقىن جىگىتتىڭ كوزى كورمەسە دە، سپورتتا دا ءوز بيىگىن باعىندىرىپ ءجۇر. ول گولبولمەن (كوزى ناشار كورەتىن جانە مۇلدەم كورمەيتىندەرگە ارنالعان، قۇرامىندا ءۇش ويىنشى بولاتىن سپورتتىق ويىن) اينالىسادى. الەۋمەتتىك جەلىدە ءجيى كورىنىپ جۇرگەن بەلسەندى بلوگەر. كورمەگە ونىڭ شاشباۋىن كوتەرىپ كەلىنشەگى توميريس تە كەلدى. «مەن – ارداننىڭ كوزىمىن، ال ول – مەنىڭ جۇرەگىم» دەگەن ءتوميريستىڭ جارىن دا، ونىڭ ءاربىر قادامىن دا قۇرمەتتەيتىنى كورىنىپ تۇردى.
سونداي-اق، بىرەگەي الەۋمەتتىك كورمەدە ياكۋتيالىق زاعيپ جاندار – يليا سمەرتيننىڭ «تابيعاتىن»، ۆالەريي كورنيلوۆتىڭ «اۆتوپورترەتىن»، يننوكەنتيي كونونوۆتىڭ «شابىندىق» تۋىندىسىن، ساحايا دانيلوۆانىڭ «كۇننىڭ باتۋى» شىعارماسىن، ميچيل مويسەيەۆتىڭ «ارمانىن» تاماشالادىق.
ولار بۇل تۋىندىلارىندا وزدەرىنىڭ الەمگە دەگەن كوزقاراسىن، ونى ىشتەي قالاي كورەتىنىن جانە سەزىنەتىنىن كورسەتە بىلگەن. ونەر ارقىلى ولار ءوز ويىن، ارمانىن جەتكىزۋگە تىرىسقان. ءاربىر تۋىندى زاعيپ جانداردىڭ وزىنە عانا بەلگىلى باسقا شىندىقتا ءومىر سۇرەتىن ادامنىڭ ىشكى الەمىنە تارتا وتىرىپ، كورەرمەننىڭ تەرەڭ سەزىنۋ تۇيسىگىن تۋدىرادى.
جوعارىدا اتى اتىلعان زاعيپ جاندار تۋرالى بەرەر ءسوز ايتا كەتسەك دەيمىز. ماسەلەن، ساحايا دانيلوۆا ومىرگە كوز اقاۋىمەن تۋعان ەكەن. وكىنىشكە وراي، ونىڭ دەرتىنىڭ الدىندا مەديسينا دارمەنسىز بولىپ، كورۋ قابىلەتى بىرتىندەپ ناشارلاي بەرىپ، قازىرگى ۋاقىتتا مۇلدەم كورمەي قالعان. تاعدىرىنا مويىعان ساحايا جوق، تاريح فاكۋلتەتىن ءبىتىرىپ، ماماندىق يگەرىپ شىقتى جانە جەڭىل اتلەتيكامەن، ۇستەل تەننيسىمەن اينالىسىپ ءجۇر. ول «كۇننىڭ باتۋى» دەپ اتاعان كارتيناسىندا ۇياسىنا قونىپ بارا جاتقان كۇننىڭ شاپاعىنا تاڭدانىپ تۇرعان وتباسىن بەينەلەپتى. ساحايا وتباسىن قۇرۋدى ارماندايدى. رۋحتى قىزدىڭ ارمانىنا جەتەتىنىنە سەنەمىز.
ال 16 جاسقا تولعان ساتىندە «تابيعاتتى» بەينەلەگەن يليا سمەرتيننىڭ ارمانى ءتىپتى ەرەكشە جانە ءسىزدى تەبىرەنتپەي قويماسى انىق. ول جارىق دۇنيەگە زاعيپ بولىپ كەلگەن. دەگەنمەن «ارمانىڭىز قانداي؟» دەگەن ساۋالعا «مەنى ۇنەمى قامقورلىققا، جىلىلىققا بولەپ جۇرەتىن اناشىمنىڭ ءجۇزىن بىرەر سەكۋندقا بولسا دا كورۋ» دەپ جاۋاپ بەرگەن. يليانىڭ «تابيعات» كارتيناسىنا سىلدىرلاپ اعىپ جاتقان وزەن، جاعاسىنداعى جاسىل جەلەكتى اعاشتار، سۋعا ابدەن شايىلعان تاپ-تازا تاستار بەينەلەنگەن.
«اۆتوپورترەت» يەسى ۆالەريي كورنيلوۆ تا قارا جاياۋ ەمەس، سۋرەت سالۋدان تىس، «ەگور وقۋلارىندا» ونەر كورسەتەدى. ال «شابىندىق» يەسى يننوكەنتيي كونونوۆ كوزى كورمەسە دە ءوز قولىمەن ءۇي تۇرعىزعان جان.
كورمە اياسىندا الماتىلىقتار وزگەشە فورماتتا ۇيىمداستىرىلعان كونسەرتتى دە تاماشالادى. كونسەرت الدىندا كورەرمەندەرگە قارا ءتۇستى كوزگە تاڭاتىن تاڭعىشتار تاراتىلىپ، ولار مۋزىكانى كوزدەرى بايلانعان كۇيى تىڭدادى. تاڭعاجايىپ بۇل ەكسپەريمەنت كوپشىلىككە ۇناعان سەكىلدى. ءسويتىپ ۇيىمداستىرۋشىلار زاعيپ سۋرەتشىلەردىڭ كارتينالارىمەن قاتار، دىبىستىڭ، مۋزىكانىڭ، ءيىستىڭ جانە باسقا دا يممەرسيۆتى كومپونەنتتەردىڭ كومەگىمەن ونەرگە تولىقتاي ەنۋ مۇمكىندىگىن جاساۋعا ۇمتىلعانداي. ءيا، جينالعان جۇرت مۋزىكالىق اسپاپتان توگىلگەن اۋەندەردىڭ قاراڭعىلىقتا مۇلدەم باسقاشا ەستىلەتىنىن، ەرەكشە قابىلداناتىنىن ايتىپ جاتتى.
ال ءبىز ءوز كەزەگىمىزدە ەرەكشە جانداردىڭ وزدەرىنىڭ الەمىنە ۇڭىلۋگە مۇمكىندىك بەرگەنى ءۇشىن، جۇرەكتەرىنىڭ اشىقتىعى مەن تازالىعى ءۇشىن العىس ايتامىز.