تۇركىستان وبلىسى پوليسيا دەپارتامەنتىنىڭ باستىعى مۇرات قابدەنوۆ تۇركىستان وبلىسى تولەبي اۋدانى زاعامبار اۋىلىندا كامەلەتكە تولماعان قىزدى زورلاۋ وقيعاسىنا قاتىستى تۇسىنىكتەمە بەردى، دەپ حابارلايدى اlmaty-akshamy.kz.
ايتۋىنشا، الەۋمەتتىك جەلىلەردە 24 ساۋىردە تۇركىستان وبلىسى تولەبي اۋدانى زاعامبار اۋىلىندا بولعان وقيعا تۋرالى جالعان اقپارات تارالۋدا. 24 ساۋىردە كامەلەتكە تولماعاندى زورلاۋ فاكتىسى بويىنشا قىلمىستىق ءىس قوزعالدى. كامەلەتكە تولماعان كۇدىكتى ۇستالىپ، قاماۋعا الىندى. ساراپتاما تاعايىندالدى جانە قىلمىستىق ءىس سوتقا جولدانادى.
«سونىمەن قاتار، 25 ساۋىردە پوليسياعا بوتەننىڭ مۇلكىن ورتەۋ تۋرالى حابارلامالار ءتۇستى. اتالعان فاكتىلەر بويىنشا قىلمىستىق ىستەر قوزعالدى. زارداپ شەككەندەر مەن قۇرباندار جوق. بوتەننىڭ مۇلكىن ورتەۋ فاكتىسىنە قاتىسقانداردىڭ بارلىعى انىقتالىپ، ۇستالدى جانە قاماۋعا الىندى. تەرگەۋ جالعاسۋدا»، – دەدى ول.
اتالعان جايتتار بويىنشا ناقتى اقپارات وقيعا بولعان كۇنى پوليسيا دەپارتامەنتىنىڭ رەسمي پاراقشالارىندا جاريالاندى.
ۆەدومستۆو باسشىسىنىڭ ايتۋىنشا، قازىرگى ۋاقىتتا زاعامبار اۋىلىندا جاعداي تۇراقتى، وبلىس اكىمى جانە بارلىق مەملەكەتتىك ورگاندار باسشىلارىنىڭ توراعالىعىمەن اۋىل تۇرعىندارىنا جيىن وتكىزىلىپ، ءتيىستى ءتۇسىندىرۋ جۇمىستارى جۇرگىزىلدى، زاڭ شەڭبەرىندە شەشىم قابىلداناتىنى ەسكەرتىلدى.
«ينتەرنەت جەلىسىندە تارالعان، ياعني «بىرنەشە وقۋشى ۇستالدى، جابىرلەنۋشى جۇكتى جانە ءبىرقاتار جىگىتتەر زورلادى» دەگەن اقپاراتتار شىندىققا جاناسپايدى. قازىرگى تاڭدا جالعان اقپارات تاراتقان ءبىرقاتار اۆتورلار انىقتالدى، ولارعا قاتىستى اكىمشىلىك جانە قىلمىستىق شارالار قابىلدانۋدا. بارشا ازاماتتارعا رەسمي اقپارات كوزدەرىنەن الىنعان اقپاراتقا سەنۋگە شاقىرامىز. جالعان اقپارات تاراتقانى ءۇشىن جاۋاپكەرشىلىك قاراستىرىلعانىن ەسكەرتەمىن»، – دەپ اياقتادى ءسوزىن ول.