الداعى كۇندەرگە ارنالعان اۋا رايى بولجامى

اۋا رايى بولجامىمەن "قازگيدرومەت" رمك-نىڭ باسپا ءسوز حاتشىسى الينا يسماعۇلوۆا تانىستىردى.

"28-29 ساۋىردە اتموسفەرالىق فرونتالدى بولىكتەردىڭ اسەرىنەن قازاقستاننىڭ باسىم بولىگىندە جاڭبىر جاۋىپ، نايزاعاي وينايدى دەپ كۇتىلەدى، 28 ساۋىردە وڭتۇستىك، 29 ساۋىردە سولتۇستىك-باتىس جانە سولتۇستىك وڭىرلەردە قاتتى جاڭبىر جاۋادى، بۇرشاق جاۋۋى مۇمكىن. 29 ساۋىردە تۇندە رەسپۋبليكامىزدىڭ وڭتۇستىك-شىعىسىنداعى تاۋلى ايماقتاردا جاۋعان جاڭبىردىڭ ارتى قارعا ۇلاسادى. قازاقستان بويىنشا جەل كۇشەيىپ، وڭتۇستىك جانە وڭتۇستىك-باتىس وڭىرلەردە شاڭدى داۋىل سوعادى دەپ كۇتىلەدى"، - دەدى ول رەسپۋبليكالىق كوممۋنيكاسيالار ورتالىعىنداعى بريفينگ بارىسىندا.

تەمپەراتۋرالىق فونعا كەلەتىن بولساق، جالپى العاندا كۇندىز كۇن بىرتىندەپ جوعارىلايدى. 

"الايدا 27-28 ساۋىردە تۇندە ەلىمىزدىڭ سولتۇستىك جارتىسىندا سىناپ باعانى -1-8 گرادۋس سۋىقتى كورسەتەدى"، - دەيدى مامان.

سونداي-اق سينوپتيكتەر 2024 جىلعى 27 ساۋىرگە ارنالعان ءورت ءقاۋپى بولجامىمەن دە ءبولىستى.

"ماڭعىستاۋ وبلىسىنىڭ باسىم بولىگىندە، قىزىلوردا وبلىسىنىڭ ورتالىعى مەن وڭتۇستىگىندە جوعارى ءورت ءقاۋپى ساقتالادى. سونىمەن قاتار، تۇركىستان وبلىسىنىڭ سولتۇستىگىندە، اتىراۋ وبلىسىنىڭ وڭتۇستىگىندە دە ءورت ءقاۋپى كۇتىلەدى"، - دەدى الينا يسماعۇلوۆا.