الماتىلىقتار ىستىق سۋدىڭ ورنىنا كراننان سۋىق سۋ اعىپ جاتقانىنا نارازى
بۇل تۋرالى گاگارين كوشەسى، 167 ۇيدە تۇراتىن الماتىلىق الەۋمەتتىك جەلىدە جازدى.
ونىڭ ايتۋىنشا، قالادا جىلۋ بەرۋ توقتاعاننان بەرى كرانداعى ىستىق سۋ سالقىنداپ كەتكەن. مۇنداي پروبلەما مەگاپوليستىڭ ءارتۇرلى اۋدانىندا ورىن الدى.
وسى ماسەلەگە قاتىستى «الماتى جىلۋ جەلىلەرى» ج ش س جاۋاپ بەردى.
«جىلۋ بەرۋ ماۋسىمى اياقتالعان كەزدە جىل سايىن جوسپارلى جوندەۋ جۇمىستارى قولعا الىنادى. وسىعان وراي ىستىق سۋ تۇيىق سحەما بويىنشا ءبىر قۇبىر ارقىلى عانا بەرىلەدى (اينالىم جوق)، بۇل قۇبىرداعى سۋدىڭ سالقىنداۋىنا اكەلەدى»،- دەپ ءمالىم ەتتى ۆەدومستۆودان.
بۇدان بولەك، تەمپەراتۋرا تۇتىنۋشىلاردىڭ سۋدى اعىزۋىنا دا بايلانىستى.
«ىستىق سۋدى ءجيى اعىزباسا، سايكەسىنشە، ول قۇبىردا تۇرىپ سالقىندايدى. سوندىقتان جازدا ىستىق سۋمەن جابدىقتاۋدىڭ تۇراقتى تەمپەراتۋراسىن قامتاماسىز ەتۋ ءۇشىن قىزدىرۋ قوندىرعىسىن ورناتۋ مۇمكىندىگىن قاراستىرۋدى ۇسىنامىز. بۇل رەتتە «ىستىق سۋ» قىزمەتى ءۇشىن تولەم جاساۋ جالپى ءۇيدى ەسەپكە الۋ قۇرىلعىسىمەن ەسەپتەلەدى»، - دەپ ءتۇسىندىردى «الماتى جىلۋ جەلىلەرى» جشس-دان.