قازاقستان پرەزيدەنتى ريم پاپاسى فرانسينسكپەن كەلىسسوز جۇرگىزدى

كەزدەسۋ بارىسىندا قازاقستان مەن ۆاتيكان اراسىنداعى ىنتىماقتاستىقتى نىعايتۋدىڭ پەرسپەكتيۆالارى، سونداي-اق كونفەسسياارالىق كەلىسىم مەن ءدىنارالىق ديالوگتى ىلگەرىلەتۋ ماسەلەلەرى تالقىلاندى، دەپ حابارلايدى اlmaty-akshamy.kz

بيىل قىركۇيەك ايىندا ەلوردادا وتەتىن الەمدىك جانە ءداستۇرلى دىندەر كوشباسشىلارىنىڭ VII سەزىنىڭ كۇن تارتىبىنە باسا ءمان بەرىلدى. قاسىم-جومارت توقايەۆ بۇل فورۋمنىڭ قازاقستان ءۇشىن ماڭىزى زور ەكەنىن اتاپ ءوتتى.

پرەزيدەنت كونفەسسياارالىق كەلىسىم مەن بىرلىكتىڭ قازاقستاندىق مودەلى تۋرالى ايتتى. سونداي-اق مەملەكەت باسشىسى ريم پاپاسىنا قازاقستاندا جۇزەگە اسىرىلىپ جاتقان اۋقىمدى ساياسي جانە ەكونوميكالىق رەفورمالار جونىندە مالىمەت بەردى.

ريم پاپاسى كەزدەسۋگە مۇمكىندىك بەرگەنى ءۇشىن پرەزيدەنتكە ريزاشىلىعىن ءبىلدىرىپ، قازاقستانعا رەسمي ساپارمەن كەلەتىنىن، الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىساتىنىن راستادى. سونداي-اق ءوزىنىڭ قازاقستانعا ساپارى مەن الداعى ۋاقىتتا وتەتىن فورۋمنان ۇلكەن ءۇمىت كۇتەتىنىن جەتكىزدى.

– مەن ءدىنارالىق ديالوگتى، مەملەكەتتەردىڭ بىرلىگى مەن جاقىنداسۋىن ىلگەرىلەتۋ تۇرعىسىنان وسى كەلەلى جيىندى تاعاتسىزدانا كۇتەمىن. مۇنىڭ قازىرگى ۋاقىتتا ءمانى وتە زور، – دەدى كاتوليك شىركەۋىنىڭ باسشىسى. 

پونتيفيك قازىرگى كۇردەلى گەوساياسي جاعداي كەزىندە الەمدە بىرلىك پەن كەلىسىمگە قول جەتكىزۋدىڭ اسا ماڭىزدى ەكەنىن اتاپ ءوتتى.

– ءسىزدىڭ ەلىڭىزدىڭ قانشالىقتى ءارالۋان جانە تۇتاس ەكەنىن كورىپ وتىرمىز. بۇل – تۇراقتىلىقتىڭ نەگىزى. قازاقستاندا بۇعان تۇسىنىستىكپەن قارايتىنىنا قۋانىشتىمىز. مەنىڭ قولداۋىما سەنۋىڭىزگە بولادى. ءسىزدىڭ كۇش-جىگەرىڭىزدى باعالايمىن، – دەدى ريم پاپاسى.

اڭگىمەلەسۋ سوڭىندا قاسىم-جومارت توقايەۆ قازاقستاننىڭ قاسيەتتى تاقپەن رۋحاني كەلىسىم جانە ءوزارا قۇرمەت كورسەتۋ سالاسىنداعى ىنتىماقتاستىقتى ودان ءارى دامىتۋعا بەيىلدى ەكەنىن ناقتىلادى.