جارىلىس بولعان اۋماقتا جەدەل-تەرگەۋ توبى جۇمىستى اياقتادى
جاياۋ جۇرگىنشىلەرگە ارنالعان يستيكليال كوشەسىندە بولعان جارىلىس سالدارىنان 6 ادام قازا تاۋىپ، 81 ادام جاراقات الدى. توتەنشە وقيعا ورنىنا جەتكەن پوليسيا جاساقتارى كوشەدە قاۋىپسىزدىك شارالارىن قابىلدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
پوليسيا زارداپ شەككەندەردىڭ كەيبىرى جەتكىزىلگەن تاكسيم زەرتتەۋ جانە وقۋ اۋرۋحاناسى ماڭىندا قاۋىپسىزدىكتى كۇشەيتتى.
Anadolu اگەنتتىگىنىڭ مالىمەتىنشە، جارىلىس بولعان اۋماقتا جەدەل-تەرگەۋ توبى جۇمىستى اياقتادى. پوليسيا يستيكليال كوشەسى مەن تاكسيم الاڭىن كولىك پەن جاياۋ جۇرگىنشىلەر ءۇشىن جاپتى. تاكسيم دجۋمحۋريەت كوشەسىندەگى سيسلي-تارلاباشي باعىتىنداعى جەراستى وتكەلى مەن تاكسيم باعىتىنداعى ۋنكاپاني (اتاتۇرىك) كوپىرى دە كولىك قوزعالىسى ءۇشىن ۋاقىتشا جابىلدى.
يندونەزياعا ساپارىنىڭ الدىندا جينالىس وتكىزگەن پرەزيدەنت ەردوعان: «مۇمكىن بۇل تەرروريزم دەپ ايتقان دۇرىس ەمەس شىعار، ءبىراق گۋبەرناتوردىڭ بەرگەن وقيعا تۋرالى العاشقى اقپاراتتارى كۇدىگىمىزدى راستاي تۇسەدى»، - دەدى.
«قازىرگى ۋاقىتتا شابۋىلدى ايەل جاسادى دەگەن بولجام بار»، - دەدى تۇركيا پرەزيدەنتى.
ال ۆيسە-پرەزيدەنت فۋات وكتايدىڭ ايتۋىنشا، وسى ۋاقىتقا دەيىن 6 ادام قازا تاپتى، ونىڭ 4-ەۋى وقيعا ورنىندا قازا تاپسا، 81ء-ى جاراقات الدى. ولاردىڭ ەكەۋى - اۋىر حالدە.
وكتاي پرەزيدەنت ەردوعاننىڭ ءسوزىن قۋاتتاپ: «ءبىز ازىرگە جارىلىستى ايەل جاسادى دەگەن ويدامىز جانە تەررورلىق ارەكەت دەپ ەسەپتەيمىز»، - دەدى.
قازاقپاراتتىڭ ىستامبۇلداعى مەنشىكتى ءتىلشىسىنىڭ حابارلاۋىنشا، جارىلىس جەرگىلىكتى ۋاقىت بويىنشا 16:30-دا تاكسيمدەگى يستيقليال كوشەسىندە بولعان. بۇل - تۇنگى كلۋبتار مەن مەيرامحانالار بار، ادام ءنوپىرى كوپ ساۋدا ايماعى. ول «رەسپۋبليكا» مونۋمەنتى ورىن تەپكەن الاڭنىڭ اينالاسىندا ورنالاسقان. مۇندا جەرگىلىكتى تۇرعىندار مەن شەتەلدىك تۋريستەر ءجيى تابان تىرەيدى.
يستيكليالدىڭ باستى جاياۋ جۇرگىنشىلەر بولىگىندە 19-عاسىرداعى ايگىلى برەندتەردىڭ كينوتەاترلارى، كافەلەرى مەن دۇكەندەرى ورنالاسقان. مۇندا ەسكى قىزىل ترامۆايلار دا جۇرەدى.