ءورتتىڭ جالپى سانىنىڭ 21%-ى كوپ پاتەرلى ۇيلەردە بولادى
الماتىدا جىل باسىنان بەرى (11 قاراشاداعى جاعداي بويىنشا) تۇرعىن ءۇي سەكتورىندا 325 رەت ءورت شىقتى، دەپ حابارلايدى Almaty-akshamy.kz.
قالالىق توتەنشە جاعدايلار دەپارتامەنتىنىڭ مالىمەتىنشە، جالپى ءورتتىڭ 55%-ى تۇرعىن ءۇي سەكتورىندا بولادى.
«جىلىتۋ كەزەڭىندە مونشالار، سارايلار، ۋاقىتشا قۇرىلىمدار جانە ت.ب. ءجيى جانادى. ءورتتىڭ جالپى سانىنىڭ 21%-ى كوپ پاتەرلى ۇيلەردە بولادى. ءورتتىڭ شىعۋ سەبەپتەرى – ەلەكتر سىمدارىنىڭ قىسقا تۇيىقتالۋى جانە تۇرمىستىق تەحنيكانىڭ اقاۋلىعى، وتپەن ابايسىز ارەكەت ەتۋ. اتاپ ايتقاندا، جانىپ تۇرعان شامدى قاراۋسىز قالدىرۋ، بالكوندا تەمەكى شەگۋ، پەشتەردىڭ دۇرىس جۇمىس ىستەمەۋى (مۇرجانىڭ دۇرىس ورنالاستىرىلماۋى، پەشتىڭ جانعىش قۇرىلىس زاتتارىمەن سالىنۋى) بولىپ تابىلادى. مۇنداي ءورت قاۋىپسىزدىگىن بۇزۋ ق ر اقبتك-نىڭ 410-بابىنا سايكەس اكىمشىلىك جاۋاپكەرشىلىككە اكەلەتىنىن ەسكەرتەمىز»، - دەپ حابارلادى ۆەدومستۆودان.
وسى ورايدا، الماتىلىق قۇتقارۋشىلار تۇرعىنداردى ءورت قاۋىپسىزدىگىنەن حاباردار ەتۋدىڭ جاڭا ءادىسىن ويلاپ تاپتى. پيسساعا تاپسىرىس بەرگەن تۇرعىندارعا تاعاممەن بىرگە ءورت قاۋىپسىزدىگى تۋرالى جادنامالار دا جەتكىزىلەتىن بولادى. بۇل يدەيانى كۋرەرلىك كومپانيا دا قولداپ وتىر.
«ازىق-تۇلىكتەن باسقا، الماتىلىقتار كورنەكى ءتۇرلى-تۇستى بۋكلەتتەر الادى. جادنامالاردا قايعىلى جاعدايلارعا جول بەرمەۋگە بايلانىستى قىسقاشا ناقتى ۇسىنىستار جازىلىپ، بەينەلەنگەن. اتاپ ءوتۋ كەرەك، بۇل – جارناما ەمەس، بىرلەسكەن ءىس-شارا. بوستاندىق اۋدانىنىڭ وزىندە كۋرەرلەرگە تاراتۋ ءۇشىن 4 مىڭنان استام جادناما تابىستالدى»، - دەپ حابارلادى الماتى قالالىق تجد-نىڭ باسپا ءسوز قىزمەتى.