2025 جىلدىڭ 15–21 قىركۇيەگى ارالىعىندا كورىكتى الماتى قالاسىنىڭ تۋعان كۇنى كەڭ اۋقىمدا، دۋماندى شارالارعا تولى مەرەكەمەن اتالىپ ءوتتى.
اپتالىق مەرەكە بارىسىندا قالادا ءتۇرلى كونسەرتتەر، كورمەلەر، بايقاۋلار مەن ونەر فەستيۆالدەرى ۇيىمداستىرىلىپ، الماتىلىقتار مەن قالا قوناقتارىنا ەرەكشە كوڭىل-كۇي سىيلادى. وسى مادەني تولقىننىڭ ءبىر بولشەگىنە اينالعان ىقىلاس اتىنداعى حالىق مۋزىكالىق اسپاپتار مۋزەيى دە 19 قىركۇيەك كۇنى ەكى بىردەي تاعىلىمدى ءارى اسەرلى مادەني جوبامەن ەرەكشە كوزگە ءتۇستى.
ولاردىڭ ءبىرى – مۋزىكالىق تالانتتارعا ارنالعان اشىق الاڭ «Open stage» جوباسى بولسا، ەكىنشىسى – قازاقستان حالقى اسسامبلەياسىنىڭ قولداۋىمەن وتكەن «ءبىر قالا – ءبىر جۇرەك» اتتى مەرەكەلىك كونسەرتى.
كۇندىزگى ساعات 14:00-دە باستالعان «Open stage» جوباسى – كاسىبي ساحناعا العاش قادام باسقان ونەرپازدار ءۇشىن دە، مۋزىكاعا جانىمەن عاشىق اۋەسقويلار ءۇشىن دە تاپتىرماس مۇمكىندىككە اينالدى. بيىل بۇل باستاما مۋزەي ساحناسىندا قاتارىنان ءتورتىنشى رەت ۇيىمداستىرىلىپ وتىر. جوبانىڭ نەگىزگى ماقساتى – حالىقتىق جانە زاماناۋي مۋزىكالىق اسپاپتاردى ناسيحاتتاي وتىرىپ، قالا تۇرعىندارى مەن قوناقتارىنىڭ مۋزىكالىق ونەرگە دەگەن ىقىلاسىن وياتۋ، سونداي-اق كەز كەلگەن تالانت يەسىنە ۇلكەن ساحنادا ءوز ونەرىن پاش ەتۋگە جول اشۋ.
ساحنا تورىنە كاسىبي مۋزىكانتتارمەن قاتار، مۋزىكاعا حوببي رەتىندە قاراسا دا، جان-تانىمەن بەرىلگەن اۋەسقوي ورىنداۋشىلار دا شىعىپ، ءوز ونەرلەرىن ورتاعا سالدى. قاتىسۋشىلار دومبىرا مەن قوبىزدىڭ كۇمبىرىن، جەتىگەن مەن سازسىرنايدىڭ نازىك ءۇنىن كورەرمەنگە ەرەكشە ورىنداۋدا جەتكىزە الدى. سونىمەن قاتار، فورتەپيانو، سكريپكا، گيتارا سەكىلدى ءتۇرلى مۋزىكالىق اسپاپتاردا ورىندالعان اۋەندەر ۇلتتىق پەن زاماناۋيلىقتى ۇشتاستىردى. جاس ەرەكشەلىگىنە قاراماي، بارلىق قاتىسۋشىلار كورەرمەننىڭ ىستىق ىقىلاسىنا بولەنىپ، ءارقايسىسى ءوز ونەرىمەن ءتۇرلى جۇرەكتەرگە جول تاپتى. شارا سوڭىندا ونەرپازدارعا مۋزەي اتىنان العىس حاتتار مەن ەستەلىك سىيلىقتار تابىستالىپ، كورەرمەندەر تاراپىنان جىلى لەبىزدەر ءبىلدىرىلدى.
الايدا بۇل – مەرەكەلىك كۇننىڭ شارىقتاۋ شەگى عانا ەدى. كەشكى ساعات 19:00-دە شىمىلدىعى تۇرىلگەن «ءبىر قالا – ءبىر جۇرەك» كونسەرتى الماتىنىڭ مادەني بايلىعى مەن ەتنوستىق ءارالۋاندىعىن پاش ەتكەن شىنايى ونەر مەرەكەسىنە اينالدى. ءارتۇرلى ەتنومادەني بىرلەستىكتەردىڭ شىعارماشىلىق ۇجىمدارى ساحنا تورىندە ونەر كورسەتىپ، قازاقتىڭ ءداستۇرلى ان-كۇيلەرىمەن قاتار وزگە ۇلت وكىلدەرىنىڭ ۇلتتىق ءبيى مەن اۋەندەرىن تارتۋ ەتتى.
كەشتىڭ كوركىن قىزدىرعان گرۋزين حالقىنىڭ جالىندى ءبيى مەن ورىس حالىق اسپاپتارىندا ورىندالعان سىرلى اۋەندەر كوپشىلىكتىڭ ەسىندە ءبىراز ۋاقىتقا دەيىن ساقتالاتىنى ءسوزسىز. سونداي-اق تۇرىك، ۋكراين حالىقتارىنىڭ ىرعاقتى بيلەرى كوپشىلىك كوڭىلىنەن شىعىپ، كورەرمەندى ءبىر ساتكە وزگە ەلدەردىڭ مادەني كەڭىستىگىنە جەتەلەدى. ولاردىڭ ونەرىن ۇلتتىق فولكلورلىق انسامبل «پاراسات» جالعاستىرىپ، شەرتەر مەن جەتىگەن سىندى كونە اسپاپتاردا ورىندالعان قازاق كۇيلەرى ارقىلى تىڭدارماندى تەرەڭ ۇلتتىق رۋحپەن سۋسىنداتتى.
بۇل كەش – ءتۇرلى ۇلت وكىلدەرىنىڭ ونەر ارقىلى ۇندەسىپ، ءبىر شاڭىراق استىنداعى تاتۋلىق پەن دوستىقتى دارىپتەگەن شىنايى مادەني كەشىنە اينالدى. قوناقتار ۇلتتىق مۋزىكانىڭ اۋەزىنە بولەنىپ، ەتنوستاردىڭ مادەني الەمىنە جاقىننان ۇڭىلۋگە مۇمكىندىك الدى.
ىقىلاس اتىنداعى حالىق مۋزىكالىق اسپاپتار مۋزەيىنىڭ وسى قوس شاراسى تەك قالا كۇنىن اتاپ وتۋمەن شەكتەلىپ قالعان جوق. ول – ۇلتتىق ونەر مەن مادەنيەتتى دارىپتەۋدىڭ، رۋحاني مۇرامىزدى ۇلىقتاۋدىڭ جارقىن كورىنىسىنە اينالدى. ءبىر جاعىنان، شىعارماشىلىققا قۇشتار جاندارعا ەركىن ساحنالىق مۇمكىندىك بەرىلسە، ەكىنشى جاعىنان – ەتنومادەني بىرلىكتى، كوپۇلتتى ەلىمىزدىڭ تاتۋلىعىن ونەر تىلىمەن جەتكىزۋدىڭ ايقىن ۇلگىسى بولدى.
تاعى ءبىر ايتا كەتەرلىگى – وسىنداي مازمۇندى دا ماعىنالى ءىس-شارالاردى ۇيىمداستىرۋ، ونىڭ ءاربىر ساتىنە كوركەمدىك رەڭك بەرىپ، كوپشىلىككە اسەرلى تۇردە ۇسىنۋ – مۋزەي ۇجىمىنىڭ قاجىرلى ەڭبەگىنىڭ جەمىسى. شارانىڭ ءساتتى وتۋىنە اتسالىسقان مۋزەي قىزمەتكەرلەرىنىڭ شىنايى جاناشىرلىعى مەن كاسىبي شەبەرلىگىن اتاپ ءوتۋ – ورىندى ءارى ءادىل بولماق.
مۇراتوۆا ادەمى ەرىك قىزى،
ىقىلاس اتىنداعى حالىق مۋزىكالىق اسپاپتار
مۋزەيىنىڭ ەكسكۋرسيا جەتەكشىسى