جۋىردا ىشكى ىستەر مينيسترلىگىنىڭ م.ەسبولاتوۆ اتىنداعى الماتى اكادەمياسىندا حالىقارالىق تەرروريزمگە قارسى ەۋروپالىق وداقتىڭ LEICA جوباسىنىڭ دەلەگاسياسىمەن كەزدەسۋ ءوتتى.
جۇزدەسۋ بارىسىندا الماتى اكادەمياسىنىڭ باستىعى ا.سايتبەكوۆ ورتالىق ازيادا قۇقىق ءتارتىبىن قامتاماسىز ەتۋگە باعىتتالعان جوبا وكىلدەرىن ەلىمىزدىڭ ىشكى ىستەر ورگاندارىندا ءجۇرىپ جاتقان رەفورما بارىسىمەن جانە سوعان وراي اتالعان اكادەميادا قولعا الىنىپ جاتقان تابىستى جۇمىستارمەن تانىستىردى.
شەتەلدىك دەلەگاسيا اتىنان ءسوز العان فرانسيا ىشكى ىستەر مينيسترلىگىنىڭ ۇلتتىق پوليسيا اكادەمياسىنىڭ حالىقارالىق قاتىناستار جانە وقۋ ءىسى جونىندەگى ديرەكتورى لوران موسكاتەللو قازاقستاندىق ارىپتەستەرىنە ساتتىلىك تىلەپ، اتالعان جوبا اياسىندا ىنتىماقتاستىق ورناتۋعا ءازىر ەكەندىكتەرىن جەتكىزدى.
ەۋروپالىق دەلەگاسيا وكىلدەرىنە الماتى اكادەمياسى جايلى بەينەروليك پەن سلايد كورسەتىلدى. اكادەميا اۋماعىندا فرانسۋزداردىڭ پەتانك ويىنىن وينايتىن الاڭنىڭ اشىلۋ سالتاناتى قوناقتار ءۇشىن كۇتپەگەن توسىن سىي بولدى. ويىن الاڭىنىڭ لەنتاسىن اكادەميا باسشىسى ا.سايتبەكوۆپەن بىرگە فرانسيا ءىىم اكادەمياسىنىڭ حالىقارالىق قاتىناستار جانە وقۋ ءىسى جونىندەگى ديرەكتورى لوران موسكاتەللو جانە LEICA جوباسىنىڭ ديرەكتورى گەناەل لە برەتون قيدى.
كەزدەسۋ بارىسىندا الماتى اكادەمياسىنىڭ باسشىلىعى مەن جوبا وكىلدەرى ءوزارا ىنتىماقتاستىقتى دامىتۋ تۋرالى كەلىسسوزدەرگە قول قويدى.
شەتەلدىك مەيماندار ق ر ءىىم الماتى اكادەمياسىنىڭ اۋماعىنداعى گەنەرال ماقان ەسبولاتوۆتىڭ ەسكەرتكىشىنە گۇل شوقتارىن قويىپ، ب ا ق وكىلدەرىنە ارنالعان باسپا ءسوز ءماسليحاتىنا قاتىستى.