ىدىس-اياق الامىن دەپ 62 ملن تەڭگەدەن ايىرىلدى

100 مىڭ تەڭگەنىڭ تاۋارىن 5 مىڭ تەڭگەگە ۇسىنعان

ماڭعىستاۋلىق ساتۋشىدان 62 ميلليون تەڭگەگە ىدىس-اياق الامىن دەپ الدانىپ قالعان كوپشىلىكتەن مازا كەتتى، دەپ حابارلايدى Almaty-akshamy.kz Inbusiness.kz-كە سىلتەمە جاساپ.

ورال قالاسىنىڭ تۇرعىنى داناگۇل بەكەسوۆانىڭ ايتۋىنشا، ماڭعىستاۋلىق ايەل Whatsapp مەسسەندجەرىنەن توپ قۇرىپ، ىدىس-اياق پەن تەحنيكانى ساۋدالاعان. ال داناگۇل بولسا، سول توپتاعى ءتۇرلى تاۋاردى ءوز تانىستارىنا ۇسىنىپ، 2021 جىلدان بەرى 62 ميلليون تەڭگەگە تاپسىرىس بەرىپتى. جابىرلەنۋشىنىڭ سوزىنشە، باعالى ىدىس-اياق پەن تەحنيكالار ارزان باعادا جۇڭگو ەلىنەن جەتكىزىلەتىنىن ايتىپ سەندىرگەن. ءبىراق ءالى كۇنگە دەيىن بىردە ءبىر تاۋار جوق.

"ارزان تاۋارلار ەدى. سونى ساتۋ ءۇشىن تاپسىرىس بەرۋشىلەردى ءوز توبىما جينادىم. 100 مىڭ تەڭگەنىڭ تاۋارىن 5 مىڭ تەڭگەگە ۇسىندى. سونداي زاتتاردى 300-500 دانادان تاپسىرىس بەردىك. مەنىڭ جيناعان تاپسىرىسىم از سوما ەمەس، 62 ميلليون تەڭگە. ال مەنىڭ ارتىمدا ءبىراز ادام تۇر. ولاردىڭ ىشىندە وزىمە قول جۇمسايمىن دەپ جاتقاندار دا بار. بىزدەن تاپسىرىس قابىلداعان نۇرگۇل دەگەن ايەل ۋادەمەن تويدىرىپ كەلە جاتقانىنا دا ءبىر جىل بولدى"، - دەيدى داناگۇل بەكەسوۆا.

باعاسى ارزان، ساپاسى جاقسى تاۋار الامىن دەپ سان سوققاندار ەندى پوليسياعا ارىزدانباق.