الماتى قالاسىندا ىقىلاس اتىنداعى حالىق مۋزىكالىق اسپاپتار مۋزەيىندە ىقىلاس دۇكەن ۇلىنىڭ 180 جىلدىعىنا ارنالعان «ىقىلاستىڭ قارا قوبىزى» اتتى ءداستۇرلى مۋزىكالىق كەش ءوتىپ، قوبىزىنىڭ كوشىرمەسى مۋزەي قورىنا قابىلداندى.
مەرەيتويلىق مۋزىكا كەشىنە «سازگەن سازى» فولكلورلىق-ەتنوگرافيالىق ءانسامبلى، ك.ازىربايەۆ اتىنداعى جامبىل وبلىستىق فيلارمونياسىنىڭ قوبىزشىلارى راۋان ابلقاسوۆ جانە گۇلناز شابانبايەۆا، قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى مەن كۇلاش بايسەيىتوۆا اتىنداعى دارىندى بالالارعا ارنالعان مەكتەپ وقۋشىلارى قاتىستى. سونداي-اق، ىقىلاس دۇكەن ۇلىنىڭ ۇرپاعى، ق ر مادەنيەت سالاسىنىڭ ۇزدىگى اقنار ءتاتتىباي قىزى كەش جۇرگىزۋشىسى بولدى.
«بۇگىنگى كۇنى ىقىلاس دۇكەن ۇلىنىڭ قوبىزى جامبىل وبلىسىنداعى تاريحي ولكەتانۋ مۇراجايىندا ساقتاۋلى. ول 2008 جىلى مۇراجايعا تاپسىرىلعانعا دەيىن كۇيشى ۇرپاقتارىنىڭ قولىندا بولعان. تاراز قالاسىنىڭ وڭىرلىك شەبەرلەر قاۋىمداستىعىنىڭ جەتەكشىسى سەرىك بەكەتوۆ وسى قوبىزدىڭ رەستاۆراسياسىن جاساپ، سونىڭ كوشىرمەسىن بۇگىن ىقىلاس اتىنداعى حالىق مۋزىكالىق اسپاپتار مۋزەيىندە تاپسىردى»، – دەدى ىقىلاس دۇكەن ۇلىنىڭ ۇرپاعى اقنار ءتاتتىباي قىزى.
ايتا كەتكەن ءجون، ىقىلاس دۇكەن ۇلى – قازاق حالقىنىڭ داۋلەسكەر كۇيشى-قوبىزشىسى، قازاقتىڭ ۇلتتىق ىسپالى اسپاپتى مۋزىكاسىنىڭ كورنەكتى وكىلدەرىنىڭ ءبىرى. تۇلعاسى رۋحاني تاريحىمىزدىڭ تورىنەن ورىن العان، قورقىت بابادان كەيىنگى قوبىزعا ءتىل بىتىرگەن ادام. ول قوبىزدىڭ دىبىس-داۋىسىن ناق جانە ايقىن شىعۋىنا سەبەپكەر بولعان. 19 جاسىندا ىقىلاس ءوزىنىڭ ءبىرىنشى كۇيىن جازىپ، «ىقىلاس كۇيى» دەگەن اتاۋ بەرگەن. ول ءوزىنىڭ ەڭ اسىل ويلارىن قوبىزدىڭ ءۇن-دىبىسىنىڭ ىشەكتەرىنە سىڭىرىلگەن كۇيلەرمەن جەتكىزە بىلگەن.
ىقىلاستىڭ العاشقى ءبىرتۋما كۇيلەرى قازاق حالقىنىڭ مۋزىكالىق اۋىز ادەبيەتىمەن تىعىز بايلانىستى. ولار وزگە اسپاپتىق شىعارمالاردان شاپشاڭدىعىمەن جانە ىرعاق قۇرىلىسىمەن وزگەشەلەنەدى. سونىمەن قاتار، ولاردا تاقىرىپتىق كولەمىمەن وي-سانا مازمۇندارىنىڭ كوپقىرلىلىعى بايقالادى. ىقىلاس ەپوستىق-باتىرلىق تۇرعىداعى كۇيلەرىمەن قاتار فيلوسوفيالىق-ليريكالىق باعىتتاعى شىعارمالاردى دا ورىنداعان. ونىڭ «اققۋ»، «جەزكيىك»، «قامبار-نازىم»، «قاسقىر»، «كەرتولعاۋ»، «ەردەن» سىندى كۇيلەرى حالىق اراسىندا كەڭ تاراعان.
1990 جىلى الماتى قالاسىنداعى حالىق مۋزىكالىق اسپاپتار مۋزەيىنە داڭقتى قوبىزشىنىڭ ەسىمى بەرىلگەن.
