ق ر ۇقك الماتى قالاسى بويىنشا دەپارتامەنتىندە گەنەرال-مايور، ۇلتتىق قاۋىپسىزدىك كوميتەتىنىڭ ارداگەرى ەركىن مۋسابايەۆتىڭ «پاميات، گوۆوري...» اتتى كىتابىنىڭ تۇساۋكەسەرى بولدى.
كىتاپتا گەنەرال-مايوردىڭ ءومىرى جانە قىزمەت جولىندا باستان كەشكەن وقيعالارى باياندالعان. ەركىن مۋسابايەۆ ەلىمىزدىڭ قاۋىپسىزدىگىن قامتاماسىز ەتۋ ىسىنە سۇبەلى ۇلەس قوسقان جان. قاتارداعى جەدەل ۋاكىلدەن باستاپ، ارناۋلى قىزمەتتىڭ بارلىق ساتىسىنان ءوتىپ، ءبارىن ابىرويمەن اتقارعان. ۇلتتىق قاۋىپسىزدىكتى قامتاماسىز ەتۋ اتتى قاستەرلى ىسكە ەڭبەگى سىڭگەن قۇرمەتتى ارداگەر.
«ءبىزدىڭ اكەمىز زەينەت جاسىنا شىعار الدىندا ق ر ۇقك الماتى قالاسى بويىنشا دەپارتامەنتىندە جۇمىس اتقاردى. ونىڭ ءومىرى وتە ەرەكشە بولاتىن، انام ەكەۋى كوپتەگەن قالادا بىرگە قىزمەت اتقاردى. اكەم جاستايىنان تىڭباي ەڭبەك ەتتى. كسرو مقك-نىڭ ورتالىق اپپاراتىندا ءبولىم باستىعىنىڭ ورىنباسارى، وندىرىستىك قارسى بارلاۋ باسقارماسىنىڭ پارتيا ۇيىمىنىڭ حاتشىسى بولدى. قىزمەت جولىندا ەلىمىزدىڭ ءار ايماعىندا باسشى بولىپ جۇمىس ىستەدى. ءبىز اكەمىزدى ماقتان ەتەمىز. بۇل كىتاپتا اكەمنىڭ بالا كەزىنەن، ەسەيگەن، ەس كىرگەن ساتىنە دەيىنگى كەزەڭدەرى جازىلعان. سونداي-اق، وزىمەن بىرگە جۇمىس ىستەگەن قىزمەتتەستەرى جايلى باياندالادى»، – دەيدى قىزى راۋشان مۇسابايەۆا.
ال ۇلتتىق قاۋىپسىزدىك كوميتەتىنىڭ ارداگەرى، گەنەرال-مايور ماحامبەت مۋستافا: «ءبىز ەركىنمەن ۇزاق جىلدار بويى دوس بولدىق. كىتاپتى جازار الدىندا «مۇنىڭ پايداسى بىرەۋگە تيە مە، جاستارىمىز وسى كىتاپتى وقىعاندا رۋحتانىپ، جىگەرلەنە الا ما؟» دەپ كوپ ويلاندىق. اقىرى، وقىرمانداردىڭ جۇرەگىنە جەتەتىندەي جازۋعا تىرىستىق. ەركىننىڭ ەڭبەك جولى وتە قىزىق. ونىڭ وتباسىنداعى 4 قىزى ءار وڭىردە قىزمەتتە جۇرگەندە دۇنيەگە كەلدى. قاسىنداعى جارى وعان سەنىم ءبىلدىرىپ، ۇنەمى قولداۋ كورسەتتى. ەركىن وتە ەڭبەكقور، ادال، جۇرەگى كەڭ ادام. ءوزىن باستىقپىن دەپ مەنمەنسىگەنىن ەش ۋاقىتتا كورمەدىم. ونىڭ ءومىر جولى جاستارعا ۇلگى-ونەگە ەكەنىنە سەنىمدىمىن»، – دەيدى.