Times Higher Education (THE) الەمنىڭ ۇزدىك جوعارى وقۋ ورىندارىنىڭ جاڭارتىلعان ءتىزىمىن جاريالادى، وعان ءتورت قازاقستاندىق ۋنيۆەرسيتەت كىردى.
بيىل رەيتينگتە 115 ەلدەن 2000-نان استام وقۋ ورىندارىنىڭ اراسىندا 23 قازاقستاندىق جوو ۇسىنىلعان. بيىلعى ناتيجەلەر جوعارى ءبىلىم بەرۋدەگى ماڭىزدى وزگەرىستەر مەن تەندەنسيالاردى كورسەتەدى، دەپ حابارلايدى aqshamnews.kz عىلىم جانە جوعارى ءبىلىم مينيسترلىگىنە سىلتەمە جاساپ.
NU 501-600 ورىنعا جايعاسىپ، بىرنەشە قاتارعا كوتەرىلدى. ۋنيۆەرسيتەت اسىرەسە «ءبىلىم بەرۋ» ساناتىندا 251-300 دياپازونىندا ەرەكشەلەندى، بۇل ونىڭ وسى سالاداعى مۇعالىمدەردى دايارلاۋ مەن اكادەميالىق زەرتتەۋلەردەگى كوشباسشىلىعىن كورسەتەدى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ پوزيسياسى 1201-1500 دياپازونىندا. «وقىتۋ» جانە «حالىقارالىق كوزقاراس» ساناتتارىندا ايتارلىقتاي جاقسارتۋلار بايقالدى.
ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ پوزيسياسى 1501+ دياپازونىندا، «وقىتۋ» جانە «دايەكسوزدەر» ساناتتارى بويىنشا باعالاۋدا ازداعان وزگەرىستەر بولدى.
وتكەن جىلى 1501+ دياپازونىندا بولعان Satbayev University ءوز پوزيسياسىن ساقتاپ قالدى، الايدا «حالىقارالىق كوزقاراس» ساناتى بويىنشا كورسەتكىشتەردى جاقسارتتى.
ۋنيۆەرسيتەتتەردىڭ ەڭ بەدەلدى الەمدىك رەيتينگتەرىنىڭ ءبىرى بولىپ سانالاتىن THE رەيتينگى جوعارى وقۋ ورىندارىن ءتورت نەگىزگى ولشەم بويىنشا باعالايدى: ءبىلىم ساپاسى، عىلىمي زەرتتەۋلەر، دايەكسوز جانە حالىقارالىق ىنتىماقتاستىق.