مەملەكەت باسشىسى قاسىم-جومارت توقايەۆ حالىقارالىق ۆولونتەرلەر فورۋمىندا ۆولونتەرلەردى بۇگىنگى ادامزاتتىڭ ەليتاسىنا تەڭەدى، دەپ حابارلايدى Almaty-akshamy.kz.
«بۇل فورۋم بىرلەسكەن ارەكەتتەر ماڭىزدى ءرول وينايتىنىن كورسەتەدى. ءبىز الەمدە بۇرىن-سوڭدى بولماعان ءتۇرلى پروبلەمالارعا كەزدەسىپ وتىرمىز. سوندىقتان ءقازىر جارقىن بولاشاققا دەگەن ءۇمىتتى ءوشىرىپ الماۋ ءۇشىن ىمىراشىلدىق وتە قاجەت. مەن حالىقارالىق ۆولونتەرلىك باعدارلامالار ءتيىمدى ەكەنىنە جانە جەكە تۇلعالار اراسىنداعى ديپلوماتيانى ىلگەرىلەتۋگە مۇمكىندىك بەرەتىنىنە سەنىمدىمىن. ءوز ءومىرىن وزگەلەرگە ارناپ جۇرگەندەرگە، اسىرەسە مۇنى حالىقارالىق دەڭگەيدە ىستەپ جۇرگەندەرگە العىس بىلدىرگىم كەلەدى. ويتكەنى ولاردى ادامزاتتىڭ ەليتاسى، بەيبىتشىلىك پەن مەيىرىمىنىڭ ناعىز ەلشىلەرى دەپ ايتۋعا بولادى»، - دەدى قاسىم-جومارت توقايەۆ.
پرەزيدەنت ۆولونتەرلىك قىزمەتتى ەكولوگيالىق قۇندىلىقتاردى ىلگەرىلەتۋگە پايدالانۋعا بولاتىنىن اتاپ ءوتتى.
«بولاشاعىمىز باقۋاتتى بولۋ ءۇشىن بۇگىنگى ءار قادامىمىزدى دۇرىس باسۋىمىز كەرەك. سونداي-اق، ەكولوگيالىق تۇتىنۋ مادەنيەتىن ىلگەرىلەتۋ قاجەت. ول ءۇشىن بىزگە ادامداردىڭ ويلاۋ ءتاسىلىن، قورشاعان ورتانى قابىلداۋ مادەنيەتىن وزگەرتۋ قاجەت. سوندا عانا رەفورمالاردىڭ ناتيجەسى ورنىقتى ءارى قالتقىسىز بولادى. مەن ۆولونتەرلىك جەكە ادامداردىڭ ۇلگىسى نەگىزىندە قالىپتاساتىنىنا سەنەمىن. بىزگە جاۋاپتى ازاماتتىق جانە پاتريوتيزم ۇعىمدارىنىڭ نەگىزىندە دامۋدىڭ جاڭا پاراديگمالارىن قالىپتاستىرۋ كەرەك. ەلىمىزدە ۆولونتەرلىك قىزمەتتىڭ كەڭىنەن تاراۋىنا قاجەتتى جاعدايدىڭ ءبارىن جاسايمىز»، - دەدى مەملەكەت باسشىسى.