بۇل - سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ پىكىرى.
ونىڭ ايتۋىنشا، قىتايمەن ۆيزاسىز رەجيمگە قاتىستى تاراعان پىكىر قاتە، دەپ حابارلايدى Almaty-akshamy.kz
ۆيزاسىز رەجيم قاي ەلدە بولسىن شەتەلدەن كەلەتىن تۋريستەردىڭ سانىن ارتتىرۋعا باعىتتالعان.
قازاقستان مەن جۇڭگو اراسىنداعى قاتىناستى جاڭا دەڭگەيگە شىعاراتىن قۇجاتقا قول قويۋعا قارسى ءبىر توپ بەلسەندى قالىڭ جۇرتشىلىققا قاتە اقپارات تاراتىپ جاتىر.
ونىڭ ايتۋىنشا، بۇل كەلىسىم ەكى ەل اراسىنداعى قارىم-قاتىناستاردىڭ دامۋىنا، ازاماتتار اراسىنداعى بايلانىستارعا، ساۋدا-ساتتىقتى كەڭەيتۋگە ايتارلىقتاي قولداۋ بولادى. سونداي-اق ول قازىرگى گەوساياسي جاعدايدا قازاقستان ءۇشىن نەعۇرلىم كوپ ەلدەرمەن تىعىز قارىم-قاتىناس ورناتۋ ۇتىمدى ەكەنىن جەتكىزدى.
- الايدا الەۋمەتتىك جەلىلەردە قازاقستان مەن جۇڭگو اراسىنداعى قاتىناستى جاڭا دەڭگەيگە شىعاراتىن قۇجاتقا قول قويۋعا قارسى ءبىر توپ بەلسەندى قالىڭ جۇرتشىلىققا قاتە اقپارات تاراتىپ جاتىر، – دەپ جازدى ايبەك سمادياروۆ.
اتالعان جاعدايعا بايلانىستى سىرتقى ىستەر مينيسترلىگىنىڭ رەسمي وكىلى كەلىسىمگە قاتىستى قوسىمشا اقپارات بەرۋدى ءجون كوردى.
بۇل كەلىسىمگە قول قويساق، جۇڭگو ازاماتتارى ەلىمىزگە قاپتاپ كىرەدى دەگەن پىكىر شىندىققا جاناسپايدى. سەبەبى بىلتىر شىلدە ايىنان باستاپ قازاقستان يران، ءۇندىستان جانە قىتايدىڭ ازاماتتارىنا ەلگە 14 كۇنگە دەيىن ۆيزاسىز كىرۋگە رۇقسات بەرگەن. وزدەرىڭىز كورىپ وتىرعانداي، اتالعان ەلدەردىڭ، اسىرەسە جۇڭگو ازاماتتارىنىڭ ءبىزدىڭ كوشەلەردە قاپتاپ جۇرگەنىن كورىپ وتىرعان جوقپىز. بۇل شارا رەسپۋبليكامىزدىڭ ينۆەستيسيالىق كليماتىن جانە تۋريستىك الەۋەتىن ارتتىرۋ، سونداي-اق ىسكەرلىك بايلانىستاردى دامىتۋ ءۇشىن جاسالعان. ەكونوميكالىق تۇرعىدان بۇل باستاما ءوزىنىڭ وڭ ناتيجەسىن بەرىپ جاتىر.
ەلىمىز بەن جۇڭگو اراسىنداعى ۆيزاسىز رەجيم، ەڭ الدىمەن، قازاقستان ازاماتتارىنىڭ كورشى مەملەكەتكە بارۋىنا بارىنشا قولايلى جاعداي تۋدىرادى. ەگەر بۇرىن تەك جۇڭگو ازاماتتارى بىزگە ۆيزاسىز 14 كۇنگە كىرە الاتىن بولسا، بۇل كەلىسىمنەن كەيىن ولار دا، ءبىز دە بىر-بىرىمىزگە 30 كۇنگە دەيىن ۆيزاسىز بارا الاتىن بولامىز. مىسالى، قازاقستان ازاماتتارى بۇگىندە ۆيزاسىز، لەزدە تۇركيا مەن بىرىككەن اراب امىرلىكتەرىنە قىدىرىپ بارىپ قايتىپ جاتىر. ەندى ءدال سولاي قىتايعا دا ءبىر عانا پاسپورتپەن بارىپ كەلۋگە بولادى.
«ۆيزاسىز قازاقستانعا كەلگەن جۇڭگو ازاماتتارى ەلىمىزدە قالىپ قويادى، جۇمىس ورىندارىمىزدى تارتىپ الادى دەگەن پىكىرلەر جاڭساق. ويتكەنى ۆيزاسىز رەجيم تەك تۋريستىك جانە ىسكەرلىك ساپارلارعا ارنالادى جانە جۇمىس ىستەۋگە رۇقسات بەرمەيدى. قىزمەت ەتۋگە بولەك ارنايى جۇمىس ۆيزاسىن الدىن الا راسىمدەۋ قاجەت. بۇرىن قىتايعا بارۋ ءۇشىن ۆيزانى اشۋ، كونسۋلدىق الىمدى تولەۋ، ۇزاق كەزەكتە تۇرۋ (كەيدە 2-3 ايعا دەيىن)، ۆيزا راسىمدەيتىن ارنايى كومپانيالاردىڭ قىزمەتىنە قوماقتى اقشا تولەۋ كەرەك ەدى. ال ۆيزاسىز رەجيم ەنگىزىلگەننەن كەيىن بۇل شارالاردىڭ ەشبىرى قاجەت بولمايدى. ۆيزاسىز رەجيم قاي ەلدە بولسىن شەتەلدەن كەلەتىن تۋريستەردىڭ سانىن ارتتىرۋعا باعىتتالعان. بۇل ەكونوميكاعا وڭ اسەر ەتەدى. ويتكەنى ەلگە كەلگەن تۋريست مىندەتتى تۇردە قوناق ۇيدە تۇرادى، ءدامحانا مەن مەيرامحانالاردا تاماقتانادى، كولىك قولدانادى، جالپى ايتقاندا ەلدە ءبىراز اقشا جۇمسايدى. ال قىتايلىق تۋريستەر الەمدە قالتالى تۋريستەر سانىنا جاتادى. قورىتا كەلگەندە، ۆيزاسىز رەجيمنەن ءقاۋىپ جوق. ءبىز بۇدان پايدا كورمەسەك، ۇتىلمايتىنىمىز انىق. الەمنىڭ ەكىنشى ەكونوميكاسى سانالاتىن قىتايمەن ءوزارا ءتيىمدى ساياساتتى جۇرگىزۋ ەلىمىزدىڭ ۇلتتىق مۇددەسىنە تولىق ساي كەلەدى»، – دەپ تۇيىندەدى ءسوزىن رەسمي وكىل.