ۆيزاسىز رەجيم ءتۋريزمنىڭ دامۋىنا وڭ ىقپال ەتەدى

جۇڭگو ەلىمەن ارادا 30 كۇن ۆيزاسىز رەجيم ەنگىزۋدىڭ ءتيىمدى تۇستارى بارشىلىق. 

 شىعىس قازاقستانداعى تۋريستىك قاۋىمداستىق وكىلدەرىنىڭ ويلارى وسىعان سايادى. سوندىقتان ولار العاشقىلاردىڭ ءبىرى بولىپ اتالعان جوبانى باستاۋعا ۇسىنىس بىلدىرگەن، دەپ حابارلايدى Almaty-akshamy.kz.

24.kz اقپاراتىنا سۇيەنسەك، بۇل شەشىم بىردەن قابىلدانعان  جوق، وتكەن جىلى  سىناق تۇرىندە جۇرگىزىلدى. سول كەزدە كورشى ەلدەن كەلگەن تۋريستەرگە ەكى اپتالىق ۋاقىتتىڭ تىم تار ەكەنى انىقتالدى. جولدى ەسەپتەمەگەننىڭ وزىندە، تۋريستىك ورىنداردى تولىق ارالاپ ۇلگەرمەيدى. ماسەلەن، قاتونقاراعاي نەمەسە بۇقتىرماعا جەتۋ ءۇشىن ولار الدىمەن استانا نە الماتىعا كەلىپ، سودان سوڭ وسكەمەنگە توقتاۋ كەرەك. بۇنىڭ بارلىعى ۆيزا مەرزىمىن ازايتا تۇسەدى.

«شىنى كەرەك، ەگەر تۋريست باتىس، وڭتۇستىك نەمەسە وسى شىعىس قازاقستانعا كەلۋدى جوسپارلاسا، وعان ەكى اپتا جەتپەيدى. جول الىستىعىن بىلاي قويعاندا، ونىڭ جوسپارى وزگەرۋى مۇمكىن عوي. 14 كۇن تىم تىعىز. ءبىز تالقىلاپ جاتقان وتىز كۇندىك ۆيزاسىز رەجيمنىڭ تيىمدىلىگىن تۇركيا دا، اراب امىرلىگى دە، تايلاند تا ءبىلىپ وتىر»، - دەيدى شقو تۋريستىك قاۋىمداستىق ءتوراعاسى اسقار ورازبايەۆ.