جارىس بۋراباي دەمالىس ايماعىندا ءوتتى
ماۋسىمنىڭ 22ء-سى مەن 25ء-ى ارالىعىندا بۋراباي دەمالىس ايماعىندا تاس جولداعى ۆەلوسپورتتان ەل چەمپيوناتى ءوتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
مۇندا ەلىمىزدىڭ ەڭ مىقتى دەگەن شاباندوزدارى توپتىق جانە جەكەلەي جارىستار بويىنشا قازاقستان چەمپيونى اتاعى ءۇشىن تالاسقا ءتۇستى.
جارىستىڭ سوڭعى كۇنى Astana Qazaqstan Development Team جاستار قۇراما كومانداسىنىڭ شاباندوزى، الەكساندر ۆينوكۋروۆتىڭ ۇلى نيكوليا ۆينوكۋروۆ تاس جولداعى ۆەلوسپورتتان 23 جاسقا دەيىنگى شاباندوزدار اراسىندا وتكەن قازاقستان چەمپيوناتىنىڭ جەڭىمپازى اتاندى. جارىس بۋراباي دەمالىس ايماعىندا ءوتتى. نيكوليا 157،5 شاقىرىمدىق قاشىقتىقتى 3 ساعات 44 مينۋت 16 سەكۋندتا ءجۇرىپ ءوتتى. يلحان دوستييەۆ (+00:39) مىرەگە ەكىنشى، وركەن سلامجانوۆ (+00:58) ءۇشىنشى بولىپ مارەگە كەلدى.
«تاڭەرتەڭگىسىن جەڭىسكە جەتەم دەگەن ماقساتپەن وياندىم. مەنى ەكىنشى نەمەسە ءۇشىنشى ورىندار قىزىقتىرعان جوق. تەك جەڭىسكە جەتۋگە بەل بايلادىم. جارىس باستالعاندا كوشباسشىلار تىم الىسقا ۇزاپ كەتپەۋ ءۇشىن ولاردى باقىلاۋدا ۇستاۋ كەرەك بولدى. ءبىزدىڭ سولتۇستىك قازاقستان وبلىسى ەكىنشى اينالىمدا باسىمدىقتى جاقسى ساقتاپ قالدى. شابۋىل باستالعاندا مەن ءبىرىنشى توپقا قوسىلدىم. كۇنى بويى ءوزىمدى جاقسى سەزىندىم. مارەگە جەتى شاقىرىم قالعاندا سوڭعى اينالىمدا الدىڭعى قاتاردا جالعىز ەكەنىمدى بىلگەندە، مارەگە دەيىن سوڭعى 1،5 شاقىرىم بويى جوعارى قارقىنمەن ءجۇردىم. گلەب وتە جاقسى شابۋىل جاسادى. ءبىراق، وكىنىشكە وراي، باسقا شاباندوزدار ونى قۋىپ جەتىپ، مارەگە ءۇشىنشى بولىپ كەلدى. الەكساندر سەمەنوۆ تە وتە مىقتى بولدى. كوماندا بولىپ جۇمىس ىستەگەنىمىزگە جانە جەڭىسكە جەتكەنىمە وتە قۋانىشتىمىن»، - دەدى نيكوليا ۆينوكۋروۆ قازاقستان ۆەلوسپورت فەدەراسياسىنىڭ باسپا ءسوز قىزمەتىنە بەرگەن سۇحباتىندا.
سونىمەن قاتار Astana Qazaqstan Team شاباندوزى ەۆگەنيي گيديچ قازاقستان چەمپيوناتىنىڭ توپتىق جارىسىندا جەڭىسكە جەتتى. گيديچ 157،5 شاقىرىمدىق قاشىقتىقتى 3 ساعات 43 مينۋت 48 سەكۋندتا باعىندىردى. قالعان جۇلدەلى ورىنداردى دا استانالىق شاباندوزدار يەلەندى. ارتەم زاحاروۆ مارەگە ەكىنشى بولىپ كەلدى. ول جەڭىمپازدان ءبىر سەكۋندقا عانا قالىپ قويدى. ال گلەب برۋسەنسكيي چەمپيوننان ەكى سەكۋندقا ارتتا قالىپ، قولا جۇلدەگە يە بولدى.