ليتۆا ۇلتتىق كىتاپحاناسىندا ليتۆا تىلىنە اۋدارىلعان «قازاقستان تاريحى» كىتابىنىڭ تۇساۋكەسەرى ءوتتى
بۇل تۋرالى ق ر سىرتقى ىستەر مينيسترلىگىنەن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستان تاۋەلسىزدىگىنىڭ 30 جىلدىعىنا ارنالعان ءىس-شاراعا سەيمنىڭ دەپۋتاتتارى، سىرتقى ىستەر مينيسترلىگىنىڭ، ىسكەرلىك جانە اكادەميالىق ورتا وكىلدەرى، قازاقستاننىڭ قۇرمەتتى كونسۋلدارى، مادەنيەت قايراتكەرلەرى مەن قازاقستاندىق ستۋدەنتتەر قاتىستى. كىتاپتان ليتۆالىق وقىرمان قازاق حالقىنىڭ ەجەلگى داۋىردەن بۇگىنگى كۇنگە دەيىنگى تاريحى، سونداي-اق بوستاندىق پەن تاۋەلسىزدىك ءۇشىن كۇرەسى تۋرالى بىلە الادى. ق ر ەلشىسى ۆيكتور تەمىربايەۆ بۇل ءىس-شارا قازاقستان-ليتۆا مادەني قاتىناستارىنداعى ماڭىزدى وقيعا ەكەنىن اتاپ ءوتتى.
ديپلومات قوناقتاردى قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ ارقاسىندا قول جەتكىزىلگەن ەلىمىزدىڭ ءۇش ونجىلدىقتاعى تابىستارىمەن تانىستىرىپ، قازىرگى تاڭدا بۇل باعىتتى مەملەكەت باسشىسى قاسىم-جومارت توقايەۆ جۇرگىزىپ كەلە جاتقانىن اتاپ ءوتتى.
كىتاپ اۆتورى، ق ر ءبىلىم جانە عىلىم مينيسترلىگى مەملەكەت تاريحى ينستيتۋتىنىڭ ديرەكتورى ەركىن ءابىل ءوزىنىڭ بەينەۇندەۋىندە بۇل باسىلىمنىڭ نەگىزگى ماقساتى - وقىرماندى ۇلى دالا وركەنيەتىنىڭ تاريحىمەن تانىستىرۋ ەكەنىن اتاپ ءوتتى. ونىڭ ايتۋىنشا، سوڭعى جىلدارى رەسپۋبليكا باسشىلىعى قازاقستان تاريحىنىڭ اسپەكتىلەرىن عىلىمي تۇرعىدان زەرتتەۋگە كوپ كوڭىل ءبولىپ كەلەدى.
قازاقستان ەلشىلىگى «جارا» باسپا ۇيىنە جانە ونىڭ باسشىسىنا كىتاپتى ليتۆا تىلىنە اۋدارۋعا جانە ونى باسىپ شىعارۋعا كومەك كورسەتكەنى ءۇشىن العىس ءبىلدىردى. كىتاپ ليتۆانىڭ جەتەكشى ۋنيۆەرسيتەتتەرىنىڭ كىتاپحانا قورلارىنا جانە ۆيلنيۋس، كلايپەدا جانە كاۋناس ورتالىق قالالىق كىتاپحانالارىنا جىبەرىلەدى. مارتيناس ماجۆيداس اتىنداعى ليتۆا ۇلتتىق كىتاپحاناسى - ليتۆاداعى ەڭ ءىرى عىلىمي كىتاپحانا، ليتۆا جانە شەتەلدىك قۇجاتتاردىڭ مەملەكەتتىك قويماسى. پارلامەنتتىك كىتاپحانا، ەۋروپالىق وداقتىڭ، دۇنيەجۇزىلىك بانكتىڭ، ماگاتە-نىڭ جانە باسقا دا ءبىرقاتار حالىقارالىق ۇيىمداردىڭ دەپوزيتتىك كىتاپحاناسى قىزمەتىن اتقارادى.
