كودەكس سۋ رەسۋرستارىنىڭ تاپشىلىعىن ازايتۋعا سەپتىگىن تيگىزۋى كەرەك.
ق ر پرەزيدەنتى قاسىم-جومارت توقايەۆ ۇكىمەتكە كليماتتىڭ وزگەرۋى مەن شەكارالاس ەلدەردىڭ ساياساتىن ەسكەرەتىن جاڭا سۋ كودەكسىن ازىرلەۋدى تاپسىردى، دەپ حابارلايدى Almaty-akshamy.kz قازاقپارات cىلتەمە جاساپ.
«2003 جىلى قابىلدانعان سۋ كودەكسى سۋدى شارۋاشىلىق ماقساتقا پايدالانۋ ءتارتىبىن عانا رەتتەيدى. بۇل قۇجات سۋ رەسۋرستارىن ساقتاۋعا جانە ونى ءتيىمدى پايدالانۋعا مۇمكىندىك بەرمەيدى. اۋا رايىنىڭ وزگەرۋى سۋ سالاسىندا قوردالانعان ماسەلەلەر ءقازىردىڭ وزىندە ەلىمىزدىڭ الەۋمەتتىك-ەكونوميكالىق دامۋىن تەجەيتىن كەدەرگىگە اينالىپ وتىر»، - دەدى مەملەكەت باسشىسى.
پرەزيدەنت بۇل ماسەلەنى زاڭنامانى جاڭارتۋ ارقىلى شەشۋگە بولاتىنىن جەتكىزدى.
«ۇكىمەتكە ساراپشىلارمەن بىرلەسىپ، جاڭا سۋ كودەكسىنىڭ جوباسىن ازىرلەۋدى تاپسىرامىن. كودەكس كليماتتىڭ وزگەرۋىن جانە شەكارالاس ەلدەردىڭ ساياساتىن ەسكەرە وتىرىپ سۋ رەسۋرستارىنىڭ تاپشىلىعىن ازايتۋعا سەپتىگىن تيگىزۋى كەرەك»، - دەدى قاسىم-جومارت توقايەۆ.