بۇگىن ۇكىمەت وتىرىسىندا 2025 جىلعى قاڭتار-ماۋسىمعا الەۋمەتتىك-ەكونوميكالىق دامۋ جانە رەسپۋبليكالىق بيۋدجەتتىڭ اتقارىلۋ قورىتىندىلارى قارالدى. پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين جىل باسىنان بەرى قازاقستان ەكونوميكاسى 6،2%-عا وسكەنىن ايتتى. قارجى، بيرجا، ماكروەكونوميكا ساراپشىسى، ەكونوميست ايبار ولجاي ۇكىمەت جۇمىسىنا باعا بەردى، - دەپ حابارلايدى اqshamnews.kz ءتىلشىسى.
ساراپشىنىڭ ايتۋىنشا، قازاقستان ۇكىمەتى 2025 جىلى فەنومەنالدى جۇمىس ناتيجەسىن كورسەتە ءبىلدى.
"ءبىز تۇڭعىش رەت مۇناي باعاسى وسپەگەن ۋاقىتتا ىشكى جالپى ءونىمنىڭ 6،2 پايىزعا ءوسۋىن تىركەپ وتىرمىز. سەبەبى ءدال وسىلاي وسكەن 2011 جىلمەن سالىستىرساق، 13 جىل بۇرىن بىزگە قارا التىن باعاسىنىڭ شارىقتاۋى كومەكتەسكەن ەدى. ءۇشىنشى توقساندا تۋرا وسى قارقىندى ساقتاي الساق، وندا 2025 جىلى قازاق ەكونوميكاسى 300 ميلليارد دوللاردان اساتىن بولادى. اقىرىنداپ ۆەتناممەن يىق تىرەسەتىن جاعدايعا جەتەمىز. ونىمەن قوسا، رەسەي ەكونوميكاسىمەن 10 ەسە الشاقتىعىمىز ەداۋىر قىسقارىپ، ەندى ءبىز رەسەيدەن ەكونوميكا كولەمى بويىنشا باياعىداي 10 ەمەس، 7 ەسە از بولىپ تۇرمىز"، - دەيدى ول.
ايبار ولجاي بيىل ەكونوميكا سان بويىنشا ەمەس، ساپا بويىنشا وسكەنىن ايتتى.
"ءوسىم كولىك پەن لوگيستيكا (22،7%)، قۇرىلىس (18،4%)، تاۋ-كەن ونەركاسىبى جانە ساۋدا (8،4%)، وڭدەۋ ونەركاسىبى (5،5%) ارقىلى كەلدى. قازاق ەلى شىن مانىندە يندۋستريالانۋدا. ەكونوميكا قۇرىلىمىنداعى وڭدەۋ ونەركاسىبىنىڭ ۇلەسى 2024 جىلى 12،2%-عا دەيىن ۇلعايىپ كەتكەن. بۇرىن ديۆەرسيفيكاسيا ءبىز ءۇشىن قاعازعا جازىلعان كۇردەلى ءسوز بولسا، ەندى جاڭا فورماتتاعى مەنەدجەر ولجاس بەكتەنوۆ ءىس جۇزىندە ديۆەرسيفيكاسيانىڭ قالاي بولاتىنىن كورسەتتى. بۇل تەك باسى. ەندى بەكتەنوۆتىڭ سەنىمدى سەرىگى سەرىك جۇمانعارين جاقىن ارادا قازاق ەلىنە ەكونوميكانى ءتيىمدى ءوسىرۋ باعدارلاماسىن جاريالاماق. ونىڭ نەگىزگى پارامەترلەرى دايىن. باعدارلاما بويىنشا قازاقستان وپتيمالدى ارەكەت ەتەتىن بولادى. ياعني كاپيتال وڭدەۋ، تاۋ-كەن ونەركاسىبى، اگروونەركاسىپتىك كەشەن جانە ينفراقۇرىلىم سياقتى ەڭ پەرسپەكتيۆالى سالالارعا نىسانالى دالدىكپەن باعىتتالماق"، - دەيدى ول.
مەملەكەتتىڭ عانا ەمەس، ولجاس بەكتەنوۆتىڭ دە ىشكى ترانسفورماسياسى بايقالدى.
"ول ءبىرىنشى رەت جۋرناليستەر الدىنا ەركىن شىعىپ، اۋقىمدى باسپا ءسوز كونفەرەنسياسىن بەردى. ەشبىر سۇراقتان قاشپادى. بارىنە جاۋاپ بەردى. قيىن سۇراقتار اراسىندا باعا، تاريف، جۇمىسپەن قامتۋ سياقتى تاقىرىپتار بار ەدى. قوعاممەن ديالوگ تەك جەتىستىكتەردى ايتۋمەن عانا شەكتەلمەيدى. ول شەشۋدى قاجەت ەتەتىن نازىك ماسەلەلەردى اشىق تالقىلاۋمەن باعالانادى. مۇنداي ءوزارا ارەكەت ەتۋ ءستيلى سەنىمدى نىعايتىپ، جالعان اقپارات تاراتۋ ءقاۋپىن ازايتادى. ەكونوميكانىڭ وسۋىمەن قاتار، اباي ۇلى دا ساياساتكەر رەتىندە جاقسى ءوسىپ كەلەدى. ونىمەن ەشكىمنىڭ تالاسا المايتىنى حاق. ۇكىمەت باسشىسى ەكونوميكانى دامىتۋ بويىنشا مەملەكەت باسشىسىنىڭ تاپسىرماسىن تولىق جانە ساپالى ورىنداپ جاتىر"، - دەپ قورىتىندىلادى ول.