قازاقستاندىق لوۋكوستەر FlyArystan بۇگىن اتىراۋ – تاشكەنت – اتىراۋ باعىتى بويىنشا العاشقى حالىقارالىق رەيسىن ءساتتى ورىندادى.
FS7835 رەيسى حيۋاز دوسپانوۆا اتىنداعى حالىقارالىق اۋەجايىنان ۇشىپ شىعىپ، وزبەكستان استاناسىنداعى يسلام كاريموۆ اتىنداعى حالىقارالىق اۋەجايىنا ءساتتى قوندى. ۇشاق اۆياسيادا جاڭا باعىتتىڭ اشىلۋىن بىلدىرەتىن ءراسىم – ءداستۇرلى سۋ بۇرقاعىمەن سالتاناتتى تۇردە قارسى الىندى. تاشكەنتتەن قايتىپ كەلگەن ۇشاقتى، ياعني FS7836 رەيسىن اتىراۋدا ءدال وسىنداي قارسى الۋ راسىمىمەن كۇتىپ الۋ جوسپارلانعان.
العاشقى رەيستىڭ اشىلۋ سالتاناتىنا اۋەكومپانياسى مەن اۋەجايدىڭ باسشىلىعى، سونداي-اق جەرگىلىكتى اتقارۋشى ورگانداردىڭ وكىلدەرى قاتىستى.
"بۇل رەيستىڭ ىسكە قوسىلۋى FlyArystan-نىڭ حالىقارالىق باعىتتار جەلىسىن كەڭەيتۋ جولىنداعى ماڭىزدى قادام رەتىندە قازاقستان مەن وزبەكستان اراسىنداعى كولىك قولجەتىمدىلىگىن ارتتىرۋعا سەپتىگىن تيگىزەدى. FlyArystan-نىڭ استانا – تاشكەنت باعىتىنداعى رەيسىنە قوسا، بۇل جاڭا باعىت قازاقستاننىڭ باتىس وڭىرىنەن وزبەكستانعا تىكەلەي اۋە قاتىناسىن قامتاماسىز ەتەدى. بۇل ءوز كەزەگىندە ەكى ەل اراسىنداعى ىسكەرلىك، مادەني جانە تۋريستىك بايلانىستاردىڭ ودان ءارى دامۋىنا مۇمكىندىك بەرەدى"، - دەدى "FlyArystan" اق پرەزيدەنتى ريچارد لەدجەر.
سالتاناتتى شارا اياسىندا اۋەجايدىڭ ۇشۋ زالىندا مەرەكەلىك بەزەندىرۋ، فوتوايماق، لەنتا قيۋ ءراسىمى جانە جولاۋشىلارعا سىيلىقتار ۇيىمداستىرىلدى.
:"تاشكەنتكە تىكەلەي جاڭا حالىقارالىق رەيستىڭ اشىلۋى – ءبىزدىڭ اۋەجايمەن قاتار بۇكىل ءوڭىر ءۇشىن دە ماڭىزدى وقيعا. بۇل رەيستىڭ ىسكە قوسىلۋى جولاۋشىلار اعىنىنىڭ ارتۋىنا، اۋەجايدىڭ ترانزيتتىك تارتىمدىلىعىنىڭ جوعارىلاۋىنا جانە اتىراۋدان ورىندالاتىن باعىتتاردىڭ گەوگرافياسىنىڭ كەڭەيۋىنە ىقپال ەتەدى دەپ كۇتەمىز"، - دەدى "اتما – اتىراۋ اۋەجايى جانە تاسىمالدار" اق كوممەرسيالىق ديرەكتورى ۆلاديمير پاحوموۆ.
اتىراۋ – تاشكەنت – اتىراۋ باعىتى ەكى قالا اراسىنداعى العاشقى تۇراقتى تىكەلەي رەيس بولدى. رەيستەر شىلدە جانە تامىز ايلارىندا – بەيسەنبى مەن جەكسەنبى كۇندەرى، ال قىركۇيەك پەن قازان ايلارىندا – دۇيسەنبى، سارسەنبى جانە جۇما كۇندەرى ورىندالادى. ۇشۋ ۋاقىتى - 2 ساعات 20 مينۋت.
FlyArystan — Air Astana توبىنىڭ 100% ەنشىلەس كومپانياسى بولىپ تابىلاتىن قازاقستاندىق لوۋكوستەر. ول ءوز قىزمەتىن 2019 جىلدىڭ مامىر ايىندا باستادى. 2025 جىلدىڭ قاڭتار ايىنان باستاپ FlyArystan ءوز سەرتيفيكاتىمەن، FS كودى بويىنشا تاۋەلسىز اۋەكومپانيا رەتىندە قىزمەت كورسەتۋدە. اۋەكومپانيا الماتى، استانا جانە اقتاۋ قالالارىندا ورنالاسقان بازالارىنداعى زاماناۋي A320 ۇشاقتارىنان قۇرالعان اۋە پاركىمەن كەڭ اۋقىمدى مارشرۋتتار جەلىسى بويىنشا رەيستەر ورىندايدى. FlyArystan مارشرۋتتار جەلىسى ىشكى جانە حالىقارالىق رەيستەردى، سونداي-اق چارتەرلىك باعىتتاردى قامتيدى. FlyArystan 2023، 2024 جانە 2025 جىلدارى ءۇش رەت Skytrax World Airline Awards تاراپىنان ورتالىق ازيا جانە تمد-نىڭ ەڭ ۇزدىك بيۋدجەتتىك اۋەكومپانياسى دەپ تانىلدى.
1930-جىلدارى گۋريەۆ اۆياوتريادىنىڭ قۇرامىندا قۇرىلعان ح. ك. دوسپانوۆا اتىنداعى اتىراۋ حالىقارالىق اۋەجايى ايماقتىق الاڭنان زاماناۋي حالىقارالىق اۋەجايعا اينالدى. بۇگىندە اۋەجاي ءارتۇرلى ساناتتاعى اۋە كەمەلەرىن قابىلداي وتىرىپ، ىشكى جانە حالىقارالىق رەيستەردى قامتاماسىز ەتەدى.
تاشكەنت قالاسىنىڭ سەرگەلى اۋدانىندا ورنالاسقان وزبەكستانداعى ەڭ ءىرى اۋەجاي. بۇل – وزبەكستان مەن ورتالىق ازياداعى ەڭ كونە ءارى ماڭىزدى اۋەجايلاردىڭ ءبىرى. بۇگىندە يسلام كاريموۆ اتىنداعى "تاشكەنت" حالىقارالىق اۋەجايى ايماقتىڭ ءىرى حالىقارالىق حابتارىنىڭ ءبىرى رەتىندە قىزمەت اتقارادى جانە حالىقارالىق رەيستەر ءۇشىن ترانسپورتتىق ماڭىزدى توراپ سانالادى.