مەدەۋ اۋدانىندا جاڭا وقۋ ورىندارىن قۇرىپ، قولدانىستاعى مەكتەپتىڭ جاعدايىن جاقسارتۋدى كوزدەيتىن جۇيەلى جۇمىس ىستەلىپ جاتىر. وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مەدەۋ اۋدانىنىڭ اكىمى ەركەبۇلان ورازالين وسىلاي دەدى.
قىركۇيەك ايىنا دەيىن قۇلجا تاس جولىنىڭ وڭتۇستىگىندە 2 000 ورىندىق جاڭا مەكتەپتىڭ قۇرىلىسى بىتپەك. سونىمەن قاتار، 599 ورىنعا ارنالعان جەكە مەكتەپ تە سالىنىپ جاتىر. ەندى تاعى ەكى جەكە مەكتەپتىڭ – «دۋمان» شاعىن اۋدانىنداعى 1 200 ورىندىق، ەكىنشىسى – حاليۋللين كوشەسىندەگى 300 ورىنعا ارنالعان مەكتەپتىڭ قۇرىلىسى باستالادى. وسىلايشا، كەلەر جىلدىڭ سوڭىنا دەيىن اۋداندا جاڭادان 4 099 ورىن پايدالانۋعا بەرىلمەك.
جاڭا مەكتەپپەن قاتار، قولدانىستاعى ءبىلىم بەرۋ مەكەمەلەرىن كەڭەيتۋ جاعى دا قولعا الىنعان. جىل سوڭىنا دەيىن №35 مەكتەپكە (300 ورىن)، №99 مەكتەپكە (250 ورىن)، نيش مەكتەبىنە (320 ورىن)، №131 مەكتەپكە (300 ورىن) قوسىمشا عيمارات سالىنىپ بىتەدى.
ءۇش وقۋ ورنىندا كۇردەلى جوندەۋ جۇمىستارى جۇرگىزىلىپ جاتىر. №33 پەن №161 مەكتەپتەگى جوندەۋ جۇمىسى بيىلعى قىركۇيەكتە اياقتالادى. «سامال» شاعىن اۋدانىندا ورنالاسقان №30 مەكتەپتى «كاسىپكەرلەر مەكتەبى» جوباسىمەن بىرىكتىرىپ، سونىڭ ارقاسىندا قوسىمشا 400 وقۋشى ورنى اشىلماق. جوندەۋ جۇمىسىن 2026 جىلدىڭ قىركۇيەگىنە دەيىن، ءبىلىم بەرۋ جوباسىن بيىلدىڭ سوڭىنا دەيىن اياقتاۋ جوسپارلانعان.