تۇركيا رەسپۋبليكاسىنىڭ الماتى قالاسىنداعى باس كونسۋلدىعى مەن ەۋرازيا عىلىمي-زەرتتەۋ ينستيتۋتى بىرلەسىپ «15 شىلدە – دەموكراتيا جانە ۇلتتىق بىرلىك» كۇنى اتتى پانەل وتكىزدى.
باسقوسۋدا باس كونسۋل ەۆرەن مۇدەرىسوعلۋ، احمەت ياساۋي ۋنيۆەرسيتەتىنىڭ وكىلەتتى كەڭەسىنىڭ ءتوراعاسى، پروفەسسور دوكتور مۇحيتتين شيمشەك، ەۋرازيا عىلىمي-زەرتتەۋ ينستيتۋتىنىڭ ديرەكتورى سۋات بەيلۋر، تۇركى دۇنيەسى جازۋشىلار وداعىنىڭ ءتوراعاسى ۇلىقبەك ەسداۋلەت، جازۋشىلار وداعى باسقارماسىنىڭ حاتشىسى قانسەيىت ابدەز ۇلى سىندى عالىم-زەرتتەۋشىلەر، زيالى قاۋىم جانە ب ا ق وكىلدەرى قاتىستى.
باس كونسۋل ەۆرەن مۇدەرىسوعلۋ 2016 جىلدىڭ 15 شىلدەسىندە تۇركيادا بولعان اۋىر وقيعا – اسكەري توڭكەرىس ارەكەتىنىڭ سەبەپتەرى مەن سالدارىن جان-جاقتى اتاپ ءوتتى.
«15-شىلدە – تەك تۇركيا حالقى ءۇشىن عانا ەمەس، بۇكىل دەموكراتيالىق قوعامدار ءۇشىن ۇلكەن سىن ساعاتى بولدى. فەتو لاڭكەستىك ۇيىمىنىڭ مەملەكەتتىك توڭكەرىس جاساۋعا باعىتتالعان ارەكەتى – حالىق ەركىنە، زاڭدىلىققا، ۇلتتىق ەگەمەندىككە قارسى جاسالعان قاستاندىق ەدى. الايدا تۇرىك حالقى سول ءتۇنى بىرلىك پەن باتىلدىقتىڭ جارقىن ۇلگىسىن كورسەتتى. كوشەگە شىعىپ، ەشبىر قارۋعا سۇيەنبەي، تەك جۇرەكتەگى سەنىممەن ءوز مەملەكەتىن، ءوز دەموكراتياسىن قورعاپ قالدى»،-دەپ اتاپ ءوتتى.
احمەت ياساۋي ۋنيۆەرسيتەتىنىڭ وكىلەتتى كەڭەسىنىڭ ءتوراعاسى، پروفەسسور دوكتور مۇحيتتين شيمشەك قيىن-قىستاۋ ساتتە باۋىرلاس ەلدەردىڭ قاستارىنان تابىلعانىن ايرىقشا اتاپ ءوتتى. بۇل قارالى وقيعادان كەيىن تۇركياعا العاش بولىپ مەملەكەتتىك ساپاردى قازاقستان پرەزيدەنتى جاساعانىنا توقتالدى.
جازۋشىلار وداعى باسقارماسىنىڭ حاتشىسى قانسەيىت ابدەز ۇلى «بۇل وقيعا بىزگە دەموكراتيانىڭ، زاڭ ۇستەمدىگىنىڭ جانە ۇلتتىق بىرلىكتىڭ قانشالىقتى قىمبات قۇندىلىق ەكەنىن تاعى ءبىر مارتە ەسكە سالادى.15 شىلدە وقيعاسىنان بولسىن، بىزدە بولعان قاڭتار وقيعاسىنان بولسىن ۇلكەن ساباق الۋىمىز كەرەك»،-دەدى.
جيىنعا قاتىسقاندار توڭكەرىس ارەكەتىنە قارسى تۇرىپ، ءومىرىن قيعان بارلىق ازاماتتاردىڭ رۋحىنا تاعزىم ەتە وتىرىپ، دەموكراتيا مەن ەركىندىك جولىنداعى كۇرەس – ماڭگىلىك قۇندىلىق ەكەنىن اتاپ ءوتتى.