وڭىرلىك كوممۋنيكاسيالار قىزمەتىندەگى اۋدان اكىمى ەركەبۇلان ءورازاليننىڭ بايانداماسىنا قاراعاندا، تۇرعىنداردىڭ دەمالىسىنا قولايلى جاعداي جاساۋ ءۇشىن بيىلعى شىلدە ايىندا «تەررەنقۇر»-دىڭ 3،4 گا اۋماعىن 1،5 ملرد تەڭگەگە جاڭارتۋ جوباسى اياقتالىپ، بالالار مەن سپورت الاڭدارى سالىنىپتى.
2025 جىلدىڭ ماۋسىمىندا پۋشكين كوشەسىن 2،9 ملرد تەڭگەگە (رايىمبەك باتىر داڭعىلىنان گوگول كوشەسىنە دەيىن) ، دوستىق داڭعىلىن 2،5 ملرد تەڭگەگە (اباي داڭعىلىنان ءال-فارابي داڭعىلىنا دەيىن) اباتتاندىرۋ جۇمىسى باستالدى. وسى جوبانىڭ اياسىندا جول جاڭارتىلىپ، ۆەلوجولدار، سپورت پەن سەرۋەندەۋ ايماقتارى جابدىقتالىپ، اۋماقتى تۇگەل كوگالداندىرىپ شىقپاق. جۇمىس 2025 جىلدىڭ سوڭىنا دەيىن اياقتالادى.
«اۋدانداعى ماڭىزدى نىساننىڭ ءبىرى «كوك بازاردى» جاڭعىرتۋدى دا قولعا الدىق. بيىل جالپى كولەمى 5 300 شارشى مەتر بولاتىن قاسبەتىن جاڭارتىپ، 3 160 شارشى مەتر اۋماقتا اباتتاندىرۋ جۇمىسى جۇرگىزىلەدى. سونىمەن قاتار، قوعامدىق كولىك ايالداماسى دا جاڭارتىلىپ، 5 ۆەلوتۇراق ورناتىلادى. بۇل جۇمىستى جۇزەگە اسىرۋعا 1،8 ملرد تەڭگە كولەمىندە ينۆەستيسيا تارتىلىپ، جوبانى 2026 جىلى اياقتاۋدى جوسپارلاپ وتىرمىز»، - دەدى اۋدان اكىمى.
2025 جىلى «حالىق قاتىساتىن بيۋدجەت» باعدارلاماسىنىڭ اياسىندا 34 جوبانى ىسكە اسىرۋعا 2 ملرد تەڭگە ءبولىنىپتى. وسى جوبانىڭ اۋقىمىندا بارلىعى 650 ۇسىنىستى قاراپ شىققان. مامىر ايىنان الداعى قىركۇيەككە دەيىن 17 اۋلا مەن 17 قوعامدىق كەڭىستىكتى اباتتاندىرىپ، 4 جەردە اۆتوماتتى سۋ جۇيەسىن ورناتۋدى جوسپارلاپ وتىرعاندارىن جەتكىزدى اۋدان باسشىسى.
سونىمەن بىرگە، بيىل ادەتتەگى جوندەۋ جۇمىسىنا 500 ملن تەڭگە بولىنگەن. قاراساي باتىر كوشەسىنىڭ جاياۋ جۇرگىنشىلەر ايماعى (دوستىق داڭعىلىنان نازاربايەۆ داڭعىلىنا دەيىن) اباتتاندىرىلادى، سونداي-اق شيەۆچەنكودان قابانباي باتىر كوشەسىنە دەيىنگى ارالىقتاعى ءۋاليحانوۆ بۋلۆارىندا دا جۇمىس قىزىپ، راقىمجان-رادلوۆ كوشەسىنىڭ بۇرىشىنداعى بوس تۇرعان باتىس اينالما جولىنىڭ ۋچاسكەسى دە جوندەۋدەن وتپەك.
بيىلعى مامىر ايىندا 2،6 ملرد تەڭگە سوماسىنا 60 اۋلانىڭ اۋماعى كۇردەلى جوندەۋدەن وتەدى. بۇلار جايلى ءارى ءقاۋىپسىز ورتا قالىپتاستىرۋعا باعىتتالعان. جوبانى اياقتاۋ 2025 جىلدىڭ قازان ايىنا جوسپارلانىپ وتىر.