ۆەنگريادا ىستىقتان كولدەر تارتىلىپ قالدى

ۆەكەري كولى كورىكتى جەرلەردىڭ ءبىرى بولعان

ۆەنگريادا سوڭعى ايلارداعى اپتاپ ىستىق سالدارى وزەن-كولدەرگە قاتتى اسەر ەتۋدە. بىرنەشە اپتانىڭ ىشىندە بىردەن ەكى بىردەي ءىرى كول تارتىلىپ قالدى دەپ حابارلايدى،  دەپ حابارلايدى Almaty-akshamy.kz BAQ.KZ-كە سىلتەمە جاساپ.

Euronews تاراتقان اقپارات بويىنشا، ۆەكەري كولى – دەبرەسەننىڭ كورىكتى جەرلەرىنىڭ ءبىرى بولاتىن. الايدا قۇرعاقشىلىقتان بۇل جەردە ەندى كول ورنىنا شالشىق سۋ عانا قالعان. وتكەن ايدا وڭىردە ايلىق نورمادان 50 مم-گە از جاۋىن-شاشىن جاۋعان. 
ءتىپتى، ءىرى ۆەنگەر كولدەرىنىڭ ءوزى تارتىلىپ قالۋدىڭ از-اق الدىندا تۇر. ولارداعى سۋ دەڭگەيى بىردەن ءتۇسىپ كەتكەن. ۇكىمەت ءىرى وزەندەردەن سۋدى بۇرۋ ارقىلى جاعدايدى رەتكە كەلتىرۋگە تىرىسىپ جاتىر. 
ەلدىڭ وڭتۇستىك-باتىسىنداعى بيچەردي كولى بالىعىنىڭ كوپتىگىمەن تانىمال بولعان ەدى. ءقازىر ونىڭ قۇرعاپ قالعان ءتۇبى كورىنىپ تۇر. 
قۇرعاقشىلىق اۋىل شارۋاشىلىعىنا دا ۇلكەن ءقاۋىپ ءتوندىردى. بيىل 300 مىڭ گەكتار جۇگەرى مەن 200 مىڭ گەكتار كۇنباعىس القابى قۇرعاپ قالعان. مەملەكەتتىڭ شىعىسىندا ارپا ەگىستىگى ەكى ەسە كىشىرەيدى. 
ۆەنگەر اگروسەكتورىنىڭ قارجىلاي شىعىنى ءقازىردىڭ وزىندە 1 ملرد ەۋروعا جەتكەن.