ورتاشا ەسەپپەن جىلىنا 200 بالاباقشا اشىلادى
2024 جىلدان باستاپ قازاقستاندا بالاباقشالار قىزمەتىن ليسەنزيالاۋ شاراسى قولعا الىنادى. بۇل تۋرالى ق ر وقۋ-اعارتۋ مينيسترلىگى ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى گۇلزات كوبەنوۆا ءمالىم ەتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«بالاباقشا قىزمەتىن ليسەنزيالاۋ جاڭا دۇنيە ەمەس. 2011 جىلعا دەيىن ليسەنزيالاۋ بولعان. سول جىلدارى مينيسترلىكتىڭ الدىندا بالالاردى مەكتەپكە دەيىنگى بىلىم-تاربيە وشاعىمەن قامتاماسىز ەتۋ مىندەتى تۇردى. سول سەبەپتى ليسەنزيالاۋدى ۋاقىتشا الىپ تاستادى. سودان بەرى 10 جىل ۋاقىتتىڭ ىشىندە بالاباقشامەن قامتۋ ماقساتى ورىندالدى. بۇگىندە ەلىمىز بويىنشا بالاباقشامەن قامتۋ كورسەتكىشى 99 پايىزدى قۇرايدى. ەندىگى ۋاقىتتا ساپاعا ءمان بەرۋ كەرەك. ياعني بالاباقشالاردىڭ قانشالىقتى زاڭ، تالاپ پەن سۇرانىسقا ساي جۇمىس ىستەيتىنى ماڭىزدى بولىپ وتىر»، - دەدى گۇلزات كوبەنوۆا مينيسترلىكتىڭ «Oqu-ağartu LIVE» جوباسىنىڭ ەفيرىندە.
ونىڭ ايتۋىنشا، بيىل جانە كەلەسى جىلى بالاباقشالاردى ليسەنزيالاۋعا دايىندىق جۇمىسى جۇرەدى. ال ليسەنزيا بەرۋ 2024 جىلى باستالماق. «ليسەنزيالاۋ جۇمىسى كەزەڭ-كەزەڭىمەن جۇرەدى. ول ەڭ الدىمەن جاڭادان اشىلعان بالاباقشالارعا قاتىستى. ايتا كەتسەك، ەلىمىزدە ورتاشا ەسەپپەن جىلىنا 200 بالاباقشا اشىلادى. ەكىنشىدەن، مەملەكەتتىك اتتەستاسيادان وتپەگەن بالاباقشالار ليسەنزيالانادى. ستاتيستيكاعا سۇيەنسەك، مەملەكەتتىك اتتەستيسيادان 2 رەت وتپەي قالعان بالاباقشالاردىڭ ۇلەسى 1-2 پايىزدى قۇراپ وتىر. ءۇشىنشى كەزەڭدە قىزمەتى بويىنشا تاۋەكەل جانە كۇمان تۋدىراتىن بالاباقشالار ليسەنزيالانادى»، - دەيدى ول. سونداي-اق، كوميتەت باسشىسى ءبىلىم بەرۋ ۇيىمدارىنىڭ قىزمەتىن ليسەنزيالاۋ مەكتەپ جانە كوللەدجدەردە بار ەكەنىن ەسكە سالدى. بۇعان دەيىن ق ر وقۋ-اعارتۋ ءمينيسترى اسحات ايماعامبەتوۆ بالاباقشالاردى ليسەنزيالاۋ پروسەسىن ءتۇسىندىرىپ بەرگەن ەدى. ەسكە سالا كەتسەك، ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ جەكەمەنشىك بالاباقشالاردى ليسەنزيالاۋ ءتارتىبى قايتا ەنگىزىلەتىنىن ايتتى.