ۆەنەسۋەلانىڭ ۋاقىتشا بيلىگى اقش-قا 30–50 ميلليون باررەل مۇناي جەتكىزۋگە كەلىستى، دەپ حابارلايدى Aqshamnews.kz ءتىلشىسى.
بۇل تۋرالى اقش پرەزيدەنتى دونالد ترامپ Truth Social الەۋمەتتىك جەلىسىندەگى پاراقشاسىندا مالىمدەدى. ونىڭ ايتۋىنشا، ۆەنەسۋەلادان تاسىمالداناتىن مۇناي نارىقتىق باعامەن ساتىلادى، ال ودان تۇسكەن قارجى تىكەلەي ءوز باقىلاۋىندا بولادى.
«بۇل كەلىسىم ەكى ەل حالقىنىڭ دا مۇددەسىنە ساي جۇمىس ىستەۋى ءتيىس»، – دەپ جازدى دونالد ترامپ.
اقش پرەزيدەنتى اتالعان كەلىسىمدى جەدەل ىسكە اسىرۋدى ەنەرگەتيكا ءمينيسترى كريس رايتقا تاپسىرعان. جوسپارعا سايكەس، مۇناي ارنايى تانكەرلەر ارقىلى اقش اۋماعىنا تىكەلەي جەتكىزىلەدى.
جەتكىزۋ پروسەسى مامانداندىرىلعان كەمەلەرمەن جۇزەگە اسىرىلادى. ولار مۇنايدى تىكەلەي ءتۇسىرۋ تەرمينالدارىنا اپارىپ، لوگيستيكانى جەدەلدەتۋگە مۇمكىندىك بەرەدى.
بۇعان دەيىن دونالد ترامپ امەريكالىق اسكەريلەردىڭ كاراكاستا جۇرگىزىلگەن تۇنگى وپەراسيا بارىسىندا ۆەنەسۋەلانىڭ بۇرىنعى باسشىسى نيكولاس مادۋرو مەن ونىڭ جۇبايىن ۇستاپ، ەلدەن الىپ شىققانىن مالىمدەگەن بولاتىن. اقپارات كوزدەرى اسكەري جانە ستراتەگيالىق نىساندارعا، سونىڭ ىشىندە پارلامەنت عيماراتىنا سوققىلار جاسالعانىن حابارلادى.
سونداي-اق اقش پرەزيدەنتى ۆەنەسۋەلادا بيلىك اۋىسقاننان كەيىن ەلدى ۋاقىتشا باسقارۋ مىندەتىن اقش ءوز موينىنا الاتىنىن ايتقان. كەيىن ۆەنەسۋەلا جوعارعى سوتى بۇرىنعى اتقارۋشى ۆيسە-پرەزيدەنت دەلسي رودريگەستى ۋاقىتشا مەملەكەت باسشىسى ەتىپ تاعايىندادى.