ەلەۋسىزوۆ تيمۋر مەلس ۇلى «جاسىل-الماتى» («زەلەنسترويدىڭ» زاماناۋي بالاماسى) كوممۋنالدىق مەملەكەتتىك مەكەمەسىنىڭ باسشىسى بولىپ تاعايىندالدى. الماتى قالاسىنىڭ اكىمى دارحان ساتىبالدىنىڭ تاپسىرماسىمەن قۇرىلعان مەكەمە قالا اۋماعىنداعى ساياباقتاردى، سكۆەرلەردى جانە جاعالاۋلاردى كۇتىپ ۇستاۋ مەن قىزمەت كورسەتۋمەن اينالىسادى. بۇل تۋرالى قالانىڭ قوعامدىق كەڭىستىكتەردى دامىتۋ باسقارماسىنىڭ وكىلدەرى ايتتى.
جاڭا قۇرىلىمنىڭ نەگىزگى مىندەتى — جاسىل اۋماقتارعا جۇيەلى كۇتىم جاساۋ، ءتارتىپ ورناتۋ، سونداي-اق ولاردى كۇتىپ ۇستاۋ بويىنشا جاۋاپكەرشىلىكتى ناقتى بولە وتىرىپ، تاجىريبەلىك ناتيجەگە باعىتتالعان ءبىرىڭعاي ءتاسىلدى قالىپتاستىرۋ.
«جاسىل-الماتى» كمم-نى قۇرۋ تۋرالى شەشىم قالاداعى جاسىل قوردى باسقارۋ سالاسىندا جيناقتالعان ماسەلەلەردى، ءبىرىڭعاي وپەراتوردىڭ بولماۋىن جانە جاسىل جەلەكتەرگە كۇتىم جاساۋداعى بىتىراڭقى ءتاسىلدى ەسكەرە وتىرىپ قابىلداندى.