جامبىل وبلىسىندا پوليسەيلەر جەدەل ارەكەتتىڭ ارقاسىندا قايعىلى جاعدايدىڭ الدىن الدى، دەپ حابارلايدى Aqshamnews.kz ءتىلشىسى.
وقيعا 2026 جىلعى 6 قاڭتاردا پروفيلاكتيكالىق تەكسەرىس بارىسىندا تىركەلگەن. جامبىل وبلىستىق پوليسيا دەپارتامەنتىنىڭ مالىمەتىنشە، ءتارتىپ ساقشىلارى ارنايى ەسەپتە تۇرعان ازاماتتاردى كۇندەلىكتى ارالاۋ كەزىندە ءبىر تۇرعىن ۇيگە كىرگەن.
تەكسەرۋ كەزىندە پوليسەيلەر ەر ادامنىڭ جاتىن بولمەدە جىلىتۋ قۇبىرىنا اسىلىپ، ومىرىنە ءقاۋىپ ءتونىپ تۇرعانىن بايقاعان. جاعدايدىڭ كۇردەلىلىگىن ەسكەرگەن قۇقىق قورعاۋ ورگاندارىنىڭ قىزمەتكەرلەرى بىردەن ارەكەت ەتكەن.
پوليسەيلەر ەر ادامدى دەرەۋ بوساتىپ، العاشقى مەديسينالىق كومەك كورسەتكەن. وسىلايشا، ازاماتتىڭ ءومىرىن ساقتاپ قالۋعا مۇمكىندىك تۋعان.
زارداپ شەككەن ەر ادام جەدەل تۇردە اۋداندىق اۋرۋحاناعا جەتكىزىلدى. دارىگەرلەردىڭ حابارلاۋىنشا، قازىرگى ۋاقىتتا ونىڭ جاعدايى تۇراقتى، ومىرىنە ءقاۋىپ جوق.
قۇتقارىلعان ازاماتتىڭ تۋىستارى پوليسيا قىزمەتكەرلەرىنە كاسىبي ءارى بەيجاي قاراماعان ارەكەتتەرى ءۇشىن العىس بىلدىرگەن.
پوليسيا دەپارتامەنتى ارنايى ەسەپتە تۇرعان ادامدارمەن پروفيلاكتيكالىق جۇمىستاردىڭ تۇراقتى تۇردە جۇرگىزىلەتىنىن اتاپ ءوتتى. مۇنداي شارالار قۇقىق بۇزۋشىلىقتىڭ الدىن الۋعا جانە قيىن جاعدايعا تاپ بولعان ازاماتتارعا دەر كەزىندە كومەك كورسەتۋگە باعىتتالعان.
ماماندار قوعامدى وسىنداي ساتتەردە بەيجاي قالماي، جاقىن جانداردىڭ پسيحولوگيالىق جاعدايىنا مۇقيات بولۋعا شاقىرادى.