بەدەلدى شارا 21 ءساۋىر مەن 27 قاراشا ارالىعىندا وتەدى
العاش رەت 59-شى ۆەنەسيا بيەننالەسىندە قازاقستان پاۆيلونى اشىلماق. حالىقارالىق ونەر كورمەلەرىنىڭ بىرىندە ەلىمىزدىڭ اتىنان ORTA ترانسديسيپلينارلىق كومانداسى قاتىسادى، دەپ حابارلايدى Almaty-akshamy.kz
ولاردىڭ جوباسى اتى اڭىزعا اينالعان الماتىلىق سۋرەتشى سەرگەي كالمىكوۆتىڭ يدەيالارىنا نەگىزدەلگەن.
«ۆەنەسيا بيەننالەسىندەگى ۇلتتىق پاۆيلونىمىز – قازاق ونەر ساحناسىنداعى كوپتەن كۇتكەن وقيعالاردىڭ ءبىرى. بۇل كورمەنى بەلگىلى سۋرەتشى سەرگەي كالمىكوۆقا ارناۋ تۋرالى شەشىم قابىلداندى. ول – كوپتەگەن سۋرەتشىلەردى شىعارماشىلىقپەن شابىتتاندىرعان العاشقى سۋرەتشى. پاۆيلون قازاقتىڭ زاماناۋي ونەرىن الەمدە دە، ەل ىشىندە دە قولداۋعا جانە كورسەتۋگە ارنالعان كوپتەگەن جوبالاردىڭ بىرىنە اينالادى دەپ سەنەمىن»، – دەدى ۆەنەسيا بيەننالەسىندەگى قازاقستان پاۆيلونىنىڭ كوميسسارى مەرۋەرت قالييەۆا.
ۆەنەسيا بيەننالەسى – ەكى جىل سايىن ۆەنەسيادا وتەتىن جانە جىلىنا 550 مىڭنان استام ادام تاماشالايتىن ەڭ بەدەلدى حالىقارالىق ونەر كورمەلەرىنىڭ ءبىرى.