وسى ماقساتتا رەسپۋبليكالىق جەدەل شتاب قۇرىلعان.
قازاقستاننىڭ اۋىل شارۋاشىلىعى مينيسترلىگى كوكتەمگى ەگىس جۇمىستارىنا دايىندىقتىڭ قالاي جۇرگىزىلىپ جاتقانىن ايتتى، دەپ حابارلايدى Almaty-akshamy.kz.
مامانداردىڭ ايتۋىنشا، 2022 جىلعى ەگىس القاپتارىنىڭ قۇرىلىمىن 22،9 ملن گا قۇرايدى دەپ بولجاپ وتىر، بۇل وتكەن جىلدىڭ كورسەتكىشىنەن 13،5 مىڭ گا ارتىق.
«2021 جىلعى جەلتوقساندا وبلىس اكىمدىكتەرىمەن وتكەن كەڭەس بارىسىندا ەگىس القاپتارىنىڭ بولجامدى قۇرىلىمى تالقىلانىپ، ىشكى نارىقتى تولىق تولىقتىرۋ ماقساتىندا الەۋمەتتىك ماڭىزى بار داقىلدار ءوندىرىسىن ۇلعايتۋ قاجەتتىلىگى ايتىلدى. اۋىل شارۋاشىلىعى تاۋار وندىرۋشىلەرىن تۇقىممەن، اگروحيميامەن، تەحنيكامەن، قارجىلاندىرۋمەن جانە وزگە دە كومەكپەن قامتاماسىز ەتۋدىڭ بارلىق ماسەلەلەرىن ۇيلەستىرۋ ماقساتىندا رەسپۋبليكالىق جەدەل شتاب قۇرىلىپ، ونىڭ قۇرامىنا بارلىق مۇددەلى ورگاندار مەن ۇيىمدار، سونداي-اق وبلىس اكىمدەرىنىڭ ورىنباسارلارى ەنگىزىلدى.
قازىرگى ۋاقىتتا تۇقىم جوسپارعا سايكەس 100% تولتىرىلدى، ساراپتاماعا 1،5 ملن توننا جازدىق داقىلدار تۇقىمى كەلىپ ءتۇستى، ونىڭ 1،3 ملن تونناسى نەمەسە 90% تەكسەرىلدى. تەكسەرىلگەن تۇقىم كولەمىنىڭ 99% كونديسيالى دەپ تانىلعان، 88% ەگىس ستاندارتىنىڭ 1 جانە 2-كلاسىنا سايكەس كەلەدى»، - دەلىنگەن اشم باسپا ءسوز قىزمەتىنىڭ حابارلاماسىندا.
الدىن الا دەرەكتەر بويىنشا، 2022 جىلعى ونىمگە 135 مىڭ توننا ەليتالىق تۇقىم – 5،7 %، ءۇشىنشى رەپرودۋكسيادان تومەن ەمەس تۇقىم – 95% سەبىلدى. ەگىس ناۋقانىن وتكىزۋ ءۇشىن اۋىل شارۋاشىلىعى قۇرىلىمدارىندا 141،7 مىڭ تراكتور، 4300 بىرلىك ونىمدىلىگى جوعارى ەگىس كەشەندەرى، 73،2 مىڭ تۇقىم سەپكىش، 221،2 مىڭ توپىراق وڭدەۋ قۇرالى بار.
رەسپۋبليكادا ءبىر مەزگىلدە بىرنەشە تەحنولوگيالىق وپەراسيالاردى ورىندايتىن قازىرگى زامانعى ەگىس كەشەندەرىنىڭ 4300 بىرلىكتەن استامىنىڭ بولۋى ءداندى داقىلدار القاپتارىنىڭ 70% ەگۋدى جۇزەگە اسىرۋعا مۇمكىندىك بەرەدى.
«اعىمداعى جىلى ەگىس جۇمىستارىن جۇرگىزۋگە وڭىرلەردىڭ ديزەل وتىنىنا قاجەتتىلىك 400،0 مىڭ توننانى قۇرادى، بۇل وتكەن جىلى بولىنگەن كولەمنەن 20،0 مىڭ تونناعا ارتىق. ايىرماشىلىق قاردى ساقتاۋ جانە ىلعالدى جابۋ جۇمىستارىن جۇرگىزۋ قاجەتتىلىگىنە بايلانىستى بولدى»، - دەلىنگەن حابارلامادا.
وڭىرلەردىڭ قاجەتتىلىگى ءتيىستى ەسەپتەۋلەرمەن ەنەرگەتيكا مينيسترلىگىنە جولداندى.
اعىمداعى جىلى مينەرالدى تىڭايتقىشتاردى ەنگىزۋ كولەمى شامامەن 695 مىڭ توننانى قۇرايدى، بۇل وتكەن جىلدىڭ كورسەتكىشىنەن 70 مىڭ تونناعا ارتىق. ءداستۇرلى تۇردە ساتىپ الىناتىن تىڭايتقىشتاردىڭ 60% 2 تۇرگە-اممياك سەليتراسى مەن امموفوسقا تيەسىلى، بۇلاردىڭ ءوندىرىسى قازاقستاندا بار.
اۋىل شارۋاشىلىعى تاۋار وندىرۋشىلەرىن اتالعان تىڭايتقىشتارمەن قامتاماسىز ەتۋ ماقساتىندا وتاندىق زاۋىتتاردىڭ باسشىلىعىمەن كەلىسسوزدەر جۇرگىزىلدى، ولاردىڭ ناتيجەلەرى بويىنشا ىشكى نارىقتى تولىق قامتاماسىز ەتۋ بويىنشا ۋاعدالاستىقتارعا قول جەتكىزىلدى.
كوكتەمگى ەگىس جۇمىستارى باستالىسىمەن مينيسترلىك وبلىس اكىمدىكتەرىمەن بىرلەسىپ اپتا سايىن مينەرالدى تىڭايتقىشتارمەن قامتاماسىز ەتىلۋ مونيتورينگىن جۇرگىزەتىن بولادى. ولاردىڭ قۇنىن سۋبسيديالاۋ ماقساتىندا اعىمداعى جىلى 26،8 ملرد تەڭگە قاراستىرىلعان.
«2021 جىلى كوكتەمگى ەگىس جانە ەگىن جيناۋ جۇمىستارىن جۇرگىزۋگە بارلىعى «اگرارلىق نەسيە كورپوراسياسى» اق 83،8 ملرد. تەڭگە سوماسىنا (ونىڭ ىشىندە بيۋدجەتتىك كرەديت70 ملرد. تەڭگە) 3 مىڭنان استام اۋىل شارۋاشىلىعى تاۋارىن ءوندىرۋشىنى نەسيەلەندىرىپ، بۇل 4،3 ملن. گەكتاردى قامتۋعا مۇمكىندىك بەردى.2022 جىلى اگرارلىق نەسيە كورپوراسياسى 88،4 ملرد تەڭگە ءبولۋدى جوسپارلاپ وتىر، ونىڭ ىشىندە بيۋدجەتتىك نەسيە 70 ملرد تەڭگە، قالعانى ءوز قاراجاتى»،- دەيدى ماماندار.
سونىمەن قاتار، 2021 جىلدىڭ جەلتوقسان ايىندا اعىمداعى جىلدىڭ ەگىس جۇمىستارىنا دايىندالۋ ءۇشىن 5،1 ملرد تەڭگە سوماسىندا نەسيە ءبولىندى. كوكتەمگى ەگىس جۇمىستارىنا جوسپارلانعان كرەديت شىعىن نورماتيۆتەرىن ارتتىرۋدى ەسكەرە وتىرىپ، 3 مىڭعا جۋىق ءاشتو-نى جانە 4 ملن گەكتارعا جۋىق ەگىستىكتى قامتۋعا مۇمكىندىك بەرەدى.