وتاندىق سكريپكاشى رۋسلان تالاس حالىقارالىق بايقاۋدىڭ باس جۇلدەسىن جەڭىپ الدى.
ونەر جارىسىندا سكريپكا، الت، ۆيولەنچەل، كونتراباس، فورتەپيانو جانە ارفا اسپاپتارىن شەبەر مەڭگەرگەن 16 مەن 35 جاس ارالىعىنداعى دارىندار باعى پەن بابىن سىناعان بولاتىن. ءبىر جىلعا ۇلاسقان دودادان ۇزدىك شىققان قازاقستاندىق مۋزىكانت ەندى بەرلين فيلارمونياسىندا، نيۋ-يوركتەگى كارنەگي زالى جانە ماسكەۋدەگى زاريادەدە ونەر كورسەتۋگە جولداما الدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ونىڭ ايتۋىنشا، بايقاۋ العاش رەت ۇيىمداستىرىلعانىنا قاراماستان، باسەكەلەستىك ۇلكەن بولعان. ال باسەكە بولماي، بايگە جوق.
"بايقاۋ تۋرالى ءوز باسىم الەۋمەتتىك جەلىلىەردەن كورىپ ءبىلدىم، سەبەبى سوندا كوپ جارنامالاندى. سوندىقتان دا قاتىسۋشىلار كوپ بولدى دەپ ويلايمىن. قاتەلەسپەسەم، ءوتىنىش بىلدىرگەندەر سانى الەمنىڭ 109 ەلىنەن 4 مىڭداي. ءبىرىنشى رەت ۇيىمداستىرىلعانىنا قاراماستان، اۋقىمدى فورماتتا ءوتتى. جالپى، بايقاۋدىڭ ۇزاقتىعى 1 جىلعا سوزىلدى. العاشقى اينالىم ايماقتىق، ودان كەيىن ۇلتتىق، ءۇشىنشىسى الەمدىك دەڭگەيدە، ال ءتورتىنشى اينالىم - فينال ۆەنا قالاسىنداعى «كونسەرتحاۋس» زالىندا ءوتتى. مەن سەكىلدى مۋزىكانت ءۇشىن ول زالدا ونەر كورسەتۋ – ۇلكەن مارتەبە"، - دەيدى سكريپكاشى، World Vision – 2022 بايقاۋىنىڭ جەڭىمپازى رۋسلان تالاس.
رۋسلان تالاس - ءوزىنىڭ جاستىعىنا قاراماستان، الەمدىك سكريپكانىڭ ۇزدىك ۇستازدارىنان ءبىلىم الىپ ۇلگەرگەن مۋزىكانت. بۇگىندە ول شۆەيسارياداعى لوزاننا مۋزىكا اكادەمياسىندا ماگيستراتۋرادا وقىپ جاتىر. ونەرپازدىڭ ايتۋىنشا، سكريپكا اسپابىنا دەگەن ماحابباتىن بالا كۇنىندە اكەسى مۇساحان تۇرىنتايەۆ وياتقان.
"اكەم مەنى بالا كۇنىمنەن قولداپ كەلەدى. ول - ءوزى سكريپكاشى. سوندىقتان كۇندەلىكتى مەنى ءوزى وقىتاتىن. ال نەگىزگى وقۋىمدى قازاق ۇلتتىق مۋزىكا اكادەمياسىنان باستادىم. ول ءبىلىم ورداسىنا ريزاشىلىعىم زور. وندا مەن 5 جىل وقىپ شىقتىم. ارى قاراي 12 جاسىمنان ماسكەۋدەگى ورتالىق مۋزىكا مەكتەبىندە وقۋىمدى جالعاستىردىم. ال جاقىندا ماسكەۋ كونسەرۆاتورياسىن گراف مۋرجانىڭ سىنىبىن اياقتادىم. گراف مۋرجا ول وتە تانىمال سكرپكاشى، قازاقستانعا ونەر كورسەتۋگە ءجيى كەلىپ تۇرادى"، - دەيدى سكريپكاشى رۋسلان تالاس.
جاس دارىن وتاندىق ساحنالاردا ءجيى ونەر كورسەتسەم، جاي ونەر كورسەتىپ قويماي، تانىمال الەمدىك سكريپكاشىلاردىڭ قازاقستانعا كەلۋىنە سەبەپكەر بولسام دەيدى.