زەرتتەۋ جۇمىستارى ءتيىمدى بولۋى ءۇشىن عالىمدار كەم دەگەندە 300 ءيتتىڭ گەنەتيكالىق ماتەريالىن جيناۋى ءتيىس.
ازىرگە جۇمىس جارتىلاي عانا ورىندالدى. ەڭ الدىمەن، عالىمدار وسى يت پوپۋلياسياسىنىڭ ومىرشەڭدىگىن باعالاپ، ينبريدينگ كوەففيسيەنتىن ەسەپتەۋى ءتيىس. ياعني، تازىلاردىڭ گەنەتيكالىق تازالىعىن انىقتاۋ كەرەك.
ەكى جىلدان بەرى ماماندار ەل ايماقتارىن ارالاپ، جانۋاردىڭ دنق-سىن جيناۋ جۇمىستارىن جۇرگىزۋدە، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
زەرتتەۋشىلەردىڭ ايتۋىنشا، بۇل حالىقارالىق كينولوگيا قاۋىمداستىعىنا تازىلاردى بولەك تۇقىم رەتىندە تانۋعا مۇمكىندىك بەرەدى. ءقازىر ولار شىعىس تازىلارىنا جاتادى.
"زەرتتەۋگە قاتىسقان ءار يتكە گەنەتيكالىق ءتولقۇجات – سەرتيفيكات بەرىلەدى. بۇل قۇجات نەنى بىلدىرەدى؟ كەز كەلگەن تىرشىلىك يەسىنىڭ دنق-سىندا اقۋىزى كودتالمايتىن ۋچاسكەلەرى بولادى، ونى تاندەمدى قايتالاۋ دەپ اتايدى. ول بىرەگەي بولادى جانە تۇقىم قۋالايدى. سوندىقتان ءبىز يتتەردىڭ بىر-بىرىمەن قانشالىقتى بايلانىسى بارىن وڭاي انىقتاي الامىز"، - دەيدى ق ر بعم عك گەنەتيكا جانە فيزيولوگيا ينستيتۋتىنىڭ عىلىمي قىزمەتكەرى كيرا بەسپالوۆا.
وسى رەتتە تاعى ءبىر ماسەلە تۋىندايدى. قازاقستاندا تازىنىڭ ناقتى سانى تۋرالى ءالى كۇنگە دەيىن رەسمي دەرەك جوق. يتتەردى تىركەۋ ەرىكتى دەڭگەيدە جۇرگىزىلەدى. كوبىنەسە بۇل تۇقىمدى قالا سىرتىندا جەكە ۇيلەردە تۇراتىن ادامدار وسىرەدى.
"كوپتەگەن ازاماتتار ءقازىر مەن رەسمي تىركەۋگە تۇرسام، كەيىن مەنەن اقشا الادى دەپ ويلايدى. قازاقستان بويىنشا جۇرگىزەتىن ەسەبىمىز ناقتى ەمەس. بەيرەسمي. ءقازىر، مىسالى، شامامەن 3000 يت تىركەۋدە بار. ءبىراق، نەگىزى يتتەر كوبىنە جوعالىپ، قاشىپ كەتىپ، نە كولىك استىنا ءتۇسىپ قالىپ جاتادى"، - دەيدى «قانسونار» رەسپۋبليكالىق قوعامدىق بىرلەستىكتەر قاۋىمداستىعىنىڭ باس كينولوگى يننا نازارەنكو.
سونداي-اق، عالىمدار قازاقى تازىنى شىعىس تازىلارى توبىنداعى وزگە يتتەرمەن سالىستىرۋ جۇمىستارىن جۇرگىزەدى. مىسالى، ءقازىر يراندىق ارىپتەستەرمەن ولاردىڭ ساليۋكيلەرىنىڭ دنق-سىن الۋ تۋرالى كەلىسسوز جۇرگىزىپ جاتىر. جوبا 2023 جىلعا دەيىن جوسپارلانعان جانە ناتيجەسى جەمىستى بولارىنا سەنىم مول. سەبەبى قازاق تازىسى تۇقىمى تۋرالى كوپشىلىككە بەلگىسىز قۇندى مالىمەتتەر اشىلادى دەگەن بولجام بار.