11 جاستان 15 جاسقا دەيىنگى ەلەكتروندى تەمەكى شەگەتىن جاسوسپىرىمدەردىڭ سانى 3 ەسەگە كوبەيگەن.
قازاقستاندا ءبىر رەتتىك ەلەكتروندى تەمەكىمەن كۇرەس ماسەلەسى قولعا الىندى. بۇل تۋرالى ق ر ۇلتتىق ەكونوميكا ءمينيسترى اسەت ەرعالييەۆ ءمالىم ەتتى، دەپ حابارلايدى Almaty-akshamy.kz
«ءبىر رەتتىك ەلەكتروندى تەمەكىمەن كۇرەس ماسەلەسىن دەنساۋلىق ساقتاۋ مينيسترلىگىمەن بىرگە قاراستىرىپ جاتىرمىز. ازىرگە قاشان جانە قالاي بولاتىنى تۋرالى ايتا المايمىن. بۇل جەردە مامانداردان بولەك، كاسىپكەرلەردىڭ دە پىكىرىن ەسكەرۋ قاجەت. بارلىق جاقتىڭ ۇستانىمىن ءبىلۋ ءۇشىن ۋاقىت كەرەك. سونىمەن قاتار بۇل ماسەلەگە قاتىستى ارنايى جۇمىس توبى جانە دەپۋتاتتارمەن بىرلەسكەن جۇمىس ءجۇرىپ جاتىر»، - دەدى اسەت ەرعالييەۆ.
بۇدان بۇرىن دەپۋتات ءمادي احمەتوۆ ءماجىلىستىڭ جالپى وتىرىسىندا ءبىر رەتتىك ەلەكتروندى تەمەكىنىڭ جاستار اراسىندا كەڭىنەن تارالۋىنا الاڭداۋشىلىق تانىتقان ەدى.
«دۇكەن بىلاي تۇرسىن، الەۋمەتتىك جەلىنى اشساڭىز، نيكوتيندى تاۋاردى تاۋلىك بويى ۇيىڭىزگە تەگىن جەتكىزىپ بەرەتىن پابليكتەردە، ءانونيمدى تەلەگرام كانالداردا جۇزدەگەن جارناما بار. تاپسىرىس بەرۋشىنىڭ جاسىن سۇراپ، باس قاتىرىپ جاتقان ەشكىم جوق. وسىنىڭ سالدارىنان وقۋ جىلىنىڭ باسىنان وقۋشىلار اراسىندا ءتۇتىنى بۋداقتاعان زياندى شىلىمعا سۇرانىس ەسەلەپ ارتقان. ءتىپتى، كەيبىر مەكتەپتەردە جوعارى سىنىپ وقۋشىلارى باستاۋىش سىنىپتارعا ءبىر رەتتىك تەمەكىنىڭ قۇنىنا اقشا قوسىپ ساتىپ، اۋەستەندىرىپ ءجۇر. ەلىمىزدىڭ ۇلتتىق قوعامدىق دەنساۋلىق ساقتاۋ ورتالىعىنىڭ سوڭعى 2019 جىلعى زەرتتەۋلەرىنىڭ مالىمەتىنە سۇيەنسەك، 11 جاستان 15 جاسقا دەيىنگى ەلەكتروندى تەمەكى شەگەتىن جاسوسپىرىمدەردىڭ سانى 3 ەسەگە، ال قىزدار اراسىندا 2 ەسەگە وسكەن. كوش باسىندا 3،9 پايىز كورسەتكىشپەن الماتىلىق جاسوسپىرىمدەر تۇر. اتالعان زەرتتەۋ سوڭعى ەكى جىل جۇرگىزىلمەگەندىكتەن، قازىرگى جاعداي مۇلدە بەلگىسىز»، - دەدى ءمادي احمەتوۆ.