وزەكتى ماسەلەنى ءماجىلىس سپيكەرى ەرلان قوشانوۆ قوزعادى. ول جاۋاپتى مەملەكەتتىك ورگاندار ءالى ناقتى شەشىم قابىلداماعانىن ەسكە سالدى.
«بۇل ماسەلەنى مەملەكەت باسشىسى دا كوتەرىپ، تاپسىرما بەرگەن ەدى. دەپۋتاتتار دا جان-جاقتى تالقىلاپ، ويلارىن ورتاعا سالدى، ءبىراق ءالى ناقتى شەشىم جوق. سوندىقتان ناقتى شەشىم قابىلدايتىن ۋاقىت كەلدى. ءبىز ءبىرتۇتاس ۇستانىمعا كەلۋىمىز كەرەك. ويتكەنى ول ءبىزدىڭ بالالارىمىزدىڭ جانە بولاشاق ۇرپاقتىڭ دەنساۋلىعىنا ءقاۋىپ توندىرەدى»، - دەدى ەرلان قوشانوۆ.
دەپۋتات داۋلەت تۇرلىحانوۆ ەلەكتروندى تەمەكى مەن ۆەيپتەر كامەلەتكە تولماعاندارعا ەركىن ساتىلىپ جاتقانىن مىسالعا كەلتىرىپ، دابىل قاقتى.
«پرەزيدەنت اتىراۋعا جۇمىس ساپارىمەن بارعان كەزدە بۇل دەرتپەن كۇرەسۋ كەرەك ەكەنىن، جامان ادەتتىڭ تارالۋىنا جول بەرمەۋ كەرەك ەكەنىن ءدال ايتتى. ءقازىر ستۋدەنتتەر دە ۆەيپكە تاۋەلدى بولىپ كەتكەن. ولاردى ساتىپ الۋ وتە وڭاي، جاستار كوشەدە دە ەمىن-ەركىن شەگىپ جۇرە بەرەدى. بۇل ماسەلە تەك قازاقستاندا عانا ەمەس بۇكىل الەمدە دە وزەكتى بولىپ وتىر. 2018 جىلى مەكتەپ وقۋشىلارىنىڭ مىنەز-قۇلقىن زەرتتەۋ بارىسىندا بالالاردىڭ 14%-ى جانە ۇلداردىڭ 6%-ى ۆەيپ شەگەتىنى انىقتالدى. مۇنداي زياندى زاتتاردىڭ قورابىندا 20 جاسقا تولماعان ادامدارعا ساتۋعا بولمايدى دەپ جازىلعان. ستاتيستيكاعا نازار اۋدارساق، سوڭعى جارتى جىلدا ۆەيپتى ساتۋ 32%-عا ءوستى»، - دەدى داۋلەت تۇرلىحانوۆ.
وسى تۇستا دەنساۋلىق ساقتاۋ ءمينيسترى اجار عينيات ءقازىر زاڭناماعا ءتيىستى تۇزەتۋلەر ەنگىزۋ قاراستىرىلىپ جاتقانىن ايتتى.
«قازاقستاندا ۆەيپتەرگە تىيىم سالۋ ماسەلەسى بويىنشا زاڭ جوبالارىنا ستاندارتتار ەنگىزىلىپ جاتىر. ولار ۇكىمەت وتىرىسىندا قارالدى. دەنساۋلىق ساقتاۋ سالاسى دا بۇل ستاندارتتاردى قولدايدى. ءقازىر ءتيىستى قۇزىرلى ورگاندار ۆەيپتەردى پايدالانۋعا تولىق تىيىم سالۋ ماسەلەسىن قاراستىرىپ جاتىر»، - دەپ ءتۇسىندىردى اجار عينيات.