قىزىلشا - الەمدەگى ەڭ جۇقپالى جانە ولىمگە اكەلەتىن اۋرۋلاردىڭ ءبىرى. وعان قارسى جالعىز جانە سەنىمدى قۇرال - ۆاكسيناسيا.
قىزىلشانى قىزىلشا ۆيرۋسى دەپ اتالاتىن وتە جۇقپالى ۆيرۋس تۋدىرادى. اۋرۋ جۇقتىرعان اداممەن بايلانىسقاندا، سونداي-اق ول جوتەلگەندە نە تۇشكىرگەندە اۋا تامشىلارى ارقىلى جۇعادى، دەپ حابارلايدى Almaty-akshamy.kz.
No36 قالالىق ەمحانانىڭ ديرەكتورى گۇلجاينات تىلەگەننىڭ ايتۋىنشا، قىزىلشامەن اۋىرعاندار بورتپە پايدا بولعانعا دەيىن ءتورت كۇن جانە ودان كەيىن ءتورت كۇن جۇقپالى بولادى. بۇل اۋرۋدىڭ تارالۋىن تەجەۋدى قيىنداتادى. قىزىلشا پنيەۆمونيا، ەنسەفاليت، ءتىپتى ءولىم سياقتى اۋىر اسقىنۋعا اكەلۋى مۇمكىن.
"قىزىلشا اۋرۋىنىڭ اۋىر زارداپتارىنا بالالار وتە وسال كەلەدى. شىندىعىندا، قىزىلشا دامۋشى ەلدەردەگى بالالار ءولىمىنىڭ باستى سەبەبىنىڭ ءبىرى. ۆاكسيناسيا - بالالاردى قىزىلشادان قورعاۋدىڭ ەڭ ءتيىمدى ءادىسى. ۆاكسينا ءقاۋىپسىز ءارى ءتيىمدى جانە اۋرۋعا قارسى ۇزاق مەرزىمدى يممۋنيتەتتى قامتاماسىز ەتەدى. سول سەبەپتى ۆاكسينا اۋرۋدى ەمدەۋدەن الدەقايدا ارزان»، - دەيدى گۇلجاينات تىلەگەن.
بالالاردى قىزىلشادان قورعاۋ ءۇشىن ولاردىڭ ۆاكسيناسيالانۋى وتە ماڭىزدى، ويتكەنى تەك ۆاكسينا قىزىلشانىڭ ءورشۋ ءقاۋپىن ازايتىپ، ءومىردى ساقتاۋعا كومەكتەسەدى.
«ءبىرىنشى ەگۋ 12 ايلىق بالالارعا، ەكىنشىسى ولار 6 جاسقا تولعاندا جۇرگىزىلەدى. قىزىلشامەن اۋىراتىن ناۋقاستاردىڭ كوبەيۋىنە بايلانىستى قازاقستاندا قىزىلشا، قىزامىق جانە پاروتيتكە قارسى قوسىمشا جاپپاي يممۋنداۋ جۇرگىزىلىپ جاتىر. ءقازىر ءبىزدىڭ ەمحانادا 6 ايدان 10 اي 29 كۇنگە دەيىنگى بالالارعا ەگۋ جۇرگىزىلىپ جاتىر. كەلەسى ايدان (1 جەلتوقساننان) باستاپ 2 جاستان 4 جاس 11 اي 29 كۇنگە دەيىنگى بالالار ەگىلەدى. بۇل اۋرۋ جۇقتىرعان بالالاردىڭ 60%-ىنىڭ جوسپارلى تۇردە ەكپە الماۋىنا، كوپ جاعدايدا اتا-انالارىنىڭ ەكپەدەن باس تارتۋىنا بايلانىستى»، - دەپ تولىقتىردى دارىگەر.
ءسوزىنىڭ سوڭىندا گ. تىلەگەن ناۋرىزباي اۋداندىق سەبد-مەن بىرلەسىپ پروفيلاكتيكالىق جانە ەپيدەمياعا قارسى ءىس-شارالار تۇراقتى تۇردە جۇرگىزىلىپ جاتقانىن، ونىڭ اياسىندا ەكپە ناۋقانىمەن قاتار، بالالارعا ءبىلىم بەرۋ ۇيىمدارىندا ۆاكسيناسيامەن قامتۋدىڭ شەكتى دەڭگەيى كەمىندە 90%-دى قۇراۋىن قاداعالاۋ، سونداي-اق حالىق اراسىندا ءاقپاراتتىق-تۇسىندىرۋ جۇمىستارىنىڭ جالعاسىپ جاتقانىن باسا ايتتى.