ۇلتتىق بانك قازان ايىندا ساتىلعان التىن قۇيمالاردىڭ كولەمىن جانە ونى ەڭ كوپ ساتىپ العان ايماقتاردىڭ ءتىزىمىن جاريالادى، دەپ حابارلايدى اlmaty-akshamy.kz.
بۇگىندە التىن قۇيمالار ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرىندە ساتىلادى. قازان ايىندا تاعى 102،3 كەلى بولاتىن 2 881 التىن قۇيما ساتىلدى.
1 465 دانا (51%) التىن قۇيمالار ساتىلعان ايماق رەتىندە ءتىزىم باسىندا الماتى تۇرسا، ونان كەيىنگى ورىنعا شىمكەنت قالاسى جايعاسىپتى. بۇل ايماقتا 504 دانا (17%) التىن ساۋدالانعان. ال 257 دانا (9%) التىن ساۋدالانعان قالا رەتىندە استانا ءۇشىنشى ورىنعا جايعاسقان.
"التىن قۇيمالار سەنىمدى ينۆەستيسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى التىن قۇيمالاردىڭ قۇنىن سول مەزەتتە وتەي وتىرىپ كليەنتتەن كەرى ساتىپ الا الادى. وسى ۋاقىتقا دەيىن جالپى سالماعى 686،7 كەلى 26 385 ولشەنگەن قۇيما كەرى ساتىپ الىندى. بۇل – جالپى ساتىلعان التىننىڭ 18 پروسەنتى. كەرى ساتىپ الىنعان التىن قۇيمالاردىڭ بارلىعى ۇلتتىق بانكتىڭ فيليالدارى ارقىلى حالىققا قايتا تاپسىرۋسىز ساتىلادى"، - دەيدى ماماندار.
ايتا كەتەرى، حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسى 2017 جىلى ىسكە قوسىلعان بولاتىن. سودان بەرى جالپى سالماعى 5،0 توننا 143 745 التىن قۇيما ساتىلدى.
قازىرگى كەزدە التىن قۇيمالاردى Halyk Bank، ەۋرازيالىق بانك، Jusan Bank، سەنتركرەديت بانكى، سونداي-اق بانكتىك ەمەس جەكەلەگەن ايىرباستاۋ پۋنكتەرىنەن ساتىپ الۋعا بولادى.
التىن قۇيمالار بەس ءتۇرلى سالماقتا ۇسىنىلادى. ولار - 5، 10، 20، 50 جانە 100گ. قازاقستاندىقتار 10 گرامدىق التىن قۇيما ءجيى الادى.