قازاقستان بويىنشا ەكپە العان ازاماتتاردىڭ باسىم كوپشىلىگى رەسەيدىڭ «سپۋتنيك V» ۆاكسيناسىن تاڭداعان.
مامانداردىڭ ايتۋىنشا، كۇننەن كۇنگە ءورشىپ، تۇرلەنىپ، مۋتاسياعا ۇشىراپ، جاڭا شتامدارى پايدا بولىپ جاتقان ۆيرۋسپەن كۇرەسۋدىڭ ەڭ ءتيىمدى جولى بىرەۋ عانا، بۇل – جاپپاي ۆاكسينا الۋ، دەپ حابارلايدى Almaty-akshamy.kz.
بۇكىل الەمنىڭ Covid-19 كوروناۆيرۋستىق ينفەكسياسىمەن كۇرەسىپ كەلە جاتقانىنا ءبىر جارىم جىلداي ۋاقىت بولددى. جەر بەتىندەگى ادامزاتتىڭ دەنساۋلىعىنا وسى ىندەتتەن تونگەن ءقاۋىپ كۇنى بۇگىن سەيىلەر ەمەس. دۇنيەجۇزىن جايلاعان ىندەتتەن قانشاما ادام اجال قۇشتى؟ عالىمدار دەر كەزىندە ۆيرۋسقا قارسى ۆاكسينا ويلاپ تاپپاعاندا، بۇل ىندەتتىڭ سالدارى قانداي بولاتىنىن ءتىپتى ەلەستەتۋدىڭ ءوزى قيىن.
مامانداردىڭ ايتۋىنشا، ادامدار بەتپەردە تاعىپ، الەۋمەتتىك قاشىقتىقتى ساقتاپ، قانشا وقشاۋلانعانىمەن، ەكپە الماسا، ۆيرۋستان ءجۇز پايىز ساقتانۋ مۇمكىن ەمەس. سوندىقتان دا الەمدەگى مەديسينا سالاسىنىڭ قىزمەتكەرلەرى، عالىمدار حالىقتى جاپپاي ۆاكسينا الۋعا شاقىرادى.
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ بارشا قازاقستاندىقتاردى ۆاكسينا الۋعا شاقىرادى. مەملەكەت باسشىسى انتيۆاكسەرلەردىڭ سوزىنە ەرمەي، عىلىمنىڭ جەتىستىگىنە سەنۋدىڭ ماڭىزىن اتاپ ءوتتى.
«ەكپە الۋ – ءار ادامنىڭ ازاماتتىق پارىزى»، دەدى پرەزيدەنت.
قازىرگى تاڭدا قازاقستاندا ەرىكتى تۇردە ۆاكسينا الۋشىلاردىڭ سانى العاشقى كەزەڭدەرمەن سالىستىرعاندا الدەقايدا ارتتى. قازاقستاندىقتارعا ەكپە بيىلعى جىلدىڭ 1 اقپانىنان باستاپ سالىنا باستاعان بولاتىن.
سوڭعى مالەمىتتەر بويىنشا، بۇگىنگى تاڭدا قازاقستاندا 4 241 859 ادام COVID-19-عا قارسى ۆاكسينانىڭ العاشقى دوزاسىن الدى. رەسپۋبليكانىڭ 2 389 756 ازاماتى تولىق يممۋنداۋدان وتكەن. ەلىمىز بويىنشا ەكپە العان ازاماتتاردىڭ باسىم كوپشىلىگى رەسەيدىڭ «سپۋتنيك V» ۆاكسيناسىن تاڭداعان. ءقازىر وسى ۆاكسينامەن الەمدە 5 ميلليوننان استام ادام ەگىلدى.
دۇنيەجۇزىلىك دەنساۋلىق ساقتاۋ ۇيىمى ەڭ العاشقى بولىپ «سپۋتنيك V» ۆاكسيناسىن كوروناۆيرۋس ينفەكسياسىنا قارسى قولدانۋعا رۇقسات بەرگەن بولاتىن. «سپۋتنيك V»– اعزانىڭ ادەنوۆيرۋستىق پلاتفورماسىنا نەگىزدەلگەن ۆاكسينا. الەم بويىنشا العاشقى تىركەلگەن رەسەي ەكپەسى دۇنيەجۇزىلىك دەنساۋلىق ساقتاۋ ۇيىمى تىزىمىندەگى ۆاكسينالاردىڭ العاشقى وندىعىنا ەنگەن. عالىمداردىڭ زەرتتەۋىنشە، "سپۋتنيك V" ۆيرۋستىڭ جاڭا شتامدارىنا دا قارسى تۇرا الادى. وسى كۇنگە دەيىن ەكپە سالدىرعانداردىڭ اراسىندا ۆاكسيناعا اللەرگيالىق رەاكسيا بايقالماعان. "سپۋتنيك V" ەكپەسى بىرىككەن اراب امىرلىكتەرى، ءۇندىستان، ۆەنەسۋەلا، وڭتۇستىك كورەيا جانە بەلارۋس سەكىلدى الەمنىڭ 67 ەلىندە قولدانىلادى. "سپۋتنيك V" - تيىمدىلىگى 90% اساتىن الەمدەگى ءۇش ۆاكسينانىڭ ءبىرى. ۆاكسينانىڭ تيىمدىلىگى 97،3% دەڭگەيىندە.
تاياۋدا بريتاندىق Nature جۋرنالىندا "سپۋتنيك V" كوروناۆيرۋسىنا قارسى رەسەيلىك ۆاكسينا تۋرالى ماتەريال جارىق كوردى. ماقالادا "سپۋتنيك V" ۆاكسيناسىنىڭ ءقاۋىپسىز جانە ءتيىمدى ەكەنىنە جان-جاقتى شولۋ جاسالعان. شەتەلدىك بەدەلدى باسىلىم ۆاكسينانىڭ الەمدى جايلاعان ىندەتپەن كۇرەسۋدە الاتىن ورنى ەرەكشە ەكەنىن جازدى.
ق ر دسم ۇلتتىق فتيزيوپۋلمونولوگيا عىلىمي ورتالىعى ديرەكتورىنىڭ كلينيكالىق جانە عىلىمي جۇمىستار جونىندەگى ورىنباسارى ءلاززات ەرالييەۆا ۆاكسينا كوروناۆيرۋستىق ينفەكسيانىڭ دامۋىنا تۇرتكى بولمايتىنىن، سونداي-اق سوزىلمالى اۋرۋلاردىڭ ورشۋىنە الىپ كەلمەيتىنىن ايتادى.
"ۆاكسينا كوروناۆيرۋس اقۋىزىنىڭ بەلگىلى ءبىر تۇرىنە انتيدەنەلەر شىعارۋعا باعىتتالعان. قازاقستاندا ءقازىر ءۇش ۆاكسينا بار. KazVac جانە Hayat-Vax-بەلسەندى ەمەس ۆاكسينالار، ولاردىڭ قۇرامىندا «ولتىرىلگەن» ۆيرۋس بار، سوندىقتان بۇل ۆاكسينالار ادامنىڭ جاعدايىن ناشارلاتا المايدى. "سپۋتنيك V" - ۆەكتورلىق ۆاكسينا جانە كوروناۆيرۋس اقۋىزىنىڭ تاسىمالداۋشىلارى ادەنوۆيرۋستار. سوندىقتان ۆاكسيناسيادان كەيىن تۇماۋعا ۇقساس سيندروم بولۋى مۇمكىن. ءبىراق بۇل ادامنىڭ دەنساۋلىعىنا ءقاۋىپتى ەمەس، قايتا اعزانىڭ ۆيرۋسقا توزىمدىلىگىن ارتتىرىپ، قارسى يممۋنيتەت قالىپتاستىرادى، – دەيدى مامان.