جىل سايىن الەمدە ءساۋىردىڭ سوڭىندا دۇنيەجۇزىلىك يممۋنداۋ اپتالىعى وتەدى. ەلىمىزدە 24-30 ءساۋىر ارالىعىندا ءوتىپ جاتقان اتالمىش اپتالىقتىڭ بيىلعى ۇرانى: «ءبارىمىز ۇزاق ءومىر سۇرەيىك!». وسى ورايدا مەگاپوليستەگى كارديولوگيا جانە ىشكى اۋرۋلار عزي رەسپۋبليكالىق اللەرگولوگيا ورتالىعىنىڭ باسشىسى، ق ر دەنساۋلىق ساقتاۋ مينيسترلىگىنىڭ شتاتتان تىس باس اللەرگولوگ-يممۋنولوگى اراي باتىربايەۆا ۆاكسيناسيانىڭ اۋرۋلاردىڭ الدىن الۋدا جانە ءومىرىمىزدى قورعاۋداعى ءرولى تۋرالى ايتىپ بەردى.
- ۆاكسيناسيا – ادام اۋرۋ قوزدىرعىشتارىمەن بايلانىسقا تۇسكەنگە دەيىن اۋرۋدان قورعاۋدىڭ قاراپايىم، ءقاۋىپسىز جانە ءتيىمدى ءادىسى. ول ءبىرقاتار جۇقپالى اۋرۋلارعا توزىمدىلىكتى قالىپتاستىرۋ ءۇشىن ورگانيزمنىڭ تابيعي قورعانىس مەحانيزمدەرىن قولدانادى جانە يممۋندىق جۇيەنى كۇشەيتەدى.
- ۆاكسينالار يممۋندىق جۇيەنى ارنايى انتيدەنەلەر شىعارۋعا ۇيرەتەدى. ولاردىڭ قۇرامىندا بەلگىلى ءبىر اۋرۋدىڭ قوزدىرعىشتارىنىڭ – ونىڭ اسقىنۋ ءقاۋپىن تۋدىرمايتىن ۆيرۋستاردىڭ نەمەسە باكتەريالاردىڭ تەك السىرەگەن تۇرلەرى بار. ولار ءومىر بويى قورعايدى.
- ۆاكسينالار اۋرۋدىڭ قوزدىرعىشىنا قارسى يممۋنيتەتتى قالىپتاستىرۋ ءۇشىن تابيعي قورعانىس مەحانيزمدەرىن بەلسەندى ەتۋ ارقىلى اۋرۋ ءقاۋپىن ازايتادى.
- ۆاكسيناسيا اعزانىڭ يممۋندىق رەاكسياسىن تۋدىرادى.
دارىگەردىڭ ايتۋىنشا، قازىرگى زاماندا جۇقپالى اۋرۋلار شەكارادان وڭاي ءوتىپ، ونى يممۋنيتەتى جوق كەز كەلگەن ادام جۇقتىرىپ الۋى مۇمكىن. ۆاكسيناسيا ءوزىڭىزدى جانە اينالاڭىزداعى جانداردى قورعاۋعا مۇمكىندىك بەرەدى. كەز كەلگەن ادام ەكپە سالدىرا الادى. ءبىراق بەلگىلى ءبىر اۋرۋلارى بار ادامدارعا كەيبىر ەكپەلەردى سالۋعا بولمايدى نەمەسە كەيىنىرەك سالدىرۋىنا بولادى. بۇل اۋرۋلارعا: سوزىلمالى اۋرۋلار نەمەسە ەمدەۋ كۋرستارى (مىسالى، حيميوتەراپيا)؛ ۆاكسينا كومپونەنتتەرىنە اللەرگيالىق رەاكسيالار؛ ۆاكسيناسيا كەزىندەگى اۋىر اۋرۋلار جاتادى.
ەكپەلەر ءبىرقاتار كەسەلدەن قورعايدى، سونىڭ ىشىندە: جاتىر موينى وبىرى، ۆ گەپاتيتى، تۇماۋ، قىزىلشا، مەنينگيت، كوكجوتەل، پنيەۆمونيا، پوليوميەليت، قۇتىرۋ، جەلشەشەك جانە ت.ب. ددۇ باعالاۋى بويىنشا، تەك بالالارعا ارنالعان ۆاكسينالار جىل سايىن 4 ميلليوننان استام ادامنىڭ ءومىرىن ساقتايدى.
ليسەنزيالانعان بارلىق ەكپە ءقاۋىپسىز جانە ولاردىڭ ءبارى مۇقيات زەرتتەۋ، تەكسەرۋدەن وتكەن. ۆاكسينا ءسىزدى جانە جاقىندارىڭىزدى ينفەكسيالاردان قورعايدى.