«Batyr Bolamyn» قورىنىڭ قولداۋىمەن الماتى وبلىسىنىڭ اسقار توقپانوۆ اۋىلىندا بالالارعا ارنالعان سپورت كەشەنىنىڭ اشىلۋ سالتاناتى ءوتتى.
«قازاقستان حالقىنا» قورىنىڭ دەمەۋشىلىگى جانە سەرىكتەستىگىمەن جۇمىس ىستەپ جاتقان قور شالعاي ايماقتا وسىمەن 40-تان اسا سپورت زالدارىن اشىپ ۇلگەرگەن، دەپ حابارلايدى اlmaty-akshamy.kz stan.kz-كە سىلتەمە جاساپ.
«Batyr Bolamyn» قورىنىڭ قولداۋىنىڭ ارقاسىندا اۋىل-ايماقتاعى كوپ بالالى وتباسىلار مەن حالىقتىڭ الەۋمەتتىك وسال توپتارىنان شىققان بالالار بوكس، قازاقشا كۇرەس، باسكەتبول، دزيۋدو، ۇلكەن تەننيس، ۇستەل تەننيسى، توعىزقۇمالاق، شاحمات جانە ت. ب. سپورت سەكسيالارىنا تەگىن قاتىسا الادى.
قور بۇل جولى ەركىن كۇرەستەن الەم چەمپيوناتىنىڭ بىرنەشە دۇركىن جانە ازيا چەمپيوناتىنىڭ جەتى دۇركىن جۇلدەگەرى، قازاقستاندىق پالۋان داۋلەت نيازبەكوۆتىڭ باستاماسىنا قولداۋ ءبىلدىردى. اتاپ ايتقاندا پالۋان بۇگىندە شاكىرت دايىنداۋعا نيەتتەنىپ اسقار توقپانوۆ اۋىلىندا «Niyazbeov kures zaly» سپورت زالىن اشقان ەدى. «Batyr Bolamyn» قورى ءوز تاراپىنان كەرەكتى جابدىقتارمەن، سپورتتىق سايماندارمەن قامتاماسىز ەتىپ، اۋىل بالالارىنا سپورتپەن ەمىن-ەركىن اينالىسۋىنا مۇمكىندىك جاسادى.
«بۇگىنگى سپورت زالدىڭ اشىلۋىنا كەلگەن بارشاعا كوپ راحمەت. اسىرەسە بۇل كەشەنگە دەمەۋشىلىك ءبىلدىرىپ كوپتەگەن قۇرالدارمەن جابدىقتاعان «قازاقستان حالقىنا» جانە «Batyr Bolamyn» قورلارىنا ەرەكشە العىس ايتقىم كەلەدى. ەندى الداعى ۋاقىتتا جاقسى شاكىرتتەر دايىنداپ، ۇلكەن جەتىستىكتەرگە جەتەمىز دەپ ويلايمىن»، – دەدى داۋلەت نيازبەكوۆ.
نيازبەكوۆ ءقازىر سپورت سەكسيالارىنا 100-دەن اسا بالانىڭ قاتىساتىنىن العا تارتتى. ولار ءتۇرلى سپورت تۇرلەرىنە ارنايى كەستەمەن كەزەكپەن جاتتىعۋعا كەلەدى ەكەن.
«Batyr Bolamyn» قورى بۇل سپورت زالدى بوكس قولعاپتارى، گەرلەر، دوپ، سەكىرتپە، ارقان، سياقتى تاعى دا باسقا كوپتەگەن جاتتىعۋ ارنالعان قۇرال-سايماندارمەن جابدىقتادى. قوردى ارمان مەن اسىل ۋاحاپ ەسىمدى ازاماتتار قۇرعان. ولار سپورت زالدىڭ اشىلۋ سالتاناتىن جوعارى دەڭگەيدە ۇيىمداستىرىپ، توقپانوۆ اۋىلىنىڭ تۇرعىندارىنا قۋانىش سىيلادى.
ال «Batyr Bolamyn» قورىنىڭ پرەزيدەنتى ەرنۇر سابىكەن ۇلى بارشانى قۇتتىقتاپ، بيىل وزگە دە ايماقتاردا تالانتتى جاستاردى قولداۋعا ارنالعان تاعى 100 سپورت زالىن اشۋ جوسپارعا قويىلعانىن العا تارتتى.
«بۇل ءبىز ءۇشىن ءدۇبىرلى توي. مىنا زالدىڭ اشىلۋىنا سەپ بولىپ، باسى-قاسىندا ءجۇرىپ، قول ۇشىن تيگىزىپ جاتقانىمىزعا وتە قۋانىشتىمىز. وسى زالدى اشىپ جاتقان داۋلەت ەلدىڭ، ۇلتتىڭ ماقتانىشى. كەشە عانا ەلىمىزگە جەڭىس اكەلسە، ءقازىر سول جەڭىسىن بالالارمەن بىرگە جالعاستىرماقشى. راسىندا وسىنداي ازاماتتى تاربيەلەگەن اتا-اناسىنا العىس ايتامىز. مۇنداي جاتتىقتىرۋشىمەن ءبىزدىڭ ەلدە ءالى دە چەمپيونار شىعاتىنىنا سەنىمدىمىز. بۇل زال ءبىرىنشى داۋلەتتىڭ ەڭبەگى. ال قولداۋشى رەتىندە وسىنداي ازاماتتىڭ باستاماسىن جالعاستىرا الساق نۇر ۇستىنە نۇر بولادى دەپ ويلايمىن. وسى تۇستا شالعاي جەرلەرلەردە بالالاردىڭ سپورتپەن ەركىن اينالىسۋىنا قولداۋ كورسەتىپ جاتقان قازاقستان حالقىنا قورىنا دا العىس ايتامىن. ىنتالى جاستاردى قولداۋ ءبىز ءۇشىن دە ۇلكەن قۋانىش. الداعى ۋاقىتتا بيىلعا جوسپارلانعان ءالى 76 زالىمىز بار. ونىڭ ەكەۋى مىنە اشىلىپ جاتىر. وعان دەيىن اشىلعان 40 زالىمىز بار. سوندا بارلىعى 100-دەن اسا زال بولماق. وسىناي قارقىندا ەرتەڭگى چەمپيوندارىمىز كوپ بولسىن»، – دەدى ەرنۇر سابىكەن ۇلى.
زالدىڭ اشىلۋ سالتاناتىنا قىزمەت ەتۋ مەرزىمىندە 70-كە جۋىق قايىرىمدىلىق باعدارلامالار مەن جوبالاردىڭ باستاماشىسى بولعان «قازاقستان حالقىنا» قورىنىڭ وكىلدەرى دە قاتىستى.
«وسىنداي زالدىڭ اشىلۋىنا سەپتىگى ءتيىپ جاتقان «Batyr Bolamyn» قورىنا العىس ايتامىز. اۋىل تۇرعىندارىنا دا راحمەت. 2024 جىلدىڭ سوڭىنا دەيىن تاعى جوسپارلانعان بارلىق زالداردى اشىپ، 100 كەشەندى ىسكە قوسساق دەيمىز. وسىنداي ىسكە اتسالىسىپ، بالالاردى تاربيەلەپ، ەلىمىزدىڭ اتىن شىعاراتىن سپورتشىلار دايىنداۋعا ۇلەس قوسقانىمىزعا وتە قۋانىشتىمىز. قورىمىز ءار ءتۇرلى باعىتتاردا جۇمىس جاساپ جاتىر. قازىرگى ۋاقىتتا سۋ تاسقىنىنا بايلانىستى 10 ميلليارد تەڭگە اقشا بولىنەدى. ەلدەگى تابيعي اپات سالدارىن جەڭۋگە دە بار كۇشىمىزدى سالۋدامىز. ال بۇگىنگى وسى ءبىر قۋانىشتى جيىندا ايتارىم، سپورت زالدارىمىز كوبىرەك اشىلىپ، جەڭىمپازدارىمىزدىڭ سانى ارتسىن!»، – دەدى «قازاقستان حالقىنا» قورىنىڭ وكىلى ۇلانبەك نۇرمانوۆ.
اتاۋلى شارادا داۋلەتبەكوۆ ازامات، نۇرلان بەكجانوۆ، قايپانوۆ نۇرقوجا، الىشەر ەرعالي، جادىرايەۆ دەمەۋ، ۇسەربايەۆ عالىم سەكىلدى ق ر ەڭبەك سىڭىرگەن سپورت شەبەرلەرى، وليمپيادا ليسەنزياسىنىڭ يەگەرلەرى كەلدى. ولاردى اۋىل بالالارى قۋانا قارسى الىپ، شابىتتانا ءتۇستى.
شارادا ءقادىرلى قوناق رەتىندە حالىقارالىق سپورت شەبەرى، سيدنەي وليمپياداسىنىڭ جەڭىمپازى، ق ر بوكستان ەڭبeك سىڭىرگەن جاتتىقتىرۋشىسى ەرماحان ىبرايموۆ تا بوي كورسەتتى.
«قۇرمەتتى جينالعان قاۋىم، بۇگىن داۋلەت نيازبەكوۆتىڭ ايتۋلى سپورت زالى اشىلىپ جاتىر ەكەن. مۇنداي زالدار كوپتەپ سالىنۋى كەرەك. ونى قولعا الىپ، قولداۋ مەن دەمەۋ ءبىلدىرىپ جاتقان «قازاقستان حالقىنا»، «Batyr Bolamyn» قورلارىنا العىس ايتامىز! بۇكىل قازاقستاندا اشىلىپ، جاتىر. شىن جۇرەكتەن سەزىپ تۇرمىن. وسى اشىلىپ جاتقان زالدان بالكىم 8-10 جىلدان كەيىن بولار، ايتەۋىر ءبىر وليمپيادا چەمپيونى شىعادى. بۇل جەردە داۋلەت نيازبەكوۆتىڭ ءوزى قالاي كۇرەسكەنىن ءبىز وتە جاقسى بىلەمىز. ول ءوزىنىڭ شەبەرلىگىن كىشكەنتاي بالالارعا بەرەدى. سوندىقتان مىندەتتى تۇردە چەمپيون شىعادى. سول كەزدە مۇندا تاعى دا وسىنداي ۇلكەن توي جاسالاتىنىنا كامىل سەنەمىن. مۇنداي سپورت زالىنىڭ ارقاسىندا بولاشاق جەتكىنشەكتەرىمىزدىڭ دەنى ساۋ، مىقتى، ازامات بولىپ تاربيەلەنەدى. قۇتتى بولسىن! ءبارىمىز سپورت زالدىڭ وسىپ-وركەندەۋىنە ۇلەس قوسايىق»، – دەدى ەرماحان ىبرايىموۆ.
وسىدان سوڭ زالدىڭ اشىلۋ سالتاناتىندا ەرماحان ىبرايموۆ پەن ق ر ەڭبeك سىڭىرگەن سپورت شەبەرى يسلام بايرامۋكوۆ لەنتا قيدى. راسىمدە اسقار توقپانوۆ اۋىلىنىڭ اقساقالى باتاسىن بەرىپ، شاشۋ شاشىلدى. سپورت زالدىڭ باس جاتتىقتىرۋشىسى داۋلەت نيازوۆ كەلگەن قوناقتارعا شاپان جاپتى.
تۇرعىندار اۋىل بالالارى ءۇشىن تاپتىرماس مۇمكىندىك سىيلاعان "Batyr Bolamyn" قورى مەن دەمەۋشىلەرگە العىستارىن جاۋدىردى. شاراعا "Batyr Bolamyn" قورىنىڭ امباسسادورى بولىپ NNN لاقاپ اتىمەن تانىمال، بلوگەر نۇرداۋلەت بەكتۇرسىن دا بوي كورسەتتى.
“مۇنداي باستامالاردى قولدايمىن. سەبەبى كەز كەلگەن چەمپيون، كەز كەلگەن باتىر اۋىلدان شىعادى. ءوزىم دە اۋىلدان شىققانمىن. سوندىقتان وسىنداي جەرلەردە ەش ويلانباي قولداۋعا ءاردايىم دايىنبىز. باتىرلارىمىز كوپ بولسىن. مۇمكىن ەمەس ەشتەڭە جوق!”، – دەدى نۇرداۋلەت.
بلوگەر دە قۇر قول كەلمەي بالالارعا ءوزىنىڭ كىشىگىرىم سىيلىقتارىن بەردى.
وسىلايشا توقپانوۆ اۋىلىنىڭ بالالارى جاڭا، كەڭ ءارى ىشىندە بارلىق مۇمكىندىك جاسالعان زالمەن قوسا وزدەرى ۇلگى تۇتقان سپورتشىلاردى كورىپ ودان سايىن قۋانا ءتۇستى.
"Batyr Bolamyn" قورى الدا تاعى دا باسقا ەل ايماقتارىنا بارىپ، جاس تالانتتارعا قولداۋ كورسەتپەك.