كولىك ءمينيسترىنىڭ م.ا. ءساتجان ابلالييەۆ ۇكىمەتتەگى ازاماتتاردى قابىلداۋ ورتالىعىندا ەل تۇرعىندارىن جەكە ماسەلەلەرى بويىنشا قابىلدادى.
كولىك مينيسترلىگى باسشىلىعىنىڭ وكىلىمەن كەزدەسۋگە الماتى، پاۆلودار، ورال، ريددەر قالالارى مەن الماتى وبلىسىنىڭ 5 تۇرعىنى جازىلدى، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
م.شاعامبايەۆ پاۆلودار وبلىسىنداعى كولىكتىك باقىلاۋ ينسپەكسياسى قىزمەتكەرلەرىنىڭ ىس-ارەكەتتەرىنە شاعىمداندى. ال س.بەكباۋوۆ الماتى-1 جانە الماتى-2 ۆوكزالدارىندا مۇمكىندىگى شەكتەۋلى جانداردىڭ مۇقتاجدىقتارى ءۇشىن جاعداي جاسالماعاندىعىنا نازار اۋداردى. ءوز كەزەگىندە كوپبالالى انا ج.جاڭابايەۆا الماتى وبلىسىنىڭ جامبىل اۋدانىندا جەرگىلىكتى جانە رەسپۋبليكالىق جولداردى دامىتۋ ماسەلەلەرىن تالقىلاۋ ءۇشىن جازىلدى.
سونداي-اق مينيسترلىك وكىلىنە «وسكەمەن قالالىق اۆتوبۋس» ءجشس-نىڭ اتىنان د.فومين جۇگىندى. ول حالىقارالىق تۇراقتى جولاۋشىلار تاسىمالى كەزىندە جولاۋشىلاردى تاسىمالداۋدىڭ بەلگىلەنگەن ەرەجەلەردەگى بۇزۋشىلىقتارى تۋرالى مالىمدەدى.
ءوتىنىش بەرۋشىلەرگە تولىققاندى جاۋاپتار قايتارىلىپ، تۇسىنىكتەمەلەر بەرىلدى.
ماسەلەن، تەمىرجول ۆوكزالدارىنا قاتىستى ءوتىنىش بەرۋشىگە 2019 جىلدان باستاپ الماتى-1 جانە الماتى-2 ستانسيالارىندا حالىقتىڭ موبيلدىلىگى تومەن توپتارى ءۇشىن جاعداي جاسالعانى تۋرالى ايتىلدى. الماتى-1 ۆوكزالىندا كونديسيونەرى بار دەمالىس بولمەسى اشىلعان، سونىمەن بىرگە كومەككە شاقىرۋ تۇيمەشەكتەرى، №1 بيلەت كاسساسىنىڭ جانىندا جانە كاسسا زالى مەن كۇتۋ زالى اراسىندا ارنايى كوتەرگىشتەر ورناتىلعانى ءسوز بولدى. عيماراتتا جانە ىرگەلەس اۋماقتا مۇمكىندىگى شەكتەۋلى جاندارعا ارنالعان جولدار توسەلىپ، مۇگەدەكتەرگە ارنالعان اربالار ساتىپ الىنعان. سونىمەن قاتار سانيتارلىق توراپتارعا جوندەۋ جۇرگىزىلىپ، «ارال» پلاتفورماسىنا اتالعان ساناتتاعى ازاماتتاردى ءقاۋىپسىز جەتكىزۋ ءۇشىن 2 جاڭا ليفت ورناتىلعانى ايتىلدى.
ءوز كەزەگىندە الماتى-2 ۆوكزالىندا دا دەمالىس بولمەسى جوندەلىپ، كومەككە شاقىرۋ تۇيمەشەكتەرى مەن 3 پاندۋس ورناتىلعان. سونداي-اق بيلەت كاسساسىنىڭ قولجەتىمدىلىگى كوزدەلىپ، عيماراتتا جانە ىرگەلەس اۋماقتا ارنايى جابدىقتالعان جولدار توسەلگەن. وعان قوسا، سانيتارلىق توراپتار جوندەلىپ، مۇگەدەكتەر اربالارى ساتىپ الىنعان جانە موبيلدىلىگى تومەن ازاماتتاردى ۆاگوندارعا ءقاۋىپسىز وتىرعىزۋ جانە ودان ءتۇسىرۋ ءۇشىن ارنايى كوتەرگىشتەر دە قاراستىرىلعان.
№51/52 جولاۋشىلار پويىزىنا قاتىستى جۇگىنگەن ازاماتقا، تاسىمالداناتىن جولاۋشىلاردىڭ كوپ بولماۋىنا بايلانىستى اتالعان باعىت شىعىندى بولعاندىعى ايتىلدى. 2023 جىلى كوممەرسيالىق تاسىمالداۋشىنىڭ شىعىنى 990 ملن تەڭگەگە جەتكەن. ەكونوميكالىق تيىمسىزدىكتى ەسكەرە وتىرىپ، اتالعان باعىت بويىنشا پويىز قوزعالىسى توقتاتىلعان.
الايدا، حالىقتى تەمىرجول تاسىمالىمەن قامتاماسىز ەتۋ ءۇشىن بۇگىنگى تاڭدا №27/28 «الماتى-ورال» (تالگو)، №7/8 «الماتى-ساراتوۆ» جانە №57/58 «استانا-ورال» جەدەل پويىزدارى قاراستىرىلعان. جولاۋشىلار اعىنى ۇلعايعان جاعدايدا نەگىزگى قۇرامعا قوسىمشا ۆاگوندار قوسىلادى.
كوپبالالى ايەلدەر ساناتىنداعى ازاماتشاعا «ۇزىناعاش-وتار» جولىنىڭ 101-143 كم ۋچاسكەسى بويىنشا 18 قاڭتاردا كەلىسىمشارتقا قول قويىلدى دەگەن جاۋاپ بەرىلدى. مەردىگەر KLV Insaat Anonim Sirketi كارەرلەردى راسىمدەۋ پروسەدۋراسىنا كىرىسكەن. بارلىق رۇقسات قۇجاتى الىنعاننان كەيىن كومپانيا ۋچاسكەدە تولىق اۋقىمدى قۇرىلىس-مونتاج جۇمىستارىن باستايدى دەپ كوزدەلىپ وتىر. سونىمەن قاتار جولشىلار كادرلىق جانە تەحنيكالىق رەسۋرستاردى جۇمىلدىرا باستاعان.
جىلدىڭ سوڭىنا دەيىن ەكى باعىتتا دا جابىننىڭ تومەنگى قاباتى بويىنشا قوزعالىستى اشۋ جانە جاساندى قۇرىلىستار بويىنشا بارلىق مونتاجداۋ جۇمىسىن اياقتاۋ جوسپاردا بار.
اۆتوبۋس پاركىنىڭ وكىلىنە قازىرگى ۋاقىتتا ونىڭ ءوتىنىشى بويىنشا رەسەي فەدەراسياسىنىڭ كولىك مينيسترلىگىنە قوسىمشا سۇرانىس جىبەرىلگەنى تۋرالى ايتىلدى. بۇل رەتتە ءوتىنىشتى قاراۋ مەرزىمى تاعى 30 كۇنگە قايتا ۇزارتىلعان. اتالعان ماسەلە رەسەي تاراپىنان الىنعان اقپاراتتىڭ قورىتىندىسى بويىنشا قارالاتىن بولادى.